Unidos i Unirmos por el Ladino


Ke ermoza fraza: "Unidos por el Ladino."

I ke bueno ke seria si mos podiamos aunar, de una manera o otra, todos en el mundo ke keremos salvar de olvido a muestra ermoza i valutoza lingua sefaradi. Kuando miramos a los esforsos ke se azen en Turkia, en Israel, en Fransia, en Argentina, en los Estados Unidos, i mas - kada uno uzando sus lengua lokal komo baza - mos viene ke esto es un esfuenyo ke no se puede realizar.

Ma, el mez pasado (Avril) vimos dar el primer paso ke mos izo pensar ke el esfuenyo se puede azer realidad - a lo menos a traves de muzika. I este mes vimos el segundo paso. Me refero a los videos en Youtube subtitulados kon akeya ermoza fraza, "Unidos por el Ladino," ke auno a munchos kantadores de diversas partes del mundo para kantar una kantika en ladino. Los produsieron Marcelo i Liliana Benveniste, fondadores i redaktores del boletin elektroniko eSefarad (esefarad.com). Asta el momento ke eskrivo estos biervos, mas de 5 mil personas ya miraron kada uno de estos videos. Si algun de mi lektor no es uno de estos miles de personas, sin pedrer tiempo ke vayga agora pishin a verlos - i despues ke venga a meldar el resto de lo ke vos vo dizir. Aki los adresos:

El de Avril (la kantika "Esta Montanya"): https://www.youtube.com/watch?v=iC_MnKRt1TE

El de Mayo (la kantika "Los Bilbilikos") https://www.youtube.com/watch?v=LDsizbcQ-BU&t=11s

No se nada de la teknolojia detras de esto, ma la idea es fantastika, i el sono esta una ermozura. I ke alegria ver chikos, miembros del koral "Las Estreyikas de Estambol" entre los kantantes de Los Bilbilikos en el segundo video. En eyos tenemos la esperansa del avenir de Ladino.

En estos videos vimos munchos kantadores i muzikantes ke konosemos, i algunos ke puede ser no konosiamos. Ma dainda ay munchos mas, por todas las partes del mundo, ke se pueden (i esto segura ke se van) integrar en videos venideros del mizmo jenero, siempre kon kantes en ladino, i kon el titolo "Unidos por el Ladino." Felisito de korason a Liliana i Marcelo Benveniste por esta maravioza inisiativa suyas, ansi ke todos los ekselente kantadores ke partisparon i van a partisipar en este importante i plaziente projekto.

Podemos aunarmos a traves la lingua tambien

El sukseso meresido de ests videos muzikales de "Unidos por el Ladino" me da esperansa de poder realizar otro esfuenyo: de "unirmos por el ladino" en uzando el ladino. Komo dishe mas ariva, kada paiz tiene estudios formales i informales de ladino, i kita ekselentes broshuras i publikasiones - en papel o por Internet - i tiene sus grupos kon maraviozas programasiones sovre la kultura i lengua djudeoespanyola. Ma estas son en grande parte en las lenguas lokalas. Solo El Amaneser, el mensual de Estambol, i Ladinokomunita, el grupo de korespondensia por Internet, son enteramente en ladino. Por esto estos tienen sus lektores i eskritores de todas partes del mundo, mos aunan por el ladino KON el ladino.

Muzika i kante mos dan grande plazer, mezmo si no entendemos los biervos de las kantikas. Espero ke los videos muzikales de "Unidos por el Ladino" van a kontinuar por muncho tiempo, i van a ayudar a ke el ladino se konoska i se uze mas i mas, en todas las partes del mundo.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon