ENTENDER LA VIZION ARABA

(Teksto-Odio)

(Yazarın yazısını sesli dinlemek için tıklayınız)

Kon la sinyatura de los akordos de Washington un muevo kapitolo se esta dezvelopando en el mundo arabo. Este dezvelopamiento de ver las realidades del diya en la mentalita de la kaye araba no es tanto muevo, ay 10 anyos después de la ‘primavera araba’ ke reboltoneyo el Medyo Oriente el nasyonalizmo rejyonal iso su kamino i los arabos empesaron a interesarse de serka a sus payis en los kualos biven. El entereso de la uma araba unida sin frontyeras peryo de su valor, i la idea ‘kada uno por si’ izo su kamino.

La kavza palestiniana ke era el motivo prinsipal del nasyonalizmo arabo i de la relijyon muzulmana por la kuala 24 payizes muzulmanos durante 70 anyos gerreyaron kon grande inimista kontra Israel, ampesaron a entender ke las kozas trokan de aspekto i ke no achetar Israel en la jeografiya del Medyo Oriente no es mas posivle. La politika araba de ayer fue bazada sovre los prensipyos de la relijyon muzulmana, la rekonkista, el cihad de la Palestina. Durante todos estos anyos un ideal personal relijiozo fue kreado por milyones de arabos ke los uniso a la idea de destruyir la entidad siyonista i de echar a la mar los djudios sin tener piadad komo lo ke akontensyo en los anyos entre 623 i 627 en la península araba. Ma esto parese en muestros diyas komo estravagante, non realisto. La prezensya konsistiente de los intelektuales antisionistos ke formaron i forman la doktrina moderna del nasyonalizmo arabo, la ideolojiya revolusyonarya sekulara araba, las ideas utopikas de los ermanos muzulmanos, el djihadizmo salafisto, el islam shiit iraniano i las viziones neo otomanas de la Turkiya todos estos muvimientos se ajuntaron para ayudar i indoktrinar a los teroristos palestinianos. Todo esto kreyo i kreya la baza del antisemitizmo i antisionizmo en el mundo muzulmano kon el kual Israel se afronta kon determinasyon i pasensya para venserlos. El statuto de la Palestina araba munchos lo asemejavan al mistisizmo djudio i dizen ‘’kuando el Mashiah va vinir la Palestina entera se liberara’’.

La deskonfiensa patolojika ke egziste en las kavezas arabas ampesa a despareserse kon el konsentimiento de achetar Israel payiz non musulmano al seno del Medyo Oriente. Esto ayudara a ke la paranoya kontra el djudio se amingua una ves ke los arabos se renderan kuento de los benefisyos sosyo-ekonomikos i militares de los akordos echos kon Israel , kuando estos darán sus frutos bien endido . Mizmo los palestinianos finalmente entenderán ke el refuzo istoriko enverso Israel no va kontinuar a ser un benefisyo para eyos en el sieglo aktual.

Entre los arabos la kestyon palestiniana perye de su interés i se aze banal de notar ke esta kestyon no es mas la mas importante de la rejyon. La Palestina peryo de ser el sentro de las preokupasyones politikas después de la guerra sivil en Siria, del espanto kreyado por el Iran kon sus konsikuensas totalistaristas ke kreye en su doredor. Ademas el espanto de la introduksyon de la bomba atomika por este payiz, prinsipal inimigo de los arabos sunnitos i las ambisyones de supremasia de la Turkiya esperto la konsesya araba de arestar el largo kamino de destruksyon en el kual los dirijentes arabos se estavan indose.

Aktualmente los arabos están purfiyando a tener seguridad i stabilidad en sus payizes para poder desveloparsen. Ansi las monarkias kontinuan a urbanizarsen i a peryer inevitablamente sus karakteres trivoles, ke los forsa a modernizarsen politikamente. Este estado de trokar la manera de vida influensera de serka los otros payizes arabos mankos rikos de los reynados a demandar asistensya ekonomika para poder reformarse i alkansar el nivel de dezvelopamiento dezeado . Esto es una de las razones de keder aserkarse de Israel i de los Estados Unidos.

Ademas los dirijentes aktuales de los payizes arabos miran de aunarse en koalisyon i de renforsar sus atadijos rejyonal en forma de politika i defensya komun al lugar de la Liga Araba ke no serve mas. Ansi sus dependensias del apoyo militar amerikano sera amenguando i la rejyon será muncho mas protejada del Iran i de la Turkiya. Todas las konsikuensas fanatikas i destruktivas del Medyo Oriente eksplika klaramente la dechizyon del sheikh Mohammed bin Zayed, el príncipe del reynado de Abu Dhabi de establisir relasyones de pas entre Israel i los Emirates Unidos Arabos. Este eroiko personaje, korajozo no se espanto ni de los islamistos, ni de los shovinistos arabos ke lo akuzaron de infigar kuchiyo en la espalda del mundo islamiko i arebasharse enfrente del sionizmo. Ma pensó ke estos inimigos de la pas deven entender ke los rezin nasidos i los ke van a naser en la uma araba van a bivir kon muncha esperansa de ser salvados de las gerras i de tener mijor dias en sus vidas.

Para konkluir, dire ke las kozas fondemantales del statuto politiko del Medyo Oriente están trokando, ma estamos dainda en la faza de sus nasimientos. El bebiko parese muy luzyo, después de los feyos ke vinieron antes de el. I munchos politisyanos interesados a esta rejyon en sus vidas no se sonyaron de los dezvelopamentos positivos de estos dalkavos días, oyeremos i meldaremos sus opiniones en los mezes vinideros. En Israel devemos ser optimistos i alvidarmos , si posivle, las fantezias eskuras de los añyos pasados.