Kerida Muerte Arsiza


Kon un amigo, desidimos de meldar endjuntos la romanso Kerida Muerte Arsiza (Sevgili Arsız Ölüm) de la autora Latife Tekin. Antes ke mi amigo la mensionara, nunka avia oído de Latife Tekin o de su korto romanso ke eya aviya eskrito kuando tenia solo ventidos anyos. Me disho ke su stilo es semejante a Marquez i al realizmo majiko de la literatura latinamerikana i esto me konvensio porke so un gran admirador de Gabo.



Kerida Muerte Arsiza es una novela otobiyografika. Tekin mos konta sovre su chikez en un kazal anatoliana i komo se engrandesio en una maale prove de Estambul. Es una istoria de una famiya i la persona prinsipal es la madre kontroladora Atiye. Sus ijos Halit, Seyit, Mahmut, sus ijas Nuğber i Dirmit, su marido Huvat, i su novia Zekiye estan alderedor de eya. Los akontesimientos de la istoria son majikas. Un tiempo, una djadiya ke ataka solo los ombres venia al kazal i los ombres espantados se eskondian todas las noches en sus kazas. Solo las mujeres kontinuavan sus vidas sosyales i salian en la noche durante este episodio. De otra parte, todas las mansevas del kazal kayen hazinas kon kayedes. Kon elementos majikos Tekin komenta sobre las diferensias entre ombres i mujeres.



Su lingua es komo una lejenda turka i trava el lektor desde una parte a otra. Las frazas son simples i no son muy largas. A vezes sus biervos son muy kuriozos, ke no oyí en las sivdades i no estan definidas en el internet. Deskrive la inyeve komo ‘inyeve de perro’ o por repetir la mizma idea eya uza ‘arrodear esta palavra a su lingua.’



Su kazal es una shena de munchas kozas majikas ma también elementos de la istoria moderna de Turkiya; el govierno avrio una mina o una eskola o el padre de la familia sentral trusho un otobus. Ma todas las inovasyones eskapan sin muncho provecho. La mina kolapsa i mata los argates, los maestros de la eskola no se kedan muncho o no mas de un anyo, i el otobus es abandonado. Los trokamientos modernos en djeneral no kavzan nada. La ija Dirmit tiene eksperiyansiyas majikas – avla kon las yervas, los siyelos, la huente de agua, Estambul, la mar, i munchos i munchos mas objetos. Su mama avla kon el andjelo de muerte. La majika esta kazada kon realidades ekonomikas duras. En la sivdad, ande la tualet es en la guerta, la famiya trata kon batallik kronik. Kuando uno o dos de los ombres tienen lavoros, es en konstruksiyon. El padre no lavora muncho i los ijos lavoran irregularmente.



La narativa de Kerida Muerte Arsiza es una perspektiva muy ermoza sovre una eksperiensiya muy komun en Turkiya – de deshar el kazal, sovrebivir en una sivdad ke no vos kere – ma asta este romanso no aviya meldado una tala istoria kon una deskripsiyon tan rika i del punto de vista de una mujer. Ay muncho mas de dizir sovre la istoria de Tekin – sus komentariyos de relijion, Islamizmo en los sesentas i setentas, la eksperiensiya de los Kurdos ke estan kazados kon Turkos, relasyones kon Armenios en el kazal i en la sivdad – ma kero deshar esto todo para ke puedash deskuvrir.




07.02.2021


Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon