EL “NO” PALESTINIANO

September 1, 2020

(Teksto-Odio)

(Yazarın yazısını sesli dinlemek için tıklayınız)

 

La rezolusyon de Hartoum vieja de mas de sinkuenta anyos dikto por muncho tiempo la politika araba kontra Israel kon los 3 NO, a saver : ‘NO a la pas’, ‘NO a la rekonosensya’, ‘NO a las negosiasyones’ prensipyos ke fueron trokados en 2002 kon el plano de ‘Paz Araba’, el kual a su torno  no tiene mas valor despues del famozo rekonosimiento de yure de Israel por los Emirates Arabos.  La politika araba aktuala enverso Israel esta teniendo muevos aspektos en favor de la achetasyon de este payis komo miembro del Medyo Oriente kon el kual nada falta a tener un dialogo.  El tema del paradigmo ‘Israel, es el inimigo ‘ se esta deperyendo  de dia en dia de las memorias de munchos politisyanos enteresados al konflikto Israelo- palestiniano.  Sovre todo los refraktaryos i los antisemites evropeos apuyando  los payizes muzulmanos i organizasyones teroristas arabas ke kontinuan a enyegar la egzistensya del payis independiente djudio estan debasho de un chok ke no les permete de espidir las muevas relasyones ke Israel esta kreyando kon los payizes arabos, kon los kualos no tiene frontiera komun o konflikto direkto.

 

 Komo el puevlo palestiniano ve las kozas aktualmente, es un sujeto ke devemos azer atansyon si keremos arivar a una paz en favor de Israel. El PLO, el Hamas i otras organizasyones teroristas palestinianas despues  del akordo de Oslo , tomaron un ayre muevo, en diziendo ke si Israel para azer la pas kon el Ayifto se travo de un grande territoryo komo el Sinay,  de ke no kerara enchikeserse a las linyas de 1949  i a achetar a ke los refujiados palestinianos retornen a sus kazales al interno de Israel i de espartir Yerushalayim en dos kapitalas.  Koza ke oy en dia no es pensavle del todo por ke esto kavzara la fin del estado djudio.

 

 Los palestinianos asigurados del suporto traido de una parte por la uma araba i muzulmana del mundo i de la otra por los payizes importantes  evropeos, malgrado ke fueron los ke peryeron  sus tyerras en gerreyando se kreen ke kon el ayudo de la diplomasia araba i de sus aliados,  kon el tiempo van a parvenir a sus fines a derokar Israel en asolandolo.  Todo modo de mintira sovre la istoria, la realita en el tereno i mas servira a justifikar sus deklarasyones. Eyos ademas pretenden ke si se regla el konflikto Israelo-palestiniano a sus satisfaksyones todos los problemes interarabos del Medyo Oriente se atakanaran. Koza ke nos es justa.

 

La realita es ke Israel no es el kulpavle del todo de los konfliktos ke tuvyeron lugar en esta jeografiya, komo por el egzemplo  el konflikto Irako-kuveytiano, las guerras internas del Libanon i de la Siria, el kolpo de Sisi kontra Los Ermanos Muzulmanos en Ayifto i mas..

 

Abbas fue el ke se travo de las negosiasyones en 2008 ke izo kon Ehud Olmert, el kual  se mostro  hovarda enverso del, su refuzo a achetar a negosiar kon Benjamin  Netanyahu en 2009, malgrado ke aresto las konstruksyones en Yehuda i Shomron,ke en dechando sin  repuesta al sekretaryo amerikano John Kerry por sus propuestas en 2014 son aktos ke no se alvidaran.  Al impesijo de este anyo Abbas deklaro mas de mil vezes ‘NO’ al muevo plano de pas de Trump. Agora la Administrasyon palestiniana arronja kon fuersa el akordo echo entre Israel i los Emirates Arabos, por el kual Abbas dize ‘ enfingaron un kuchio en la espalda de la Palestina i traisyeron mos derechos sovre Yerushalayim’. El grande mufti palestiniano publiko un dekreto (fetva) defendyendo a los muzulmanos ke arriveran a traverso de los Emirates a azer sus orasyones en la mishkita El-Aksa.

 

Abbas ademas izo pujar la inimista en yamando a un soslevantamyento enjuntos kon el Hamas pro Iraniano ke no se arepiente de sus dezeyos de ver Israel dispareser. De ke no azer mizmo un muevo jenosid? Tanto ke este sinyor no se arrepiente de los sozde derechos  de los palestinianos de retornar a sus kazales en Israel, de no permetir a los djudios de aresentarsen en Yehuda i Shomron, de no rekonoser la vieja sivdad de Yerushalayim azer partida de la kapitala de Israel, de  nunka  achetar Israel komo estado de los djudios  no se podera arrivar, a mi sentimiento a un akordo yelado de  paz duravle i a la aplikasyon del plano Trump para el establesimyento de un estado palestiniano dezarmado al lado de Israel.  La doktrina vieja ‘paz kontra tyerra’ no es mas aktuala  por ke los arabos sunnitos  entendieron ke esta kondisyon no se pode aplikar  del todo visto ke de fakto la situasyon aktuala kambyo enteramente. Los solos ke insisten a esta doktrina son los palestinianos, las konfrerias de los ermanos muzulmanos, el Katar, el Iran i la Turkiya , la mueva inimiga del akordo Trump.

 

Abbas akuza los israelianos de ser malos, kolonialistos,rasistos i  avla mintiras al sujeto de la destruksyon dechisada de la mishkita El-Aksa i de las eglisyas de Yerushalayim.  Koza ke no tiene nada de aver kon la realita. Ansi este sinyor no decha ninguna posibilita de poder asentar i tratar de un akordo entre los djudios i los arabos porke pretende ke los djudios no tienen ningun derecho istoriko sovre la tyerra santa. Enfin, Abbas es un infingador de kuernos en todo modo de propozisyon de paz, mizmo por los ke vienen de  otros payizes arabos o de la Evropa Unida, ansina es marjinalizado peryendo todo modo de kredibilta en Israel,  en los Estados Unidos i zero opinion favoravle en los payizes sunnitos arabos. Fina kuando esta politika podera kontinuar, esto es la kestyon ke los arabos palestinianos de buena velunta devran demandarsen de si para si.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon