MAL EN EL KONTRATO SOSYAL

(Teksto-Odio)

(Yazarı sesli dinlemek için tıklayınız)

Ben Gurion kuando anonsyo la kreasyon de Israel tomo 2 dechiziones yerradas ke mozotros los israelianos estamos pagando karo en muestro tiempo. La primera fue de dar a los arabos ke no fuyeron en 1947 el derecho de sivdadinos sin ovligasyon de servir en la aramada i la segunda de a dechar a los haredis, en akeya epoka en chiko nombre, de rijir sus vidas sosyalas komo en el tiempo del mandat Inglez, ma kon el derecho ke las yeshivot seyan ofisyalizadas i ke sus elevos no agan servisyo militar. La vizyon de akel tiempo de los padres fondadores ke fue de kurta memoria en el pensamiento de la organizasyon sosyala del payis kavza el rezultado difisil en frente del kual mos topamos. Estos dos elementos de la sosiedad israeliana ke reprezentan enjuntos el un tierso de la povlasyon aktuala no partisipan del todo al esforso de la kollektivita. No pagan dasyos i no van a la armada.

Sea de doktrina de siedra kom de derecha el sitadino djudyo en Israel, kaza nasyonala del puevlo djudyo, siendo sionisto ke kere dizir nasyonalisto no podera mas areyevar las dichas i las deklarasyones de los deputados arabos en la Kenesset, simbol de la demokrasia, a ke kondanen sistematikamente todo modo de akordo de pas kon los payizes arabos, a inyegar el sionozmo, la Shoa i mas, en inflijendo los derechos de los palestinianos. Bien entendido, de la povlasyon muzulmana, elimino de esta kategoria de deputados los Druzes, los Cherkezes i siertos de los Beduinos komo siertos arabos israelianos ke veramente se adaptaron a ser buenos sitadinos israelianos i luchan por su independensya. Ma esto no reprezenta ke un pursantaje chiko de la povlasyon aktuala araba.

Ademas kon la pandemia del Covid-19 los haredis ke reprezentan oy serka el 12 por siento de la povlasyon del payis kontinuan a no aplikar las reglas de enserramyento del governo israeliano. Todas las sektas en akordo komun no respektan ke solo los ordenes ke los lideres rabanim les dan. Un modo de governo ariento del governo ofisial , ke se permete malgrado las leyes fondementalas de no respektarlo. Eyos pensan ke las leyes del payis no son kasher i no se deve someterse a eyas. Enfrente de la pandemia las mizuras tomadas por la otoridad sanitarya no se aplikan ni en Mea Shearim en Yerushalayim, ni en BeneiBrak en Tel Aviv ni en Sfad ni en diversas otras partes de Israel. Eyos pretenden ke en orasyonando sovre la Tora durante sus vidas están partisipando a la proteksyon divina de la komunidad majoritarya djudia, koza ke abasta para no partisipar a la vida ekonomika , defensiva i sanitarya del payis.

Estos vistidos de preto kontinuan komo nada se esta pasando en el mundo a arekojerse en grande nombre en la sinagogas sin respektar los ordones de la polisia, de kontinuar a organizar bodas i funerales kon miles de djente, onde son uno en driva del otro, a kontaminarse fasilmente del virus i no dar importansa a los miles de muertos mizmo haredis . Mal para eyos es mal para el resto de la povlasyon ke sufre de esta pandemia malgrado la ashlama(vaksin) ke kontinua a ser echa a una kadensya regulara. Es justo de pensar ke los lideres haredis en no forsando a sus dichiplos a konformarse a los ordenes de la polisia están kometiendo un omisidyo i ke esto kedara en sus konsensias.

No es fasil de entender i de juzgar un primer ministro komo Netanyahu de alevantar su telefon para yamar a un rabino haredi i para rogarlo a ke entervenga en dando a entender a su nono líder haredi de dar orden a su sekta de sotometerse a las reglas de enserramyento. Eske el governo israeliano nesesita el ayudo de un intermedyaryo para aplikar la ley? Esto prova ke la politika politisyana en Israel permete de azer yerros istorikos. Penso ke esto es una mala dechizyon del primer ministro, i ke deve ser kondanada.

Los haredis, espesialmente los ooliganos de la sekta Satmar Hassidim, en los dalkavos días pujaron sus violensas i echas malas fin a kemar un otobus,romper butikas i echar piedras a los polises ke miravan de dispersarlos. Las televizyones israelianas dieron estos akontesimientos en sus notisyas, koza ke mos dyo la sensasyon de una”intifada haredi”. Impardonavle esta manera de komporto ke se deve kondanar kon fuersa.

Grasias a sus deputados en la Kenesset ke son en totalidad 16 miembros menasan al primer ministro israeliano de kualker partido politiko ke sea de votar kontra el, o de no partisipar a su governo, si las organizasyones de las yeshivot no resiven grande apoyo material. Ademas el individual haredi por tener famiya nombroza i no lavorar para poder estudiar! la relijiyon resiva kompensasyon alta de la sigurita nasyonala. Fin a kuando la mentalita demokratika de este payiz permetera este shantaj ke no es etikamente achetavle.

El sivdadino nasyonalisto relijiozo, el konservativo i el non relijiozo, después de koryer a defender su payis i estar en la armada munchos anyos, en sakrifikandose por su patria, en pagando dasyos altos, en lavorando duro para mantenerse ve kon dedenyo ke kon su dinero a traverso el governo, los haredis biven en no serviendo en la armada. Mas mal una minorita de entre eyos, komo los de Naturei Karta ke inyegan el estado de Israel i se ajuntan a las manifestasyones de los inimigos del estado mos danyan muncho en la arena internasyonal. Mos demandamos komo la mayoriya sekulara del payis no se marginaliza enfrente de esta situasyon i no se soslevanta? Un verdadero mirakolo!

Ma fin a kuando este senaryo kontinuara? De mi punto de vista digo ke ya vino el tiempo en esta perioda de muevas eleksyones de azermos akavidozos a estos problemes en eskojendo los deputados idealistos ke serán kapaches de reglar esta situasyon una vez por siempre. Eskaparemos de barir lo suzyo debasho del tapete i mos komportaremos kon fuerza a reglar este fenomeno non justo i non demokratiko.