TODO LO KE SE AZE POR MUESTRA ERENSIA ES BUENO

 

Los muestros dizian ke “no ay mal ke por bien no venga.”

Ay kuaje kuatro mezes ke estamos kon este maldicho virus Korona, una bela grande para el mundo entero.  Siempre en rogando ke se vayga al dip de la mar presto, i ke kedemos todos sanos i rezyos, kedamos en kaza, i profitamos de la teknolojia moderna para no enfastyarmos.  A la kontra de enfastyarmos, mos estamos embezando kozas muevas, i pasando las oras kon kozas ke mos dan plazer, por los tantos programes enteresantes ke ay en Internet, i sovre todo via Zoom.

 

 

Dusto antes de empesar a eskrivir los biervos de ariva ize un “viaje virtual” a Yemen, vijitando la komunida djudia ke avia ayi desde mas de 2000 anyos, i los pokos djudios ke kedaron agora.  Mezmo konosimos “en persona” a Tair Haim, la kantante “teymani” de Israel.

 

 

A vezes no podemos sigir todos los programes ke keremos porke estan programados para el mezmo tiempo, o por alguna otra razon.  Ma si lo enrejistran, lo podemos ver despues, en Facebook o en Youtube.  Ansina fue la semana pasada para mi, ke  no pude asistir “en bivo” al program de la Itahdut kon Karen Gerson, Izzet Bana, i Fani Ender , ma lo vide en Facebook. Ke maraviozo program! Aunke konosko desde munchos anyos a Izzet i a Karen,  tomi grande plazer de sintirlos kontar i kantar, i me ambezi muncho ke no savia sovre sus eksperiensas.  I me kayeron lagrimas al sintir a Karen kontar sovre el “eliksir” para kurar la boz ke les preparo Selim Amado, mi kerido ermano de bendicha memoria.

 

 

Karen i Izzet tienen un grande rolo en la popularizason de los kantes djudeoespanyoles, aunke pokos son los ke los kantan de manera autentika komo eyos.  Ma tambien eyos tienen grande rolo en el mantienimiento i espandimiento de la lingua, kon lavoros muy munchos a nombrar aki, o mezmo adientro las dos oras ke eyos estuvieron entrevistados por Fani. Ma no puedo pasar sin mensionar mi grande apresyo por el koro de kriyaturas “Las Estreyikas d’Estambol” ke fondo Izzet serka 20 anyos atras i todo lo bueno ke izo i aze  Karen kon el Sentro Sefaradi de Estambol.

 

         El Djudeoespanyol/Ladino esta “moda” agora!

 

Al pareser, el estar enserrados en kaza fue una “bonanza” para kreatividad en ladino!  Munchas personas se akodraron de la lingua de sus chikez i izieron skeches satirikos en eya i los metieron en Facebook. Konversasiones imajinarias por telefon fue, i kontinua ser, muy popular, komo tambien monologes de rekuerdos, i estoryikas verdaderas o imajinarias, lo mas umoristikas.   De maraviyar!

 

 

De maraviyar tambien es el numero de personas ke se keren ambezar la lingua!  Aki en los Estados Unidos, la organizasion yamada Sephardic Brotherhood empeso un “Dgital Academy” ke ofrese munchos kursos via Zoom sovre la kultura Sefaradi.  Uno de estos es kurso de ladino, una lision por semana, en djugeves la tadre.  Las primeras sesh lisiones las ensenyo el djoven profesor Bryan Kirschen, i agora las esto ensenyando yo.   En kada lision asisten mas de sien estudiantes  en bivo, i mas las sigen de la rejistrasion en Facebook! 

 

 

El foro de Ladinokomunita kontinua a atirar muevos miembros kada dia, lo mas djovenes ke eran bebes, o no avian ni nasido, kuando se fondo el foro en 1999.  Kon tanta djente agora pasando tiempo en Internet, Ladinokomunita se esta rekonosiendo mas anchamente ke siempre komo  la unika komunidad en el mundo virtual ande la lingua de komunikasion es el djudeoespanyol, i solo el djudeoespanyol, ke tambien se yama ladino.

 

 

Ay muncho mas de kontar por todo lo bueno en favor de muestra enresnia sefaradi ke tenemos en Internet en estos dias. Kreygo ke todo es bueno, i da kreyensa a muestra dicha ke “no ay mal ke por bien no venga.”

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon