MUEVA RETORIKA DE PAZ

February 4, 2020

 

Antes pokos dias el prezidente Trump lo invito a Binyamin Netanyahu a la Kaza Blanka  en Washington  para ofisializar el plano de paz entre Israel i los palestinianos, tanto asperado de ser publikado,  impidido achakes de las eleksion israelianas no finalizadas .   El enkontro  difuzado vizivle a traverso el mundo   lo podemos  yamarlo sigun mi “vizyon de paz para la prosperita en terra santa”.  El presidente de la Otoridad palestiniana Mahmud Abbas no fue invitado porke este sinyor sin mizmo ke el plano sea publikado  avia anonsado su ‘NO’ en no achetandolo.  Los arabos palestinianos ofisialmente a todas las ofertas de paz, fin a oy en dia, dicheron ‘NO’ i  Abbas  no manko a esta tradisyon  i por la ochena vez el ajusto a la koleksyon  un  otro no.

 

Kualo de muevo traye este propozisyon ¿ Antes de todo la retorika del konflikto troka i el paradigmo  ‘de paz kontra terra’ no egziste mas.  Los arabos deven finalmente entender el tiempo no esta mas  en sus favores, mas el  pasa mas la peryita va ser grande para eyos.  No deven de alvidarsen ke Israel se defendyo  i gano todos los konfliktos militares i konkisto su territoryo aktual ke inklua Yehuda i Shomron i  Yerushalayim .  Dunke los arabos palestinianos deven kontentarsen de lo ke se les ofrise. Este plano aklara la kestyon de los enplantesemientos djudios en Yehuda i Shomron.  Las Nasyones Unidas (UN) en su mayoriya los deklaran terra okupada sovre la ley internasyonala  koza ke no es verdad visto ke Israel los  konkisto de la Jordania en 1967  i no de la  entidad palestiniana ke no egzistia. El plano, a la eksepsyon del Iran, de la Turkia i kon medya boka de la Liga Araba  ke lo refuzaron, no se sintyo un komentaryo negativo de la parte de las grandes potensyas i de los payizes arabos.

 

  Netanyahu  a esta okazyon, durante la seduta deklaro ke esta pronto a asentarse  supito a la meza de negosiasyones basta ke los palestinianos esten de akordo a vinir.  4 anyos de tiempo tendran  para trokar de opinion i vinir para tratar este plano kon Israel. Esperamos ke la  djente sezuda palestiniana no peryera esta  okazyon i en trokando finalmente  de komporto  se asentaran enfrente de la administrasyon israeliana i miraran de meterse de akordo para reglar el konflikto  ke dura mas de 100 anyos.

 

Sobresale del plano Trump diversas razones para ke  los israelianos las abrasen malgrado ke no son todas fasil a aplikar sin sekana.

 

  • A- La rezolusyon 2334 de las UN , la demanda sovre los territoryos de la Sis Jordania de 1949  son ekskluidas . No sera mas kestyon de negosyar sovre estos sujetos.

  • B- Nos es mas kestyon komo lo dishe mas ariva de dar terra kontra la paz, al kontraryo Israel resivera el 30 por siento de Yehuda i Shomron.  Bien entendido sovre los 70 por siento se establisera un estado palestiniano independiente, desarmado. Los arabos tendran una obligasyon de negosiar a los mas 4 anyos  el establesimiento del estado palestiniano. Pasada esta data las kondisyones poderan trokar.  Israel de su parte  kuando lo desidara podera votar  una ley deklarando el territoryo ke le reviene de Yehuda i Shomron  terra israeliana.  Ansi la kestyon de terra okupada tomara fin i no sera obstaklo mas a la paz. Ni los israelianos ni los palestinianos no se menearan de sus kazas.  Durante estos 4 anyos no avra muevas fraguas  en la zona C. No sera mas demenester de derokar los edifisyos sin permiso.

  • C- La infrastruktura de los territoryos  israelianos komo palestinianos se kompletara afin ke ayga una kontinuedad  ariento de eyos. Lo ke kere dizer kaminos, pontes,  tuneles i transportos ferroverikos nuevos. Yerushalayim sera la kapitala endevizivle de Israel, i el foburgo de Abu Dis  la kapitala ‘el Kuds’ de la Palestina. Yerushalayim sera avierta a todas las religiones sin dinguna limit.

 

  • D- La administrasyon Trump demanda del futuro estado palestiniano de Yehuda i Shomron  i Gaza  de  kedarse de pagar mezadas a los teroristos enkarserados  i de dezarmar el Hamas i las otras organizasyones teroristas de Gaza. Ademas de eliminar de los livros de eskolas todas las eskritas   antisemitas jenosidalas, respektar los derechos umanos i rekonoser ke Israel es un payis djudio. La kestyon de los refugiados de 1948 deve ser atakanada ahuera de Israel.

  • E- El plano inkluya para lorgar la paz, 50 miliardas de dolares ke seran investidos en el futuro estado palestiniano afin de krear industryas i komersos para mas de un milyon de almas. Ansina dar a entender a los jovenes  palestinianos komo dize la dicha ‘ande ay papasyon ay bindisyon.

  • F- Finalmente los payizes arabos seran liberos de kolavorar kon Israel, de rekonoserlo de yure i mirar de prosperar enjuntos en la jeografia del Medyo Oriente.

 

En konkluzion mizmo si se establise una paz yelada entre Israel i el mundo arabo muzulmano  ke rekonose la lejitimitad del estado djudio,  la rejion medya orientala podera  reglar munchisimos de sus  problemes  i ser mas  repozada i silensioza.

 Espero en el futuro si la paz se realiza,  mos vamos akodrar de Trump, de su yerno i de su administrasyon komo ser grandes amigos del puevlo djudio  israelyano. . 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

ADRES/כתובת 

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon