La profesora Ivet Bahar: orgulyo para mozotros

 

La Akademia Nasionala de Sensias (National Academy of Sciences  - NAS) de los Estados Unidos es la mas prestijioza Akademia sientifika en el mundo.  Entre sus 2,900 miembros aktuales 190 son ganadores del premio Nobel.

 

 

En el 28 Avril, 2020, se anonso la lista de sientifikos muavemente elejidos komo miembros de la NAS, i entre eyos avia un nombre ke trusho onor a la Turkia, i partikularmente a los djudios turkanos  – la Profesora Dra. Ivet Bahar, orijinarya de Istanbul.

 

 

         Por 15 anyos la Dra.  Bahar fue profesora en la Universidad del Bosforo (Bogazici Universitesi) en Istanbul, i desde 2004 es profesora i investigadora en la Fakulta de Medisina de la Universita de Pittsburg (UP)en los Estados Unidos.  Eya lavora en una sensia muy avansada - ke para mi es mezmo muy difisil deskrivir porke no la entiendo egzaktamente.  Solo dire ke la seksion ke fondo eya en UP se yama (en mi tradukision)  "sistema biolojika suportada de Computer" i ayi tiene un ekipo de 120 personas debasho su direksion.  Este lavoro inkluye tratar de topar melizinas para diversas hazinuras, inkluyendo la del Covid-19 ke lo yaman el virus Corona. 

 

 

Basta esto para dar una idea de la kompleksidad de su lavoro,  ma lo emportante para ser elijida al NAS, es ke el mundo sientifiko apresya la improtansa i valor de los rezultados de su lavor.

 

 

         Ansi es ke, por primera vez en los 157 anyos de esta prestijioza Akademia, una sientifika turka fue elejida komo miembra.  Los jurnales de Turkia espandieron este haber alegre al pais. El prestijiozo diaryo turko Cumhuriyet publiko un artikolo largo sovre eya, dando detalios de su pasado i del lavoro avansado i emportante ke tiene echo i kontinua a azer, i de la onor grande ke es el ser elejida miembra de la dicha akademia. Konto tambien los varios premios ke tiene resivido eya, i ke en 2016 eya fue invitada por el prezidente Amerikano Barak Obama a dar una konferensia en la "Kaza Blanka".   El titolo en letras grandes anonsava: "Prof. Dr. İvet Bahar, Amerikan Ulusal Bilimler Akademisi üyeliğine seçilen ilk Türk bilim insanı oldu" (Prof. Dr. Ivet Bahar se izo la primera persona turka de sensia elejida miembra de la Akademia Nasionala de Sensias en la Amerka.)

 

 

         Ma ni un biervo ke Ivet Bahar es djudia! En un grupo de korespondensia de djudios turkanos en Internet, algunos komentaron ke "si era algun haber desagreavle, ,ya ivan a anonsar ke Ivet Bahar es 'de rais djudia.'  Ma para koza de orgulyo, eya es simplemente turka."

 

 

         Seguro ke para la grande majoridad de los serka 85 milyones de abitantes de Turkia, el nombre de Ivet Bahar no indika nada de su etnisidad o relijion.  Bahar kere dizir primavera en turko, ma aun ke el nombre Ivet (Yvette) no egziste entre los turkos muslumanos, pokos pueden endevinar o saver lo ke indika.  

Solo los djudios, por siguro, saven ke Ivet Bahar es djudia.  I no solo esto, munchos konosemos su famiya.  Ken no konosyo a su esfuegra,  Beki L. Bahar de bendicha memoria?  Beki era una famoza poetesa i autora, ke figura mezmo en el muzeo de mujeres en Estambol.  l  su marido,  I. Izzet Bahar, es autor de dos livros istorikos.

 

 

Yo kreygo ke mozotros devemos dar a konoser al mundo personas talentuozas i valutozas ke slayeron de muestra komunitad djudia-turka i djudia sefaradi.  Meresemos unaa Ensiklopedia de "Ken es Ken?" entre mozotros.  Semos una minoridad adientro de los djudios, ma tenemos grande proporsion de personas intelijentes i valutozas para la umanidad.  La onor ke resivio la profesora Ivet Bahar de la NAS es prova de esto - i es orgulio para todos mozotros.

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon