La memorya de Dona Gracia


Dyez anyos antes, el 500ten aniversaryo de Dona Gracia se selebro en Beit Hanassi.



Dona Gracia (Gracia Mendes Nasi) es de una famiya de maranos de orijen Aragon ke se fuyeron a Portugal, kuando la reyna Isabel i el rey Fernando ekspulzaron los judyos en el anyo 1492.



Munchos romanes fueron eskritos sovre Dona Gracia, ma Gracia entro a la konsiensya de los İsraelyanos, diez o kinze anyos antes.



El solo lugar en Israel, ande su memorya egzistyo por munchos anyos, es Tiberia, ande ay un ‘Dona Gracia Muzeo’. Este muzeo nombrado komo ‘Kaza Dona Gracia’ se topa en una parte del ‘Otel Dona Gracia’. Los proprietaryos de este otel son de una famiya sefarad, la famiya Amsalem, ke biven en Tiberia por munchos anyos, i ke tyenen raizes en Moroko i en Turkiya. La famiya Amsalem i la Munisipalidad de Tiberia, penaron munchos anyos para ke los israelyanos la konoskan a Dona Gracia.



Diez o kinze anyos antes, este muzeo organizo seminaryos, en la fin de semanas, sovre la vida i los tyempos de Dona Gracia. Geula Kohen (la ex-deputada de los oteles de Tiberia) fue tanto empresyonada de la estorya de Gracia, ke eya izo grande presyon al Ministerio de Edukasion para pueder enkluir el estudyo de Dona Gracia en los programes de las eskolas .



A la fin, Dona Gracia empeso a salir de los naftalines del pasado. Los elevos de lise, i los soldados empesaron a ambezarsen los planes ke Dona Gracia aparejo, para enstalar una komunidad judya otonoma en Tiberia, ke era la mas grande sivdad de Galile, i el mas grande sentro de la edukasyon judia, entre el segundo i el diezen siglo.



Diez anyos antes, la selebrasion del 500’ten aniversaryo de Dona Gracia se aviya selebrado en la prezensya del Prezidente Shimon Peres, Yitzhak Navon (Prezidente de la Otoridad Nasional de los Ladinos), Giden Saar (Ministro de Edukasion), Avigdor Lieberman (Ministro de Relasiones Eksteriores), i Dorit Beinisch (Prezidente del Tribunal Supremo), i tambien en la prezensia de munchos dignitaryos.



Peres aviya dicho, ke es mas fasil de alkansar a las alturas de la montanya Everest ke de alkansar a azer las kozas ke Dona Gracia izo. Eya reusho a azerse remarkar en la Evropa, i kon su rikeza reusho a enfluensar el sultan de Turkiya. ‘Gracia era una mujer muy jeneroza, i una grande lider. Eya fue la primera en su vizyon de una patria judiya’ aviya dicho Peres. Peres avlo tambien de los viajes de Gracia, konto komo eya salvo los judyos ekspulzados de Espanya i Portugal, i komo eya prokuro refujyo para los konversos. Gracia muryo kuando teniya 49 anyos.



Kuando Gracia nasyo, su padre le dyo el nombre Beatriz de Luna Miguis, i fue baptizada en Lizbon. Kuando teniya 12 anyos, Gracia deskruvyo ke eya no era de orijen kristiana, i ke era la ija de una famiya judiya. El nombre de su padre era Shmuel Nasi, i eya se yamava Hana Nasi.


Kuando vino a 18 anyos, su padre la kazo kon Francisco Mendes, kon una seremoniya en una eglizya katolika. Gracia no pudo entender komo su padre la kazo kon un kristiano, savyendo ke eran judyos. Ma, en poko tiempo, Gracia se ambezo ke su marido tambien era konverso, i izieron una segunda boda konfirmada kon la ley de Moiz, en İsrael. Gracia tuvo una ija, Reina. Malorozamente, Gracia peryo a su marido kuando teniya 25 anyos. Su marido le desho una grande rikeza, barkas, la segunda grande banka en la Evropa, i munchas paras. Gracia utilizo estas paras para ayudar a los judios. Grasias a la grande suma ke eya dyo al Papa, el establisimiento de la engizisyon en Portugal tadro buen karar.



Su ermana, de su selo, la denonsyo a las otoridades, ma kon la ayuda del sultan de los otomanes, Sultan el Manyifiko, eya fue liberada.

Gracia konvensyo el Sultan para pueder alkilar Tiberia, ande eya keriya konstruir la vyeja glorya judiya. Entremyentes, eya pago la konstruksyon de las Sinagogas, lugares de estudyo, lo menester por ke la presa ebrea kontinue a lavorar en Tiberia, en los lugares ande moravan judyos.



Gracia embiyo mas munchos judyos a bivir en Tiberia, i pago para ke seyga la sivdad de muevo konstruida. La konstruksyon de la Muraya del Sur fue kompletada en poko tiempo. Gracia teniya la entisyon de emigrar de Turkiya a la Tierra Santa, ma malorozamente muryo antes ke puda realizar este dezeyo.

Dona Gracia salyo a la luz duspues de tantos anyos. Esperamos ke va reflektar su luz ensima de los mansevos, i va aklarar sus kaminos.


Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon