15 SEPTEMBRE 2020


(Teksto-Odio)

(Yazarın yazısını sesli dinlemek için tıklayınız)

Esta data pasara a la istoria del Medyo Oriente komo un dia de ‘paz’ entre Israel i los payizes arabos de su doredor. Grasias a la administrasyon de los Estados Unidos enkavesada por el prezidente Trump, grande amigo en muestros dias del puevlo djudio, akordos fueron sinyados en Washington entre Israel i los Emirates Arabos i Bahrain.. Trump fue kapache de konvenser a estos dos payizes del golfo Persiko a ke Israel seya rekonosido por eyos i a tener ansi relasyones amigavles de’ yure. Agora son kuatro payizes arabos ke achetan i rekonosen a Israel komo payiz djudio en la jeografiya del Medyo Oriente. En la Liga Araba egziste oy en dia inkluzo la Otoridad Palestiniana 22 payizes, dunke la lista es larga de los ke devran rekonoser a Israel. Se kere muncha pasensya i saverisyo diplomatiko para arivar a kompletarla.

Durante los mezes vinideros se va espekular, komentar i mizmo revizar las kondisyones politikas egzistentes de esta rejyon, ke pode ser seran trokadas en partida kon tiempo para demonstrar de una parte los efektos pozitivos de estos akordos i de la otra los negativos al nivel internasyonal. No se kere dicho lo ke los arabos palestinianos resenten en estos momentos, ke peryen de sus ermanos arabos, el apoyo sin kondisyon de sus politikas de gerra kontra Israel. Los prensipyos i la mantalidad de la siedra de los payizes evropeos, amerikanos i mizmo israelianos ke en regla jeneral soportan la kavza de los arabos palestinianos senten el shok ke proviene de estos akordos de paz ke son bazados sovre el prensipyo de ‘paz por la paz’ i no ‘paz kontra tyerra’. Una kayades sorprendida se remarka en estos manaderos ke peryen la facha en sintyendosen dezarmados.

El akordo de Oslo i sus konsikuensas, no aprovecharon a reglar el konflikto Israelo-arabo, i en Israel una grande majoriya regretan este akordo ke provoko la sigunda intifada i kedo letra muerta fin oy en dia. Entremientes, la doktrina de Benyamin Netanyahu esta azyendo su kamino i kon el ayudo de Trump si keda en poder después de las eleksyones del mez de Novembre 2020, el primer ministro israeliano pretende ke si la nasyon israeliana le da la fuersa de kontinuar a rijir los echos del governo kon una majoriya bastante ancha de la derecha el ayegara a firmar mas akordos de pas en el Medyo Oriente a la eksepsyon de los payizes del doredor eksterno de Israel a saver el Iran i la Turkiya dos payizes musulmanos non arabos, el uno shiito i el otro sunnito.

Estos dos payizes del tiempo de Ben Gurion eran amigos de Israel porke las relasyones se avian dezvelopadas espesialmente en el kampo de la intelijiensa de akeya epoka. El inimigo komun , El Soviet Ruso los forsava a ayudarse entre eyos. Koza ke no es mas valivle aktualmente. Kero dizir ke los amigos de ayer en supito se poden azerse inimigos.

Esto mos ambeza ke Israel no deve tener muncha konfiensa el los dokumentos sinyados, porke amista entre los puevlos es muy ralo, lo ke prime es el entereso de las partes. Amistades sin entereso no pode egzister entre los governos. Dunke el puevlo djudio en su istorya supo i save abokar kavesa i resilyarse para poder mentenerse en vida, esto le da una fuersa de achetar ke su amigo de ayer se transforme en inimigo de oy, i ser pronto para afrontarlo. Por esta razon todos los akordos echos kon los payizes arabos son suspechados de no turar. Una de la razon prinsipala es ke los payizes arabos en majoridad son dirijados por sheyhes o diktatores ke mizmo si son elizados poden ser revokados por un kolpe armado. El Ayifto, el Sudan, el Yemen i mas son los payizes ke trokaron de dirijentes en los dalkavos 10 anyos despues de kolpes militares.. En jeneral devo dizir ke mizmo los payizes del doredor eksteryos de Israel no azen eksepsyon a esta situasyon.

Ademas las viejas potensyas kolonialistas no keren ke la uma araba sea dirijada por governos demokratikos, a eyas no les konviene ke el petrol este en manos de personas ke no se sumeten al dikta imperyalisto. Estas mizmas potensyas kon el muevo aktor chinezo pensan ke dainda tienen el poder de azer i dezazer los payizes del Medyo Oriente, a la eksepsyon de Israel, la sola demokrasiya ke save defenderse desi para si. Sin el apoyo de los Estados Unidos, de la Rusia , en partida de la Britanya,de la Fransa i de la China ningun payiz arabo no pode alevantar kaveza i diktar sus kondisyones politikas. Lo ke se esta pasando aktualmente en la Siria, en el Irak,en el Yemen, en Libya i en el Libano son egzemplos ke se deven de tomar seryozamente en konsiderasyon. En esta rejyon dalkavomente dos muevos aktores aparesyeron, ke son el Iran i la Turkia, potensyas de sigunda klasa ma muy aktivas en Siria,en Irak,en Libya i mizmo en los territoryos palestinianos. En Gazza todo esta dirijado por los teroristos fashistos ke son apuyados por el Iran i la Turkiya. Sin el apoyo de la triumvera Iran-Turkiya-Katar en la kuala la ideolojiya de los Ermanos Muzulmanos prime, Hamas de muncho tiempo era kondanado a despareser. Esta mizma triumvera es la sola a ser kontra los akordos de pas entre Israel i los Emirates i Bahrein, koza ke parese estranyo mizmo en el mundo muzulmano arabo.

De otra parte la Liga Araba, la sola institusyon ke oryenta la politika eksteryora de los payizes arabos esta trokando el paradigmo ‘Israel es el inimigo’ en ‘se pode tener relasyones publikas kon Israel’. Durante la dalkavo sesión de esta institusyon, la semana pasada, de los ministros del eksteryor a traverso un zoom, la demanda de la Otoridad palestiniana de kondanar kon enerjiya el akordo de paz de Israel kon los Emirates Arabos fue refuzada a la unanimidad. Los palestinianos resivieron ansi una koreksyon ke les ambeza ke niegar la egzistensya de Israel no es mas aktual al seno de la Liga. Despues de 72 anyos de inimista finalmente los dirijentes aktuales de la diplomasiya israeliana ayegaron a sus butos, el rekonosimiento ofisial de Israel entre las nasyones del Medyo Oriente. Benyamin Netanyahu meresyo de sinyar los akordos de paz en Washigton.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon