top of page

ECHAR İ NO DURMİR, ASPERAR İ NO VİNİR, AZER İ NO AGRADESER





Por siguro ke son muy djustos todos los proverbos i las dichas. Ma para mi echar i no durmir es lo mas negro. De unos kuantos anyos para aki el esfuenyo de la noche no lo tengo muy famozo. Afilu ke me echo byen tadre yene me alevanto demanyana muy demprano i si durmi kuatro u sinko oras sin espertarme digo baruh ashem.


Ya lo se ke estash diziendo esto es vejes, si ya lo se muy byen.

Es kuryozo agora ke no tengo responsabilita de mandar ijos a la eskola i aparejar dezayuno, me esperto sin alarm demanyana matrana. Akeos tyempos me akodro en etervalo de los dos servises ke viniyan a tomar a los ijos para yevarlos a la eskola, aviya 6 puntos de diferensya, yo por 6 puntos me echava de muevo i me durmiya. Kijo dizir esto es la vida.


Una demanyana me alevanti ke me va ir a ver a mi inyeto el chiko. Tomi el kafe ke uzo, me visti, el tyempo esta maraviya desidi de yevarlo a kaminar. Sali a kamino, apenas paso 5 puntos empesa una luvya sesta avyendo los syelos. Asperando otobus dyeron anons ke el otobus se bozdeyo en el kamino, apenas en una ora puede vinir otro. Pensi kon esta luvya tomare un taxi, ande ni un taxi no ay por semejansa, todos yenos i no mestan tomando. Alora dishe tomare la araba, torni a kaza avri la chanta, komo no iva tomar araba no tomi la yave. Suvi a kaza, avri la chanta kon la adjile ke sali, me olvidi de tomar la yave de kaza. Abashi ande la vizina ke tyene la yave de mi kaza, sono sono no ay dingunos. De muevo sali a kamino neysa ya topi un taxi, me suvi, el shofor empeso a gritar ke la araba es mueva, ke le esto mojando los koltukes, ke ay trafik, de vista ke abashe. Empesi a arogarle ke no me abashe, le dishe mi ermuera lavora, mi inyeto va kedar soliko kualo ay yevame. Dospues de una ora ya rivi ande mi ij, aryento las aguas, avri la chanta, kon este telash paras no tomi. Le dishe aspera tomare de mi ermuera te pagare, yene empeso a gritar a mentar, en diskutyendo kon el shofor veyo ke mi inyeto se esta abokando por la ventana i me esta yamando;

-Babaanne babaanne (safta) …Ya se va kayer. Por aki el shofor me esta maltratando por aya mi inyeto se esta abokando se va kayer, mi ermuera ya vido ke vine de vista se suvyo a su araba me disho bay bay i se fue al echo ke ya kedo tadre.


Kero gritar ke no se aboke, no mesta salyendo la boz, kero piyadade, un alay de djente uno pasa otro torna, dingunos no mestan vyendo.


Enduna me esperti kon una palpitasyon, aryento la sudor, el garon tomado, kedi durmyendo en la kanape de la kamareta de asentar. Bendicho el dyo era un mal esfuenyo ke vide, ma el dia entero estuve kon la enfluensa de este koshmar malo.


Keridos ermanos esfuenyos buenos veyamos. Agora vini meteremos la meza del seder de Pesah, mos alegraremos i konsyenteremos este moed de salvasyon, azeremos lores ke estamos en muestras kazas, sanos i rezyos, rogaremos pas amor en el mundo i en los korasones amen.


HAG PESAH SAMEAH.








Comments


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page