SIETEN ANYO DEL DIDL:  KONTAREMOS DEL EMPESIJO

January 21, 2020

 

 

         DIdL por aki, DIdL por ayi! En sivdades de Espanya, Israel, Turkia i los Estados Unidos,  fiestan el DIdL kada anyo, desde 2013. (Si no saviash, vos dire: DIdL es kurto por el Dia Internasional de Ladino.)

 

 

         Kada lugar aze lo mijor ke puede.  Algunos tienen programes durante un dia entero, kon muzika, teatro, konferensias, i mas.  Otros lo azen mas kurto, ma kon mizma ardor i kerensia, i igualmente enteresante i amuzante - todo para dar a konoser la lingua djudeoespanyola, ke es la baza de muestra kultura  i identidad komo djudios sefaradis.

 

 

         Agora, despues de 7 anyos, es buena ora de akodrarmos komo nasyo la idea i komo se espandyo este fenomeno ke yamamos el DIdL, o Dia de Djudeoespanyol.

 

La konsepsion en Ladinokomunita[1]

 

         La idea nasyo i se enfortesyo en Ladinokomunita (o LK), ma la madre ke la "paryo" es muestra amiga Zelda Ovadia de Israel. En el 9 de djenayo, 2013, Zelda eskrivyo el sigyente mesaj a LK[2]:


Keridas amigas i keridos amigos,

Vos esto eskriviendo este mesaje para kompartir kon vozotros i todos los ke
tienen a koro i se interesan del djudeo-espanyol, su kultura i istoria, i de
su riko patrimonio, una propozision, ke desde largo tiempo la tengo guadrada
en mi.

Oy ke tenemos kaji en todas las partes del mundo universidades,
institusiones, sentros i sirkolos ke son muy aktivos i se estan distingiendo
en el kampo del djudeo-espanyol i su kultura, organizando kongresos, dias de
estudio, konsertos de kantes en ladino i mas, vos demando si estarash de
akordo kon mi propozision de fiksar una data para

UN DIA DE LADINO INTERNASIONAL

...

Siendo ke, por las oras, esta no es ke una propozision i nada mas, me
gustaria saver, si vos perese, estimados amigos i amigas, si ay lugar i si
podremos, djuntadomos, realizar este "esfuenyo".

Kon mis mijores saludos i dezeos de dias alegres,

Zelda Ovadia
Yerushalayim

 

         Esta letra de Zelda tuvo munchas reaksiones pozitivas i entusiasmadas.  Ma no estavamos siguros si esto seria una reunion en un lugar, o komo se iva azer.  Al dia sigyente Moshe Shaul mo lo ekspliko:

 

"[...] de tener un dia dedikado a aktividades del kampo del ladino I su kultura, simultaneamente, el mizmo dia en los diversos lugares en el mundo onde ay kolektividades de ladino-avantes. [...]"

 

         En el mez de Julio sigyente Moshe Shaul mos izo saver ke La Autoridad de Ladino tambien aksepto el projekto, i ke una komite ( kon Moshe, Zelda, Alegra Amado i la Dra. Alisia Ginio) se formo para azer las preparasiones de un program en Israel, fiksado komo el kavo dia de Hanuka, el 5 Desembre de 2013 (2 Tevet, 5774)  Finalmente la fiesta del primer DIdL en Israel se izo, kon el apoyo del Sentro Salti de Estudios de Ladino en la Universidad de Bar Ilan[3]  kon un program grande de dia entero en el auditorio de 800 personas de la universidad.  Yo tuve la onor de ser invitada a mandar un video de saludos. (Podesh ver video de akel gran Dia, en https://www.youtube.com/watch?v=rgwJFEhOU8U&feature=em-uploademail )

 

 

         La idea propozada por Zelda, i reklamada por la Autoridad de Ladino en Israel, era de realizar el DIdL en el mezmo dia, el kavo dia de Hanuka, kada anyo en todos los lugares.  Ma, komo dizen en turko "evdeki hesap çarşıya uymaz" (el kuento de kaza no vale en la plasa). Entonses kada lugar lo izo en un dia konviniente, no muy leshos de Hanuka.

 

 

Del Primer Anyo asta Agora

 

         El primer anyo fue una alegria i gran emosion para todos los ke preparimos programas en muestras  sivdades: Yerushalayim (Israel), Buenos Aires (Argentina), Estambol (Turkia), Rio de Janeiro (Brazil), Atena (Gresia), Sofia (Bulgaria), Murcia (Espanya ) i Seattle i Dallas en los Estados Unidos. (Espero ke no me olvidi de dingunos!)  Marcelo Benveniste de Buenos Aires avrio un sitio de Internet ande todos estavamos mandando muestros anunsos de programes.  Malorozamente este sitio no egziste mas, i no podemos saver mas kuantas sivdades o universidades estan partisipando o kontinuando a tener programes de DIdL.  Vos puedo dizir solo ke a las sivdades ke mensioni arivase adjuntaron otras: Montevideo (Uruguay), Resistencia (Brazil) i siguro,  New York.  (Esto segura ke ay i mas, ma estos son los ke me vienen al tino.) 

 

         New York empeso a fiestar el DIdL tres anyos antes, ma lo azen a sus boy, ke es dizir muy grande -  kon konferensias, tiatro, muzika, i mas - i atiran muncha djente, komo en Estambol o Yerushalayim.  No solo ke se inche kada sia del auditorio de 300 personas, se inche tambien un segundo salon ande amostran las prezentasiones en ekran, i aun kon esto, muncha djente keda sin poder entrar! Basta echar un ojo al artikolo de la semana pasada en el Forward ( el mas grande jurnal djudio-amerikano) para entender la grande reushita del treser DIdL de New York, ke tuvo lugar el 12 djenayo de 2020. Aki el artikolo: 

 

https://forward.com/culture/438232/why-ladino-will-rise-again/

 

         En Dallas lo estamos fiestando oganyo el 2 de Febrero, komo siempre en la universidad yamada Southern Methodist University, kon el apoyo de la seksion de Estudios Djudaikos.  En Estambol ya avizaron los detalyos del grande program ke tienen para 16 de Febrero.  Yerushalayim, i otros lugares ya lo izieron en desiembre de 2019.

 

 

Onor i Esperansa

         No ay lugar aki de dar los detalyos de todos los eventos de DIdL, ni de todas las personas ke se okupan de realizarlos en los varios lugares  kada lugar del mundo.  Ma no podemos avlar de este sujeto sin dar onor a  Zelda Ovadia por la maravioza idea ke prezento a Ladinokomunita en djenayo de 2013.  Ke biva munchos anyos eya, i biva su nombre por siempre en kada  DIA INTERNASIONAL DE LADINO  ke se realizara, ishallah,  en mas i mas munchas sivdades en el mundo kada anyo.

 

 

 

 

 

 

[1] Ladinokomunita es un foro de Internet para korespondensia solo en djudeoespanyol, kon mas de 1600 miembros del mundo entero.  Estava en Yahoogroups, ma desde desembre 2019 se topa en groups.io.  Kada persona ke se enteresa puede ser miembro en indo a

 

[2] https://groups.io/g/Ladinokomunita/message/44240 

 

[3] Agora es el Instituto Salti.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon