Zoom: De los Sielos para el Ladino

August 18, 2020

 

Zoom, una maraviya teknika ke permete asta sienes de personas de reunirsen virtualmente, dyo i esta dando un grande estimulo al Ladino.  Programas de Zoom  sovre ladino van pujando de dia en dia en Internet, i estan atirando munchos seguidores. En estos dias ke estamos enserrados en kaza a kavza de la maldicha pandemia, la haveransa del Zoom kon el ladino es un regalo de los sielos ke mos traye munchas okaziones de reunirmos en un salon virtual, vemros las karas, saludarmos, i sintir kozas enteresantes, instruktivas, i munchas vezes divertimyentes.   En inglez dizen “it’s a marriage made in heaven”, es un kazamiento ordenado de los sielos, la del ladino i Zoom.

 

Este “kazamiento” esta dando rezultados muy reushidos. Los programas en ladino de la Itahdut – los de “Savor de Boka” kon mujeres i kon ombres, i el de Sara Kohen Yanarocak kon Kobi Zarko  –  resivieron munchas “vistas” ke los programas en turko. (Si no me kreyesh, anda a las gravasyones ke estan en Facebook i mira kuantos “views” tiene kada uno.)  De Arjentina, la veneravle institusyon yamada CIDICSEF (Centro de  Investigacion y Difusion de Cultura Sefaradi) me invito a avlar en uno de sus programas sovre Izmir i el ladino.  Yo no avlo (nunka estudyi) el espanyol-kastilyano; les avli en ladino a una audiensa en bivo de serka 276 personas. La gravasyon en Youtube tuvo asta agora 699 vistas i mas. (No tantos komo los miles ke miraron a los programas de la IYT en ladino, ma mas de los otros programas del Cidicsef.) 

 

Tambien tuvimos i tenemos kursos de Ladino. Mezo la Ermandad Sefaradi de los Estados Unidos, Bryan Kirschen ensenyo 5 semanas i yo ensenyi 6 otras  semanas.  Tuvimos de 100 asta 250 elevos! En Buenos Aires, Liliana Benveniste kontinua a dar lisyones de Ladino a avlantes de espanyol kada semana, kon grande reushita i munchos elevos. Esto todo, siguro, por Zoom.

 

Enkontros de Alhad: la seria enteramente en Ladino

 

I agora tenemos, desde dos semanas aki,  los Enkontros de Alhad ande se avla solo en ladino. Este projekto fue inisiado por Marcelo i Liliana Benveniste, fondadores de eSefarad i aktivistos del ladino en Buenos Aires, para dar una platforma  de avlar el ladino en konversasyon natural.  El program tiene lugar, komo es indikado, kada alhad, a las oras 13:00 de Buenos Aires, 19:00 de Israel, i konsiste de un Balabay i un Musafir.  

 

 

Ay siete “balabayes” ke representan entitades aktivas en la promosyon del Ladino en diversas partes del mundo: Tamar Alexander (Autoridad Nasionala del Ladino, Israel), Shmuel Refael (Instituto Salti de Bar Ilan, Israel), Karen Gerson Sarhon (Sentro Sefaradi de Estambol, Turkia), Jennie Laneurie (La Asosyasyon Aki Estamos, Paris, Fransia), Bryan Kirschen (Binghamton University, NY, USA), Rachel Amado Bortnick (Ladinokomunita, kon 40 payizes), i Liliana Benveniste (eSefarad i Centro Cultural Sefarad, Buenos Aires, Argentina.)   El primerr Enkontro fue el en 9 Augusto ande mos prezentimos todos los Balabayes i avlimos un poko de Djoha.  (Lo podesh ver aki:(https://www.youtube.com/watch?v=vpMitmZD8LI&t=2148s ) En el sigundo, Alhad pasado, yo fui la balabaya i entrevisti a mi musafir Moshe Shaul, el mas konosido aktivisto del ladino en el mundo. (https://www.youtube.com/watch?v=ZBgR-fnMss8&t=3384s ) .   Al alhad venidero, la kerida Karen Sarhon va avlar kon Silvyo Ovadia sovre el muzeo djudio de Estambol, ke, sin dubya va ser maraviyozo,  i va atirar sienes de oyentes. Anda a ver los detalyos aki: http://esefarad.com/?p=98606 .   No lo pedrash!  I no mankesh de asistir en todos los Enkontros de Alhad venideros.

 

 

La pandemia mos alesho fizikamente de muestros keridos, mezmo de los ke estan en la mizma sivdad.  Ma el kazamiento del Zoom i Ladino mos izo aserkar a muestros ermanos sefaradis del mundo entero,  djuntos kon todo el ke ama muestra lingua.  Mos veremos en bueno inshallah este Alhad i en  kada reunyon de la “komunidad virtuala sefaradi” ke fue la kriatura del kazamiento de Zoom kon Ladino.  

     

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon