Siempre meldamos kon grande plazer las ermozas i emportantes aktividades de la Itahdut, la Asosiasion de los Turkanos en Israel (IYT). Una de estas fue la ekspozision de "Mansiones i Kazas Antiguas de Istanbul"de maketas echas del Dr. Yosef Sibi, ke se avrio kon una ermoza seremonia el 2 Novembre, noche de Alhad (Shabat a la noche) en el Sentro Kultural Turko de Yafo. Esta ekspozision fue organizada por la IYT en kolaborasion kon la Embasada de la Republika Turka en Tel Aviv para markar el 24en aniversaryo de la asasinasion de Yitzhak Rabin. La adjensia turka Anadolu (de notisias) estuvo presente en el program de aviertura i la TV turka TRT World lo travo en filmo. La ekspozision va kedar en vista durante 3 mezes.
El Sentro Kultural Turko se topa en Saraya, un edifisio istoriko en stilo neoklasiko otomano, al lado de la famoza torre de ora en Yafo ke fue konstruida en 1901 a la okazion del 25en aniversaryo del reynado del Sultan Abdulhamit II.
Los ke estuvieron prezentes mos kontan del atmosfer enkantado de la ekspozision, kon las maketas iluminadas kon briyo i akompanyadas de la muzika instrumentala nostaljika del muzikante turko Ferhat Livanelli, el ambiente istoriko de Saraya i la vista de kolores de la plasa de Yafo ke se vian.
Despues de un kokteyl en la terasa avierta, ande se sirvio delikasias i dulsuras turkas tradisionalas, el grupo paso al sigundo etaj ande kantaron endjuntos los imnos nasionales de Turkia i de Israel. El Sr. Yakup Barokas, prezidente de la "Moatsa" (konsilyo) de la IYT, izo el deskorso de bienvenida i prezento al Dr. Yosef Sibi, ke izo las maketas ekspozadas. Dr. Yosef Sibi nasio en Balat, Istanbul, en 1943, izo aliya en 1969, i fue fondador i direktor de la seksion de urologia en el ospital Barzilay en Ashkelon.
El Dr. Sibi avlo despues, dziendo ke el empeso este lavoro en oras de repozo entre operasiones, en desinando lo ke se akodrava de las fraguas de su chkiz en Istanbul, i ke en konstruyendo las maketas pensava a los ke bivian en estas fraguas, i tratava no solo a reprezentar la vista de afuera ma tambien a reflektar la manera de vida ke tenian adientro.
Tambien el ekspliko ke dio lugar tambien a profesiones viejas ke no egzisten mas, komo meter debasho de una maketa una butika de "donerdji" (vendedor de "döner", karne asada tornante, lo ke se yama "gyro" en grego.)
Ovi Roditi Gülerşen, el prezidente de la IYT ekspliko ke durante los 60 anyos de su egzistensia, esta Asosiasion trato de adjuntar los puevlos de Turkia i İsrael kon aktividades kulturalas, i ke esto fue apresyado por el defunto Ismail Cem, viejo Ministro de Eksterior turko, ke avia prezentado a la IYT la medalya de "servisio superior." Tambien adjusto ke munchos voluntarios lavoran para mantener avierto "el ponte" entre estos dos paises kon aktividades kulturalas.
Ademas, el Sr. Gulersen disho ke kada uno puede ver en estas maketas un pedaso de su chikez, i tambien ke siendo ke estas son echas de pedasos de tavla i seramika ke kedavan para echar al isyerkol, tienen tambien valor ekolojikas. el rengrasyo al Dr. Sibi, i a todos los ke dieron sus apoyo para realizar este projekto.
Tambien avlo el atashe de Turkia, Tolga Budak, el kual dio la istoria del edifisio Saraya i su restorasion kon la inisiativa de la ambasada Turka, ets. I el tambien oguro el enforsamiento de buenas relasiones entre los dos puevlos i la kontinuasion de este jenero de aktividades kulturalas.
La parte final de este program de aviertura fue una prezentasion muzikal de Renin Meseri i Jarky Zadick, kon kantikas en turko i ladino, inkluyendo tambien la kantika de la "Novya de Istanbul", la seria de telenovela turka ke es muy popular en Israel.
La djente despues abasharon al primer etaj, a vijitar la ekspozision kompuesta de 30 maketas, no solo de kazas i edifisios, ma tambien de eskalas de vapores, vapores viejos, profesiones viejas, i templos relijozos, ansi ke la kaza ande nasyo Atatürk en Salonik. En mezmo tiempo en un ekran se projekto un filmo ke mostrava las kazas i palasios viejos de Istanbul.
La expozision tenia mas de 200 asistientes en su aviertura, i kontinua a atirar mas vijitadores, siendo ke va kedar en vista durante 3 mezes: los djueves entre las oras 12:00 i 16:00, i viernes entre 10:00 i 14:00.
