El Ermozo Kamino a Foto Gagin

 

Munchas fotografias viejas de Izmir, de los anyos de los 1930s a los 1950s muy probablemente yevan la marka de “Foto Gagin”, komo las ke tengo yo, de mi papa i mama i mis ermanos Selim i Sami (todos agora en ganeden) antes ke nasiera yo, i despues kon mi, i una - la maz ermoza -  de yo sola a la edad de 10 mezes! 

 

 

No me akodro el dia ke se travaron estas estampa, ma no me olvido nunka del lugar de Foto Gagin, de afuera i de alientro.  Se topava en Karatash, kartier ande moravan la grande parte de los djudios de Izmir, i mozotros tambien. Kaminando de mi kaza al este (a la direksion del Konak) teniamos ke pasar la kehila Bet Israel i la kalejika de l’Asansor, i kontinuando asta despues de la farmasia de Suhami, djusto antes de vinir al bakal de Simsolo en la koshe de las Eskaleras de Devidas. Del tretuar a la puerta de Foto Gagin avia 3-4 eskalones de mermer, enprimero se entrava a la sala ande avia filmos i otras kozas de fotografia a vender, i detras avia la kamereta de fotografear, kon las makinas fotografikas de tavla  enormas. Siendo en el sentro del kartier djudio, Foto Gagin, el uniko fotografchi djudio en Izmir, no se puede olvidar.

 

 

Este establesimiento tan konosido se serro i se desparesio en los primeros anyos de los 1950s., i el nombre de Foto Gagin kedo guadrado en mi mente, komo en las viejas fotografias del kuti, asta ke la teknolojia moderna desperto su memorya, i me metio en un kamino ke me enrikesyo mi vida.  Era un artikolo en espanyol-kastilyano en el boletin eSefarad ( https://esefarad.com/?p=86317 ) de novembre 2018 eskrito por Sebastian Gagin  de Buenos Aires, Argentina. Aki kontava sovre su viaje a Izmir, i a Karatash,  ande era era el magazen de su bizpapu, Aleksandro Gagin – el patron de Foto Gagin de mi chikez!

 

 

Bushki en Google a Sebastian Gagin, i topi su sitio de web (es un talentuozo desinyador grafiko – graphic artist) le madi un email, dandome a konoser.  Muy amavle, el me respondio pishin en un inglez perfekto, me dio mas detalyos de su famiya, i me transmetio saludos de  su granmama paternal, la sinyora Gagin, ke dainda avla en turko, i avla el espanyol kon aksento!  Ma muestra korespondensia no kedo ayi.  El kamino iva kontinuar, a trayerme dainda mas serka a mi pasado en Izmir.

 

 

         Esta ves era un email de Sebastian la semana pasada  ande me aviza ke dos investigadores de Turkia se metieron en kontakto kon el ke estan aparejando un artikolo sovre Foto Gagin komo un  pionero fotografo de Izmir.  Me demando si me puede transmeter sus kestionaryo a mi. Le dishe siguro, i pokos dias atras inchi el kestionaryo i se lo mandi, en adjustando kopyas de dos fotografias mias de Foto Gagin, asegun me demandaron.

 

        

El sigyente email, datado del 12 djulio, era de maraviyar!  Sebastian me kopyo lo ke le eskrivyeron por mi, aki en mi traduksion: “Grasias por los maraviozos rezultados de la entrevista kon Rachel Bortnick.  Las memorias i las fotografias son una kontribusion grande a muestra investigasion.  Le rogamos ke le aga saver, si es posible, ke estamos muy alegres de tener este kontakto kon eya ke es de muestra sivdad, i ke es tambien una importante investigadora de la erensia djudia-sefaradi, i ademas, es paryentez de mi amigo Erol Amado.” (Erol es

 

 

A ken no agrada sintir komplimientos! I ademas , aparte ke es amigo de Erol Amado (inyeto de mi primo) avia otra koensidensia: el eskritor tenia la alkunya (Bengisu) de una kamarada de klasa mia del Kolej Amerikano de Izmir!  Sebastion me dio su adreso de email, i yo le eskrivi en turko.  Lo rengrasyi, i le demandi por su famiya.  Me respondyo de largo, me konto ke son amigos desde munchos anyos kon Erol, ke estudiaron en djuntos ets. No la konose a mi amiga, Bahar Bengisu, i no son de la mizma famiya me disho. Entre mientres le eskrivi a Bahar tambien, ke izo alegrar a eya, i a mi su repuesta.

 

 

Ke ermoza i valutoza kadena de de amigos, memorias, i koneksiones ke gani en el kamino ke me se avrio delantre de mi kuando meldi el maraviozo artikolo de Sebastian Gagin en eSefarad!

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon