Memorias de Shavuot, i la Ketuba de la Ley


Para los Sefaradim, Shavuot es una fiesta ke viene a muestra memoria kon sol i flores i alegria. En Izmir de mi chikez, los ombres se ivan a la kehila (sinagoga), todos mos vistiyamos de mued i la kaza estava pronta a resivir musafires. Komo en todas las fiestas djudias, muestras madres azian dulseriyas i kozikas savrozas de fiesta, i una koza ke no mankava es akel maraviozo sutlach kon el siyon de kanela ensima, o la inisial de kada uno de la famiya. Mi mama era una maestra de azer estos dezenyos en deshando la kanela kayer entre sus dedos de la mano derecha. (Siguro ke eya era una maestra de todo jenero de gizado, de todo lo ornado, i de dulserias.)

A los ke ivan a la kehila de Bet Israel (a dos pasos de muestra kaza) a la entrada les davan a mojar las manos kon agua rozada, i tambien les davan petales de rozas freskas para echar ensima de la Sefer Tora durante las akafot. Munchos metiyan algunas de estos petales en sus livros de tefila komo “markapajina” i tambien para ke les de ermoza golor al livro. (No vos olvidesh, ke kada uno veniya a la kehila kon su proprio livro de tefila.) I tambien, el ehal i la teva estava dekorado kon flores blankas regalo del floristo Schlosser. A la salida les davan a todos mogados de susam. (Esto me konto mi ermano Selim, de bendicha memoria.)

La Ketuba de la Ley ayer i oy

Al tiempo, las mujeres ke se ivan a la kehila en Shavuot era para sintir el piyut en ladino La Ketuba de la Ley ( eskrito por el RavYehuda Kalai de Salonik en 1753. ) Algunos lo kantavan en kaza tambien. Este piyut se izo tan popular, ke aparte de ser inkluido en livros de tefila, se imprimiya i se vendiya aparte komo un foyeton de 6 ojas. Podesh ver un egzemplar en el sitio de la Universidad de Washington en Seattle:

https://digitalcollections.lib.washington.edu/digital/collection/p16786coll3/id/288/rec/3

En meldando i sintiendo La Ketuba de la Ley vemos aluziones al Dio komo muestro "novyo", i se mensiona ke El mos toma (a mozotros, el puevlo djudio) "komo novia". Es komo ke el puevlo djidio se esta kazando kon el Dio, i "esta es la Ketuba."

Aki vos do a Dolly Burda meldando La Ketuba de la Ley en forma de poezia.

I en muestros tiempos, Sara Aroeste, la kantadera, kompozitora, i aktivista por ladino, kompozo una kantika titulada “La Ketuba de la Ley”, ke no tiene muncho ke ver kon el piyut tradisional, ma transmete la onor a la Tora en la okazion de Shavuot.

De un artikolo ke meldi sovre Shavuot supe ke en el Talmud, en Ta'anit, dize ke el dia de resivir la Torah fue "Yom Hatunato" (Dia del kazamiento, Dia de boda) del puevlo djudio. Un ermozo konsepto. Por esto es ke el rabino Yehuda Leon Kalayi tuvo la iinspirasion de kompozar "La Ketuba" para este kazamiento.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon