ESPARTIMYENTO DE LA SIRIA


(Teksto-Audio)

(Yazarı sesli dinlemek için tıklayınız)


Manyana fiestaremos la endependesya de Israel, diya de alegría nasyonal ke mos akodra el sionizmo de muestros padres fondadores. Por esta razón, keridos lektores, desidi de no eskrivirvos, sovre la posibilita de la formasyon de un muevo governo ke parese a un imbrolyo sin fin. Las entrigas i las kombinas politisyanas no se eskapan, kaji un kilometre de artikolos ya se eskrivyeron a este sujeto en la media israeliana i internasyonala, pensó ke no tengo muncho de ajustar.


Por kontra kero darvos mi sentimiento al sujeto del vizino, la Siria ke se topa en este momento en partida debasho de la otoridad de Bashar El Assad i de las potensias etranjeras ke la okupan sin demandar a los sirianos si están de akordo o no. Aktualmente un silensyo danjorozo reyna en el payis onde Assad i Putin son los prinsipales aktores. Bien entendido eyos miran a protejar la minoridad alauita i gerreyan kontra los sunnitos sirianos ke reprezentan la mayoriya de la povlasyon. Dezde 47 anyos la famiya Assad de padre en ijo, de orijin alauita, se sientyeron patrones de manera diktatoryal de la mayoriya sunnita ke es el 70 por sien del pueblo. Komo una minorita de alauites ke no reprezenta ke el 15 por sien de la povlasyon se apatrono del payis kon una mano de fierro, koza enigmatika, ke poko de espesialistos politikos penan a darmos una repuesta aklarada.


El monopolizmo politoko, las enormes matansinas, el egzilo forsado, la desposesyon de los bienes de milyones de sunnitos dezde 11 anyos no abastaron a destronar Assad siempre asentado en su palasyo de Damas. Assad sin duvda en la istorya moderna mato muncho mas arabos de kualker otro inimigo de la uma araba. El dezenganyo es tanto grande ke los patrones de la revolusyon i los shefes de la gerilla no topan una formula kon muevas ideas ke los unira . Entre eyos la sola idea ke izo su kamino es de espartir el teritoryo sovre los alauites , los sunnitos, los kurdos, los druzos i dar siertos derechos a las minoridades kristyanas. Un jinero de federasyon a la kuala no tenyendo ayudo de los amerikanos i de los evropeos no será posible de alkansar a un resultado.


Oy si se djuzga bien, se ve ke el buto de Assad es de kedar absolutamente en poder i por esto poko le importa la manera de venser a sus inimigos. Imitando Franko ke avia bombardado kon la avyasyon alemana nazista las sivdades del norte de Espanya en matando sus kompatriotes, Assad desidyo kon la asistensya de Putin a azer la mizma koza kon la avyasyon rusa en matando miles de sunnitos en la zonas del este del payis. De otra parte aziendo una propaganda de intimidasyon i de espanto el reusho a ke ayga un grande fuyido de los sunnitos verso la Turkiya, el Lebanon i la Jordania i dyo su akordo para ke los Iranyanos traygan un grande nombre de shiitos a los lugares abandonados , ansi mirar de despoplar el payis de los sunnitos. Koza ke en parte reucho.


Putin en estos dalkavos días miro de ser manko sinik en ofresyendo una mueva formula federativa para unir a todas las partidas del konflikto, onde siertos de los poderes de la prezidensya serian transferados a la fuerza lejislativa i ansi lejitimizar la opozisyon i las minoridades del payis. Esta ofra inyervo terriblemente Assad, ke tomo el risko de arrondjar la propozisyon rusa, en aziendo aravyar a su patron Putin. De otro lado las otras partidas del konflikto están debasho de la dominasyon etranjera komo en el norte del payis okupado por la Turkiya ke ve los Kurdos komo inimigos en forsando 200000 de eyos a ser egzilados al sud de sus tyerras. Lo interesante es ke los aliados de los Kurdos en la lucha kontra Daesh, los Estados Unidos presente, decharon azer sin intervenir. De sus partes los Iranianos miran de aserkarsen de la frontiera kon el Golan afin de atakar Israel. Bien entendido este muvemento keda sin resultado por ke los proksis iranyanos son aharvados dia i noche por la avyasyon israeliana.


Todos estas potensyas ipotekaron la Siria en dezvelopando una tragedia a la kuala los ermanos arabos kedan silensyozos i no dechan a ke la Liga Araba kontrolada por el Ayifto i la Arabia Seudita se meskle, kuando eya sola pode konvenser a la povlasyon sunnita a mirar de organizarse en el este de la Siria en trayéndoles el ayudo finansial i la agua ke nesesiteran para enfloreser el dizierto en el kual uzan bivir. La evropa de su parte no responde a la yamada dezesperada de los sirianos en mankura de todo; los diplomatos evropeos tanto ke Assad esta en poder no keren ayudar a este payis mizmo ke milyones de refujiados sirianos pasaron las frontieras de la unyon.


La povlasyon Sunnita es la mas sufrida de este embrolyo, kaji 13 milyones de eyos biven oy en dia en egzilyo, donde los 6 milyones enserrados en el sud del payis. Si eyos un dia serán kapaches kon la proteksyon i el ayudo de la Liga Araba a aresentarsen en la zona este de la Siria esto ayudara muncho a Israel porke formaran un tampon importante kontra el Iran.


Entremientes la ekonomiya de la Siria esta destruida i la Rusia no tiene la posibilita de trayer milyardas de dólares para poder ayudar a su rekonstruksyon i los evropeos no keren ke Assad se meta en su aldikera el ayudo ekonomiko ke darán. La solusyon a esta gerra entre sirianos a mi avizo, pode ser relizada si los 2 patrones arabos de la Liga i si la Rusia achetan de un komun akordo a likidar el poder de Assad. De esta manera se podera azer un payis Alauit al oveste, un otro sunnito al este, en rekonosiendo una otonomia a los Kurdes del norte. Los sunnitos siendo los mas dinamikos eyos poderan fraguar sus payizes en poko tiempo, en dando a todas las partes interesadas a ser ganyantes. La Turkiya ekonomikamente tiene muncho a ganar de la rekonstruksyon del muevo payis, los Kurdos serán ayudados por seguro por los amerikanos, i los evropeos djuntos kon los rikos arabos no mankaran de investir en el payis. La esperansya ke Israel tiene es ke la mueva entidad sunnita aga la pas kon eya.

Bizi Takip Edin
  • Facebook Basic Square
  • Twitter Basic Square
  • Google+ Basic Square