LA MIRIKIA DE HERZL PERDURA

(Teksto-Audio)

(Yazarı sesli dinlemek için tıklayınız)

Siendo optisimisto, pensó ke la egzistensya del puevlo djudyo, durante miles de anyos, siempre fue en perikolo i kon la kreasyon de Israel, este uniko fenómeno va despareser. Malorozamente kon tristesa veygo ke después de 74 anyos de la egzistensya del uniko payis djudyo el perikolo, en diya de oy, persiste dainda, por ke kuantidad de umanos en el mundo kontinuan a ser ereditermente antisemitos i ke miran a destruirlo. Siertos de eyos mizmo sin aver renkotrado un djudyo en sus vidas se deklaran antisemitos. En el Seder todos los djudyos del mondo se akodran ke en kada jenerasayon sale uno ke mos kere destruyir. Esta menasa se repeta de jenerasyon en jenerasyon. Komo antes dos semanas komemorimos el Olokosto, la dalkavo tentativa onde 6 milyones de muestros ermanos fueron depedridos.

Hertzl en su vida no se aresto de pensar afin de topar una solusyon al antisemitizmo sovre todo el evropeo i en los anyos 1890 empeso a ser alarmisto sovre lo ke pode akonteser a los djudyos en este kontinente. La sesudeza de akea epoka a la kuala Hertzl se ajunto, era de pensar ke kon la sekularizasyon de la povlasyon kristyana la inimista vieja kontra el djudyo iva despareser. Ma el se rendyo kuento presto ke esto era una utopia i konkluo ke la inimista evropea enverso el djudyo es kronika i ke troka de facha kon la evolusyon del tiempo.

Sovre todo, el djudyo evropeo oksidental resivyendo derechos de sivdadino, se emansipo presto, konkerensyo el goy en su lavoro i se enrikesyo lo ke kreyo el antisemitizmo ekonomiko. En akea peryoda siertos antisemitos se deklararon no kerer aborreser los djudyos ma ke sus dezeyos era de reformlarlos. Mizmo Hertzl i siertos djudyos poderozos se kreyeron en este modo de transformasyon, koza ke no dyo resultado ma ke al kontraryo izo pujar la inimista. Los anyos pasando en el 20eme siglo la inimista pujo tanto ke en la konsensya evropea el antisemitizmo se enrezyo i el kual avyo el kamino al jenosido de los djudyos su forma de doktrina de estado.

En muestro tiempo el antisemitizmo no es mas un perikolo egzistyente para la uma djudiya. No egziste mas una institusyon apuyada por un governo ke mira a matar djudyos komo fue el kavzo en la istorya. Deves en kuando, individualmente un djudyo pode ser atakado ma esto no será nunka un kavzo danjorozo a la sovrebiviensa del djudaizmo.

Por tanto se avla en muestro tiempo moderno, de una ‘okupasyon de territoryos,’ dicha ke la sosyeta antisemita oksidentala se apatrono del palestianizmo i se la izo suya, sin tener dingun sentimiento enverso los arabos. El solo buto siendo de meter en defikulta a Israel en la medya internasyonal en kondanandolo de ser un payis ‘okupador, kolonyalisto i apartheid’. Organizasyones internasyonalas komo las Nasyones Unidas, la Korte Kriminala Internasyonala i otras, finansadas en mayoriya por los payizes oksidentales tienen mekanizmas ke poden ser muy danjorozas enverso Israel, las kualas tienen la kapachidad de paralizar el fonksyonamiento de la administrasyon israeliana. La ekonomiya, el sistem seguritaryo, la vida sosyala se poden blokarsen si esta Korta menasa de azer arestar a los dirijentes, a los militares de alto grado i mizmo a los ke biven en Yehuda i Shomron topándose en viaje en el etranjero. Mekanizmos komo el PDS kontinuan a ser oyidos por los puevlos donde la mayoriya inyoran ke Israel vino a un nivel alto en su ekonomiya i ke el es achetado komo un buen haver por los payizes arabos importantes de la jeografiya en la kuala se topa. Ma komo Hertzl lo avia disho los governos son sumetidos a la volonta de sus puevlos, los kualos, oy en dia, son indoktrinados de manera a ke Israel es un payis okupador, imperyalisto ke se deve kombatir. El ajusto, si mizmo los djudyos son amados por los dirijentes(prenses) eyos no serán kapaches de protejarlos enfrente de los puevlos ke dirijan, por ke se espantan de ser aborresidos.

Dunke kualo kale azer? Hertzl avia disho en su repuesta a esta kestyon:” los djudyos deven retornar al djudaizmo, ser nasyonalistos i establisir sus payis”. El no avia dado dinguna importansa a la ‘hasbara’ (diplomasiya publika) por ke pretendyo ke eya no serve a konvensir djente ke pensan sovre sus dogmas. Koza ke egziste dainda en las sosyetades oksidentalas i arabas sovre las kualas Israel devra radikalmente mirar de trokar el imaje del judaizmo i del sionizmo a su avantaje. Lavoro difisil ke tomara muy muncho tiempo. Ansi se espera ke la egzistensya del puevlo djudyo perdurera, ma ke en mizmo tiempo la mirikiya de Herzl kontinuara.

DOĞTAŞ Artık İsrael’de… TIKLAYINIZ...

Yazarın tüm yazıları için tıklayınız