Flory Jagoda


El mundo de la musika djudeo espanyola pedrio ultimamente una de sus mas sovresalientes figuras kontemporaneas. Esto avlando de Flory Jagoda, konosida komo la NONA amada del mundo musikal djudeo espanyol. Flory nasio en Sarajevo, Bosnia en el anyo 1923 i gano fama komo una de las importantes figuras ke ovro enerjikamente no solo para prezervar sino ke tambien para azer arribivir la kreasion musikal del patrimonio i de las tradisiones Djudeo espanyoles. Kon su personalidad tan amable, su talento musikal, sus kapasidades teatralas i literarias Flory Jagoda sera akodrada i nombrada kon apresiasion por munchas jenerasiones.



Kantadera, kompozitora, gitarista i akordeonista Flory Jagoda ovro enerjikamente para prezervar la musika i la lengua ke eran su erensia Sefaradi.



Jagoda nasio en Sarajevo, onde su famiya moro durante largas jenerasiones. Su famiya, desendiente de expulsados de Espanya en el 1492, se aresento, en segito a la expulsion, en Estanbol i mas tadre yego a Sarajevo. En su kaza Flory avlava el Djudeo espanyol i se ambezo los kantes del folklor musikal Sefaradi de su avuela.



Algunos de los kantes ke interpreto eran kantes liturjikos i otros sekulares ma kaje todos segun la tradision de los Balkanes i el estilo konosido komo "sevdalinka" komo por exemplo el kante "La Kapara".


https://www.youtube.com/watch?v=ujdavp6RQOw


Flory era una djoven en lo ke esbrocho la segunda gerra mundial. Su padrasto la mando a Italia basho un nombre falso Kristiano i le disho de tanyer su akordeon para distrayer la atension de la djente i realmente el konduktor del treno fue tan impresionado por su musika ke no le demando de ver su bilyeto. I es ansi ke Flory estava segura ke la musika le salvo la vida.

En Italia, eya s'ennamoro de un ofisier Amerikano Djudio, Harry Jagoda i los 2 yegaron a EEUU en 1946 onde establesieron sus propia famiya. Su madre i su padrasto tambien reusheron a fuyirsen i sovrebivieron el holokausto. Eyos tambien imigraron a EEUU 2 anyos mas tadre.



Despues de munchos anyos Flory deskuvrio ke la mayoría de su famiya en Bosnia avia sido asasinada, enkluso su nona amada. En una entrevista ke akordo al museo del Holokausto en 1995 eya apunto ke 42 de los miembros de su famiya; la nona, sus ijas sus inietos, los bebes- todos fueron asesinados en los kampos de exterminasion. Todos los kantes i la kultura tambien fueron asasinados segun sus palavras.


En los EEUU Jagoda kanto i ensenyo; ma al prinsipio no kantava en djudeo espanyol porke su madre no le permetia de kantar estos kantes ke le akodravan su pasado. Es solo despues de la muerte de su madre i su padre ke Flory empeso a interpretar kantes en Ladino i en lo ke empeso a kompartir su tradision, ningunos no podian frenarla. Eya no solo kanto en Ladino sino ke tambien fue muy aktiva organizando enkontros de Ladino avlantes ke sus famiyas yegavan de Bosnia, Gresia, Bulgaria i Turkia.

Flory siempre nombrava a su nona ke le dizia ke si no mete su espirito i su alma a la musika no vale la pena kantar.


Seguramente ke Flory Jagoda sera akodrada mas por su kante de Hanuka, Ocho Kandelilkas ke devino el símbolo de esta fiesta en el mundo entero. Este kante fue interpretado en el mundo por diversos kantadores i komo fue apuntado por eya misma, sea este kante i sea los otros kantes ke interpreto fueron dedikados a la famiya ke pedrio en el holokausto.

"Todos los kantes ke eskrivi sovre las fiestas, son para eyos ke estan kon mi, ke estan kon mis kriaturas, kon el publiko ke me eskucha."



Este es el legado (miras) de Flory Jagoda.


https://www.youtube.com/watch?v=BeS46weU4ZI



Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon