UN MUEVO PROYEKTO PARA ANREJISTRAR LAS EKSPERİENSAS DE LOS SOVREBIVIENTES

Los aktos de antisemitizmo estan pujando muncho en los anyos dalkavo. Munchos sovrebivientes de la Shoah keren partajar sus istorias. Keren avlar sovre sus eksperiensias i kompararlas kon el antisemitizmo de oy. Es tan emportante para eyos ke sus eksperiensias serven komo un avertisimiento para ke la djente aga atasion.

El tiempo esta pasando: el mas mansevo sovrebiviente agora tiene 70 anyos. Es emportante de enrejistrar estos testimonios komo evidensia para las muevas jenerasiones. Es urjente para los sovrebivientes de partajar sus sufriensas debasho del rejim brutal nazi i keren ke muncha djente se ambeze el Olokosto.

Los muzeos komemorativos del Olokosto estan ayudando a los sovrebivientes a prezervar sus eksperiensias kon el ayudo de la teknolojia. Desde ke se avryo ay 23 anyos, el Muzeo del Olokosto de Houston, arekojo 298 testimonios de sovrebivientes. Agora, estos enrejistramientos se estan aziendo dijital i todos van a pueder toparlos en el sitio de web del muzeo.

No solo prezervar estas istorias, ma kale utilizarlas tambien. Los otros muzeos tambien estan ancheando sus arshivos dijitales para enrejistrar istorias de sovrebivientes. Se esta realizando esfuerzos para dijitalizar estas istorias para ke "todos, de todas partes del mundo", puedan ayegar, alkansar a los dokumentos del Olokosto.

Muncha djente, despues ke un sovrebivente esta eskapando de avlar, kere demandarle kestiones, kere tokarlo, kere mezmo abrasarlo. En el sitio de web, abrasarlo o tokarlo es imposivle, ma un proyekto interaktivo ke se yama ‘dimensions in Witness’ se esta realizando kon los esfuersos de la Fondasion Shoah i los muzeos del Olokosto. Los espektadores van a pueder demandar kestiones al sovrebiviente ke no esta mas en vida. En utilizando la teknolojiya, al deredor de 1000 kestiones kon las repuestas se estan aparejando. Al punto ke el espektator va demandar la kestion, el sovrebiviente le va dar la repuesta. Siguramente no va ser fasil de aparejar esto, ma oy kon la teknolojiya nada no es imposivle.

Yazarın tüm yazıları için tıklayınız