LAS KOMUNIDADES DJUDIAS  DE ARAGON


Situada al Nordeste de Espanya, Aragon es una de las komunidades autonomas espanyolas mas estrechamente atadas a la istoria de los djudios.

A lo largo de la istoria bivieron ayi diferentes puevlos i kulturas i se enkontraron, basho un mizmo sielo, iglezias, mishkitas i sinagogas. Basta vijitar en las sivdades i kazales de esta rejion para deskuvrir los restos de estas kulturas tan variadas, i entre eyos restos ke azen akodrar la antigua prezensia djudia.

Los primeros djudios ke yegaron a Aragon fueron, a la vista, de entre los ke avian sido exilados por los romanos, en sus mayoria prizioneros de gerra. La prezensia djudia en Aragon fue dokumentada empesando del siglo III de muestra era. Eyos se aresentaron en Caesaragusta, oy Zaragoza, i otras sivdades mas. Kon el tiempo eyos se espandieron en todo el teritorio de Aragon i, kuando fue proklamado el Edikto de Ekspulsion, a la fin del siglo XV, eyos reprezentavan el 10% de la povlasion aragoneza.

Despues de un largo olvido, de sienes de anyos, el pasado de estas komunidades empeso a ser mijor konosido, grasias a las investigasiones istorikas i arkeolojikas ke fueron echas en esta rejion, en las ultimas diezenas de anyos, i ke sus rezultados fueron publikados en livros, revistas i jurnales.

El fruto de esta investigasion fue la revelasion de lokalidades djudias olvidadas ansi ke el djuntamiento de mas informasion sovre las ke ya eran konosidas.

Las mas grandes i importantes komunidades djudias de Aragon eran las de Zaragoza, Huesca, Calatayud, Teruel, Jaca, Tarazona, Monzon i mas. Estas komunidades bivian komo un mikrokosmo al seno de una mayoria kristiana. Eyas eran yamadas aljama kuando yegavan a la posibilidad de rijirsen de manera autonoma, kon sus institusiones relijiozas, juridikas i administrativas. Kada una de estas aljamas tenia a lo menos una sinagoga, un simeterio i un karnesero ke vendia karne kasher.

La grande komunidad djudia de Zaragoza kumplio un rolo muy importante del punto de vista politiko i tambien del punto de vista spiritual. Es de Aragon i de su kapitala Zaragoza ke salieron algunos de los mas famozos filozofos djudios komo Abraham Abulafia, Ishak bar Sheshet Perfet i Hasday ibn Crescas, a los kualos puedemos adjustar figuras komo Shelomo Ibn Gevirol i Bahia Ibn Pakuda.

Es muy importante ke toda la informasion arekojida grasias a las investigasiones istorikas i arkeolojikas sovre las komunidades djudias de Aragon, ansi ke los dokumentos konservados en los archivos espanyoles sovre la aktividad diaria de los ke bivian en estas komunidades, ya estan agora a la dispozision del publiko. Meldando los livros, revistas i artikolos en la prensa, la djente ya puede konoser la istoria de los djudios de Aragon, i de otras partes tambien de Espanya onde se nota una aktividad semejante.

Djuntos kon esto, ay tambien ken pensa ke kon esto no basta. Manka una dimension muy importante – la dimension eskolar. En efekto, en las eskolas primarias ansi ke en los liseos de Espanya no se ensenya kaje nada sovre la istoria de los djudios ke bivieron en este paiz durante mas de 1000 anyos, asta sus ekspulsion, i sovre sus importante kontribusion a la istoria i kultura espanyola.

Un kambio muy pozitivo en este kampo tendra lugar al prinsipio del anyo eskolar 2020-2021, grasias a la inisiativa de dos djovenes profesores espanyoles, Alvaro Lopez Asensio i Javier Gonzalez Ruiz. Eyos demandaron i obtuvieron del Konsejero de Kultura de Aragon, de inkluir en los livros sovre la istoria de Espanya, en las eskolas de esta autonomia, tekstos sovre la istoria i kultura de los djudios en la Peninsula Iberika.

En el komunikado ke publikaron estos dos djovenes profesores, eyos apuntan ke la prezensia de los djudios en Espanya fue importante, no solo a kavza de sus aktividad en los kampos de la ekonomia i de la sensia ansi ke sus kreasion literaria.. Ay otra razon muy importante: a partir del siglo 12 fueron eyos ke, trezladando ovras del arabo al espanyol, transmetieron a la sosiedad kristiana la saviduria de los famozos autores grego-romanos i tambien las investigasiones i los komentarios sientifikos de pensadores musulmanes de El Andaluz en los kampos de la medesina, la astronomia, las matematikas i sovre todo la filozofia.

Grasias a los djudios, apuntan eyos, los reynos kristianos tuvieron akseso a los prinsipios de la sensia i de la filozofia ke rapidamente pasaron al resto de Evropa, ayudando a pozar las bazas de lo ke oy es konsiderado komo la kultura evropea; i esto es algo ke deve ser rekonosido no solo por los investigadores i el publiko kulto, sino ke tambien por las muevas jenerasiones, de la kualas depende el futuro.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon