PURIM ONDE LOS SEFARADIS DE ISRAEL,  TURKIA I LOS BALKANES


De entre todas las fiestas relijiozas djudias, Purim es la ke sovresale mas por su karakter de gozo i alegria. En esta fiesta no solo ke es permetido de alegrarse, entre otras en beviendo vino, sino ke este es tambien un mandamiento. En este dia en efekto, los djudios deven bever asta ke no puedan apartar entre “Bendicho sea Mordehay” i “Maldicho sea Aman”.

La fiesta tiene 2 aspektos. El uno, de karakter relijiozo, konsiste en ir al kal para meldar la Megilla de Purim. Ayi es kontado komo Ester i su tio Mordehay reusheron a salvar a los djudios de Babilonia, al tiempo del rey Ahashverosh, de la matansa ke les era aprontada por orden de Aman, el vizir del rey, ke aborresia a Mordehay.

El sigundo aspekto, de karakter familial i folkloriko, era selebrado kon una sena festiva durante la kuala era de uzo komer, bever i kantar. Onde los sefaradis de Turkia i de los Balkanes, ansi ke onde los del eks Maroko Espanyol, se uzava kantar kantes espesiales yamados “Koplas de Purim”.

De mizmo ke las otras fiestas djudias, Purim tiene tambien un aspekto gastronomiko muy importante. Se apronta para esta fiesta una gran variedad de dulserias komo travados, baklavas, tishpishti, masapan etc. En Estambol se uzava azer unas dulserias yamadas “mavlacha”, kon una masa de asukar a la kuala se dava la forma de bastonikos o tijeras (para las ijikas). En Saloniko se azian “forkas de Aman” i “folares”: un pedaso de masa kon un guevo haminado, entornado por tres palikos, eyos tambien de masa, ke eran enfornados i komidos kon grande gusto. Eyos eran komo un simbolo de la forka en la kuala avian sido enforkados Aman i su famiya. Se uzava tambien azer “novyizikas”, una preparasion a baza de asukar, en forma de novias.

Otro uzo, ke es komun en realidad a otras komunidades djudias tambien, es de embiarse mutualmente “Platikos de Purim”, platos kon una seleksion de las mijores dulserias ke se tiene en kaza i ke son embiadas a los parientes, amigos i konosidos.

Los chikos no son ulvidados. En desparte de las dulserias ke komen en kaza, djuntos kon todos, es de uzo de darles tambien un “purimlik”, una sierta suma de moneda para ke puedan merkarsen eyos mizmos lo ke les agrada mas.

Purim era una fiesta onde las institusiones rabinikas permetian i enkorajavan mizmo la reprezentasion de ovras de teatro – jeneralmente versiones diferentes de la storia de Yosef i sus ermanos. Un teksto ke siguramente fue aprovechado para estas reprezentasiones es el de las “Koplas de Yosef” de Rabi Avraam Toledo. Esta ovra inkluye, entre otras, instruksiones sovre las melodias sigun las kualas devian ser kantadas siertas partes.

Purim, fiesta de la salvasion de los djudios de Babilonia vino a ser, kon el tiempo, una fiesta para selebrar la salvasion de otras komunidades djudias de los peligros ke las amenazavan. Ansi es ke tenemos el Purim de los Saragostis, en memoria de la salvasion de los djudios de Zaragoza, en Espanya (i ay ken dize de Siracusa, en Italia); el Purim de los Meyuhasim, en memoria de un milagro ke akontesio a un rabino de esta famoza famiya; el “Purim de las Bombas”, para markar la salvasion de la komunidad djudia de Tetuan del fuerte bombardeamiento de esta sivdad por una fuersa navala franseza… i mas.

Es interesante ke Purim es tambien una de las pokas fiestas djudias ke los anusim kontinuaron a observar durante largos anyos despues de sus konversion forsada. En realidad i por razones ke pueden ser entendidas, afin de no dar lugar a sospechas de la Inkizision, eyos selebravan esta fiesta un dia antes, el dia del Ayuno de Ester. Onde eyos esta no era una fiesta de gozo, kantes i alegria komo en las komunidades sefaradis del Imperio Otomano. Eya tenia un aspekto mas seriozo, era un dia de orasiones en las kualas era demandado el ayudo de la reyna Ester ke era komo sus patrona. En efekto, eya fue la primera “djudia sekreta”, ke se prezento delantre del rey Ahashverosh sin darse a konoser komo djudia i grasias a esto pudo devenir la favorita del rey i salvar a su puevlo.

En siertos lugares, Purim empeso a ser selebrado kon balos maskados tambien, probablamente por influensa de algunas sosiedades evropeas al seno de las kualas bivieron los djudios. Los ninyos en edad de eskola markan esta fiesta en vistiendosen de indianos o beduines, kovboyes o eskimos, polises o soldados etc. o impersonando una o otra de las figuras mas populares de la aktualidad.

En Israel tenemos tambien la Adloyada – una manera de karnaval ke fue trayido a Tel Aviv por el mayor Meir Dizengof, i desde entonses es selebrado en otras sivdades tambien.

En estas festividades la djente puede dar libre korso a su imajinasion i kreatividad, todo en kumpliendo las ermozas tradisiones ke datan de sienes i miles de anyos i fueron transmetidas fidelmente asta muestros dias.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon