HÜRREM SULTAN


Las madres de munchos Sultanes eran de orijen etranjero; gregas, bulgaras, rusas, fransezas (naturalmente kristianas o judiyas). Kuando uno de los ijos de estas mujeres se aziya Sultan, eya se aziya “Valide Sultan” (Madre del Sultan). Duspues ke estas ijikas (ke eran lo mas esklavas), entravan al palasyo del Sultan, les trokavan los nombres. Kuatro de estas madres eran judiyas.

Yo vos va eskrivir sovre Hürrem Sultan porke eya era una de las mas famozas i puederozas mujeres del Imperio Otomano. Hürrem Sultan (1506- 1558), yamada Roksalane en Evropa, era la mujer de Kanuni Sultan Süleyman (Süleyman el Manyifiko ), i la madre de Sultan Selim II (Selim El Blondo).


Hürrem Sultan (Alexandra Lisowska) era una esklava ke fue fuyida de Ukranya en una ekspedisyon del Sultan. Aleksandra era de una famiya judiya de Polonya. Duspues ke entro al palasyo, eya empresyono el Sultan kon su ermozura, intelijensya i kapachedad. A la fin, Hürrem reusho a kazarse kon el Sultan kon un kazamyento legal. Este kazamyento fue el primer kazamyento legal en el Imperio Otomano. (La sinyifikasyon de Hürrem es “alegre”).


Hürrem Sultan tuvo una grande influensya sovre los echos interyores del palasyo; eya dirijo las mujeres en el Harem. Eya tuvo tambyen una grande influensya en la politika interyor i eksteryor del Imperio Otomano. Aparte de sus okupasyones politikas, Hürrem partisipo a la fondasyon de munchos edifisyos publikos, empesando de Mekke fin Yerushalayim. Estas fondasyones fueron: ospitales por mujeres esklavas, eskolas, fuentes, un hamam en Estambol (Haseki Hürrem Sultan Hamamı), i mishkitas .


Hürrem enspiro munchos artistos, i fue el tema de munchas ovras artistikas en Evropa. Un ermozo portre de Hürrem Sultan se topa en la Galeria Uffici, en Firenze, Italia. Otras ovras muzikales fueron kompozadas por eya; una sinfoniya de Haydn, una opera de Sichynsky, un ballet, romanes i ovras de teatro.

Hürrem Sultan era tanto kapache ke eya reusho a pasarlo a su ijo Selim II al trono, i lo kazo kon una ijika judiya (Rashel) ke tomo el nombre Nurbanu (“reyna ke reflekta la luz del Dio”). Rashel fue fuyida i vendida a un merkader de esklavos en Pera a la edad de dyez anyos. Un enkargado del Sultan la merko i la yevo al palasyo para servir en el Harem.

Esta ijika flaka i sin fuersa, reusho a empresyonar la Valide Sultan (Hürrem Sultan). Hürrem Sultan la embiyo a Manisa para ke tome una edukasyon buena. Anyos duspues, en una vijita a Manisa, Hürrem Sultan la rankontro, i desido ke seyga la mujer de su ijo, Selim II. Sultan Selim II la vido a Nurbanu la primera ves el diya de la boda, se namoro de eya, i eskrivyo por eya las mas ermozas poemas de la Literature Otomana.


Hürrem Sultan muryo a la edad de 52 anyos, i fue enterrada en una tomba ke yeva su nombre, en la mishkita de Süleymaniye en Estambol.

La primera de las otras tres madres judiyas de los Sultanes eran Ayshe Hafza Sultan (Rashel), la mujer de Yavuz Sultan Selim i la madre de Kanuni Sultan Süleyman. La sigunda era Hatice Muazzez Sultan (Eva de orijen Polako), la mujer de Sultan Ibrahim i la madre del Sultan Mehmet IV. La tresera era Bezmialem Sultan (“fyesta al mundo’’). Bezmialem Sultan era la mujer de Sultan Mahmud II, i la madre de Sultan Abdülmecit.


Estas sinko mujeres puederozas reusheron a empresionar los Sultanes; eyas fueron mujeres de valor ke fueron respektadas en el palasyo i enfluensaron los echos interyores i eksteryores del palasyo i del Imperio.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon