Sovre “Maldizir la Turkiya”


Kuando mozotros partajamos muestras eksperiyensias komo djudios en la Turkiya kon el publiko turko, siempre ay la mizma reaksiyon: “no malavles de la Turkiya.” En realidad, esta reaksiyon es una pozisyon de fuerza ke no tiene interés en una memoria publika de la eksperiensiya djudia en muestro payis natal.



Desde el golpe de 1960 a los primeros días de los anyos ochenta, muestra komunita fue dominada por el paradigma de kayades. No ekspresimos muestras opiniones sovre los echos del governo en ambientos publikos komo djudios. Indemas no mos permitimos de komunikar sovre muestras eksperiensiyas komo la Furtuna de 1934, el varlik, la grande immigrasyon a Israel en los dalkavos anyos de los kuarenta i munchas otras kozas.



En los anyos ochenta, la stratejia troko un poko. Sige siendo la mizma idea de kayades por los djudios ordinarios, kon espanto de ekspresarmos, ma un proyekto de ekspresar solo la “toleransia” imajinada del governo i de la sosyedad turka por muestros “lideres” no elejidos. I en mi opinyon este kamino de promover fantaziyas de toleransia fue un deservisyo muncho mas grande a muestra komunita i istoria ke el kayadez .



Es esta idea de “promosyonar” i “toleransiya” ke kreo el muzeo. I las personas kon esta idea kontinuan a gritar “maldad” kuando un djudio partaja su opinión o la istoria de su famiya. Munchos de mozotros agora eskrivimos en platformas libres komo el sitio web del Itahdut o Avlaremoz. Avlimos en konferansias en Zoom, dokumentarios, i programas de televizyon. Traemos las realidades de ser djudio en Turkiya – la buena i la mala. Las borekitas i la furtuna. Hanuka en Ortaköy i deportasyon por varlik en Sirkeci.



Ke fue la teoría del kambio de los promosyonistos? Uzar esta kampanya de toleransiya para protejer el statuko i tener una relasyon kalma kon el governo. Frankamente este proyekto fue totalmente sin azlaha por ameliorar la pozisyon de djudios komo djudios. Pedrimos mas poblasyon i el antisemitismo es mas fuerte.



Agora tenemos otra teoría de kambio ke kree ke la verdad i la rekonsiliasión están en el kamino por un futuro mas siguro i igual para los djudios en muestro payis. Dunke partajar muestras istorias no es “kalumniyar” muestro país, o difamar los Turkos, o maldizir el governo. Muestra situasyon es una de dezigualidad struktural. No es una mala suerte. Malorozamente, las malas mos pasaron. No solo en un grande malanyo komo 2003, los atakes i la muerte de Yasef Yahya, ma kada anyo.



Kuando la djente akuzaron los ke tenian el koraje de avlar en publiko de las eksperiensiyas djudias, su akuzasyon ke los avlantes “malogran relasyones entre los djudios i el publiko” es una malentendida. Personas avlan sovre la istoria kompletamente para mijorar muestro payis; porke lo amamos. Sin mirar a la istoria en su kara no van aver trokamientos hich.



La malkerensiya verdadera kontra la Turkiya i su futuro, i de muestra komunita, es mintir sovre muestra istoria i fabrikar una fabula de relasyones totalmente “tolerantes.” No ay menester de toleransiya de los turkos o de dingun otros. Ay menester de sivdadania (o nasyonalidad) igual ke meresemos. I no la obteneremos si no la demandamos.


Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon