LA DEFENSA SEKRETA

March 24, 2020

 

Duro i apretado los diyas ke estamos biviendo. ‘Covid-19’ mos  achunko i mos kondano a estar afrisidos de muestros movementos sin saver komo eskabuyirmos de el.  El es yamado por los espesialistas ‘Koronavirus’ por ke pensan ke es el rey de los viruzes gripales i el ke mata por lo mas a los aedados.  No se save kualas son  las melizinas kontra esta grip ke danya a la umanidad entera i ke mos decha en enfermita a las piadades del D.  Milyones de umanos  estan biviendo en espanto de dispareser komo en los viejos tiempos de la pendemiya de la ‘landre’ (peste en fransez) en la aedad-medyana.

 

Dizeremos ke sera sera , ma pensaremos ke kuando remedyo a este virus se topara, el mundo de oy en su komporto sera  por siguro diferente. Los ke pensan i rijen kon sus ideas el komportamiento del umano  mos daran a entender kualos son los faktores ke devran trokar para sovreguardar la vida en muestro mundo.  Devemos a mi perspektiva personal de mirar de amenguar los danyos echos durante los dalkavos sieglos a la natura kon una grande ‘N’ a la kuala la mirimos kon muncho deskudyo. Mirar de dezvelopar muevas teknolijias de enerjia, i de ambezar a las jenerasyones vinideras de azer atansyon a todo lo ke apartiene al patrimonyo  mundial kon urdjensa. Bivir i ver.

 

Ademas en Israel por lo mas mis amigos i konosensyas estan en sus kazas sin meneyarsen i azen vijitas por telefon kon sus serkanos. Lo ke viene afuerte es de no poder resivir los inyetos i pasar tiempo kon eyos. Ampesimos a olvidarmos los pransos de noche shabat i los kombites entre los miembros de la famiya i de los amigos serkanos. La djente de limpieza no vienen a lavorar i todo el echo de kaza esta en la espalda de sus patrones, koza, ke deves en kuando kavza diskusyones dezagradavles entre marido i mujer. Malgrado todas las difikultades los israelianos a la eksepsyon de siertas komunidades haredis (ultra relijiozas) ke mizmo no rekonosen la otoridad del payis, se estan sotometyendo a las direktivas del governo.  Es ansi ke la mortalidad esta lechos de lo ke se profesyo.  Israel fue i es el solo payis del mundo el kual arekojyo a sus sivdadinos en viaje en el estranjero i miles de eyos viajaron debaldes  transportados por la kompania nasyonala El Al.

 

Ma lo mas interesante fue ke las adjensias de seguridad del payis komo el Mossad i el Shin Bet  se kargaron de topar  ahuera de  Israel maskas i makinas de oksijen ke mankavan en grande nombre en las reservas de los ospitales.  El ministaryo israeliano de la sanedad  grasias a estas adjensias, muy renomadas, supyo kompletar el ekipamiento ke mankava para salvar almas. Ansi entendemos ke las adjensias se okupan de toda manera por el byen de la nasyon, mizmo de topar kuras  i instrumentos sanitaryos kuando se nesesitan.

 

 Los ke las enkavesan las adjensias, los primeros anyos de la fondasyon del estado no se deskruvian i kedavan siempre sekretos mizmo despues ke se ivan en pensya.  Unos de eyos entre los fondadores era el sinyor Chikurel, be bendicha memoria, ke era nasido de Izmir. Oy las kozas trokaron i los shefes de estas institusyones son konosidos por el publiko  i mizmo de los inimigos de Israel.

 

Los dirijentes i sus kolavoladores de estas adjensias sovre la situasyon en la kuala se topan, se akomodan a eya i no les importa las ovligasyones inprevistas ke deven afrontar. Tienen una kapachita de akomodarse eksepsyonala. Me parese ke es esto ke aze sus reuchitas i ke mizmo si  ralamente se yerran esto no aze danyo a la defensa de Israel ke se topa todo el tiempo en  situasyon de gerra.   Las adjensias son ekipadas kon sistemes de cyber i malgrado las makinas elektronikas las kualas kontrolan las informasyones sosyalas en la media, las desiziones por lo mas son tomadas por los elementos umanos ke analizan kada  koza en su justa valor. La fama internasyonal mostra ke Israel por su defensa no permete a ke sus inimigos topen el terreno vaziyo i lo ataken en surpreza komo fue el kavzo durante la gerra de 1973. 

 

Semejante penseryo de los dirijentes del estado se vido en esta pendemiya del virus Korona de demandar a las adjensias de okuparse de topar maskas i makinas de oksijen.  

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon