JACOB RODRIGUEZ PEREIRA Prekursor de la ensenyansa a los sodros-mudos.

Uno de los prroblemas medikales a los kualos no avia solusion asta unos 300 anyos atras era el de los nasian sodr s, i no oyendo ningun sono no podian embezarsen a avlar i kedavan mudos por toda sus vida.

Grasias a los grandes progresos echos en este kampo, oy dia el problema ke enfrenta a los sodros-mudos es muncho mas fasil a rezolver ke en los siglos pasados. En la mayoria de los paizes adelantados ay eskolas o institusiones espesiales ande eyos pueden embezar a entender lo ke les es dicho i mantener relasiones mas o menos normales kon el resto de la djente.

Muy pokos saven, djuntos kon esto, ke el primero a aver dezvelopado un metodo ke permetiera a los sodros-mudos de avlar i no solo darse a entender kon sinyos de la mano, fue Jacob Rodriguez Pereira, un djudio konverso de Espanya ke, fuyendo de la Inkizision se aresento en Bordeaux, Fransia, en la primera metad del siglo 18.

Sigun los manaderos istorikos ke tratan de este tema, la famiya Rodriguez Pereira se refujio en Portugal, en 1492. kuando fue proklamado el Edikto de Ekspulsion de los djudios de Espanya; ma las persekusiones relijiozas ke se abatieron sovre los djudios de Portugal tambien, unas kuantas diezenas de anyos despues, ovligaron a los Rodriguez Pereira a tornar a Espanya ande se konvertieron al kristianizmo (por la forma solo, siendo ke en el sekreto de sus kaza eyos kontinuan a observar los mandamientos de la relijion djudia). Eyos se aresentaron en Berlanga, en la rejion de Extremadura.

Jacob Rodriguez Pereira ke nasio en esta sivdad en 1715, partio de ayi a la edad de 17-19 anyos i se aresento en Bordeaux. Ay ken dize ke fue yamado ayi por parientes suyos ke ya bivian en esta sivdad, ma ay tambien ken pensa ke el abandono Berlanga por espanto de la Inkizision. Ya se save, en efekto, ke algunos parientes suyos, en Espanya, fueron djuzgados por el “Santo Oficio”. En Bordeaux, de otra parte, los djudios portugezes i espanyoles gozavan de la mayor parte de los derechos siviles ke tenian los otros abitantes. Despues de 1723 eyos ya no fueron mas ovligados a eskonder sus verdadera relijion ni pretender ke son kristianos.

En un dokumento firmado en este anyo por el rey Luis 15, eyos fueron rekonosidos publikamente komo djudios i desde entonses puedieron observar sus relijion libremente i aviertamente.

Aun ke Jacob Rodriguez Pereira era muy kapache en kestiones de finansas, el konsentro todos sus esforsos en la bushkeda de un metodo ke permeta a los sodros-mudos de avlar.

Ke es la razon ke se dediko a este tema djustamente? Sigun Rodriguez Pereira el mizmo, el fue pushado a investigar esta kestion por el intereso ke tenia por una sierta persona. El no presizo ken era esta persona ma se pensa ke se tratava de una ermana suya ke era sodra-muda i a la kuala keria embezar a avlar.

Despues de varios anyos de estudios i investigasiones kon sodros-mudos, en 1745 el perfeksiono su metodo al punto ke pudo dar rezultados impresionantes. Su primera reushidad fue kon un ninyo djudio, Aaron Beaunarin, sodro de nasimiento, ke despues de unas kuantas lisiones arivo a prononsar diversas palavras i frazas.

Poko despues le fue trayido un otro ninyo, ke era el tambien sodro-mudo. En 5 dias de lisiones Rodriguez Pereira reusho a azerle prononsar 50 palavras diferentes i en el espasio de pokos mezes el ninyo ya tuvo un vokabulario kon el ayudo del kual pudo ekspresarse i darse entender.

Este ultimo alkanse asiguro a Jacob Rodriguez Pereira el rekonosimiento ke tanto dezeava alkansar - en primero de la Akademia Real de Beyas Artes de Cannes, despues de la Akademia de Sensias de Paris, i enfin del rey Luis 15 el mizmo, ke lo resivio en audiensia i delantre del kual izo una demonstrasion de su metodo: su elevo prononso unas kuantas frazas i a la demanda del rey, resito una orasion.

Despues vinieron, una detras de la otra, entrevistas kon personalidades i shefes de estado komo los reyes de Polonia, Suedia, Danimarka i mas, ke kedaron maraviyados por sus alkanses i le ekspresaron sus admirasion.

En 1780, Jacob Rodriguez Pereira murio en Paris, aedado de 65 anyos i kon la satisfaksion de ver su metodo rekonosido i apresiado. La rekonosensia ke le es devida por sus esforsos fue muy bien ekspresada por un jurnalista ke, ainda en 1747, despues de los primeros alkanses kon los dos ninyos en Bordeaux, eskrivio ke “El echo ke Rodriguez Pereira aiga topado un metodo para azer avlar a los sodros-mudos, mas fasil i efikas de los ke avia de antes, ya le basta para mereser un lugar de onor entre los benefaktores del djenero umano”.