LO KE AKONTESE AL PETROL ESTOS DIAS.

May 5, 2020

 

(Yazarın yazısını sesli dinlemek için tıklayınız)

Unas dos semanas antes  el OPEC-Plus desidyo de amengur la produksyon de petrol de 10 miliones de botas (barrels) al dia del empezisho de Mayo de este anyo  por un tiempo de dos meses. Esto fue desidado para salvar i restorar el presyo de la bota ke kayo debasho de los 10 dolares amerikanos. Oy el ke tiene menester de merkar bruto pode mizmo pagar la bota entre 12 a 15 dolares  a partidas de ropa ke estan stokadas en  los tankeres asperando en medyo de mar.  Komo este produkto mondialmente konsumido peryo tanto de su valor. Afigurarse ke el anyo pasado la bota del bruto se vendia serka de los 65 dolares amerikanos.  La pandemiya del virus  kavzo el amenguamiento de la konsomasyon del petrol por el  kual, antes un mes , uvo dezavenimyento entre la Rusiya i la Arabia Seudita achakes el presyo i la kuantidad de produksyon, kreyando la situasyon inimajinavle de la kayida de eyos a un nivel bastando basho. Uvo ken disheron ke los payizes produktores devian pagar en sima a la kliantela para ke  tomen lo demaziya del petrol ke tenían, por no tener onde stokarlo.

 

Los miembros del OPEC-Plus  no solo achetaron  a tomar mizuras  dramatikas i arestar la produksyon de miles de pozos, se metieron deakordo de abashar la produksyon  diara a 8 miliones de botas del empezisho de Julio por un tiempo de 6 mezes. Ademas sovre la presyon seudita, la kuala en akordo  kon la administrasyon amerikana , ovligo a los payizes miembros del OPEC-Plus de kortar por 16 mezes la produksyon de otros  6 miliones de botas al dia empesando de Jenayo 2021.  Ansina se pensa ke la gerra de los presyos tomara fin i ke dingunos no purfiaran a azer konkerensya i rovar  la klientela. Este akordo  kreara una reduksyon de produksyon  inegualada en la istoria de la Arabia Seudita i de la Rusia. Mensyonere ke el bruto es el solo produkto  mayor de parnasa ke tienen estos 2 payizes. La Rusia se topara en muncha estrechura si los presyos no pujan, i vender a peryita lo ke es el kavzo oy, aflakara sosyalmente i ekonomikamente el payis. La grande (!) Rusia se azera  manko apresiavle en peryendo su prestij en el medyo diplomatiko internasyonal porke sera kondanada a sovrebivir kon el ayudo de las institusyones finansiarias del oksidente.

 

Malgrado este akordo  avra  10 milyones de botas al diya de bruto en demaziya en el merkado, kantidad konsideravle ke no permetera  de poder pujar su presyo, i esto kontinuara  a lo ke se ve fin a la fin del anyo.

 

Agora kale  mirar komo el merkado va komportarse . Es ke se espera de topar  en kurto tiempo, remedyo para la disparisyon del virus ? Es ke la umanita magrado la pandemiya  va poder apoko mizmo,  meterse a lavorar i a mirar de bivir normalmente komo en el pasado? Estas kestyones si kedan  oy sin repuesta no avra hayre  a ke el presyo del petrol suva.  La inkyetud perdura i  no se save komo la ekonomiya mondiala se tornara a la situasyon de antes.  

 

No mos alvidaremos ke istorikamente avlando en lo pasado despues las grandes  desgresyas se vido una fuerte inflasyon en todos los merkados importantes del mundo.  Por siguro  una ves la pandemiya pasada, las bankas de  los estados se meteran a imprimar bankenotas i ansi a trayer muncha likidita para  poder ayudar a la industria i el komerso i por lo mas a ayudar sus sivdadinos a emprestarse  dinero sovre sus nesesitades.  Este kamino sin duvda mos trayera la inflasyon . Kualas seran sus konsikuensas  dezagradavles, kale bivir i ver. Ademas politikamente las relasyones entre los grandes payizes kambyaran egualmente.  Kuriozo   de saver si la fatura de las peryitas  de miliardas de dolares se kitara a la China ? Komo  eya se komportara si sera akuzada de aver ekspandido la koronavirus?

 

Kon regreto, no tengo repuestas klaras a las kestyones eventualas  ke me preguntarash en este tema , ma sovre lo ke me ambezi de mis viejos kolegos  ke azen komersyo del bruto,  eyos dizen  ke su presyo pujara apoko apoko para establisirse a 35 dolares amerikanos verso la fin de esta anyo,  otros me dizen ke visto ke el akordo  de amenguar las kantitades vino muy tadre   no se deve asperar a una amelyorasyon del presyo  ke se fiksara entre 20 i 25 dolares amerikanos, ma ke egziste polisibita a ke el presyo puje a 30 dolares amerikanos al empesijo de 2021.  Eyos  en la mayoriya son pesimistos sovre el futuro del negosyo internasyonal,  ademas, la mondializasyon resiviendo un grande chaketon, no se pensa ke  eya se desvelopara mas i ke se aspera un grande shomaje  kreando un truvyo sosyal en munchos payizes de la planeta.  Dunke keridos lektores los días vinideros  son yenos de surprezas, kale estar kon sangre fría i en salud buena.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon