ALBERTO HEMSI PRIMER KOMPOZITOR SEFARADI KE SE DEDIKO A SALVAR DEL OLVIDO AL FOLKLOR MUZIKAL DJUDEOE


Uno de los aspektos mas ermozos i mas apresiados de la kultura sefaradi es sigurammente su foklor muzikal: las koplas, kantigas i romansas ke muestros antepasados ya kantavan en Espanya i ke, despues de la ekspulsion, kontinuaron a kantar i a transmeter de una jenerasion a la otra kaje asta muestros dias.

Es solo a partir de la primera parte del siglo pasado, komo konsekuensa de los trokamientos ke tuvieron lugar en la situasion ekonomika, sosiala i politika de kas komunidades sefaradis, ke estos kantes empesaron a ser menos konosidos. Kon el tiempo eyos kedaron de ser kantados por las muevas jenerasiones i uvieran desparesido enteramente, si no eran unos kuantos kompozitores i folkoristas ke se dedikaron a la ovra de arekojer estos kantes, notar sus tektos i melodias i traerlos al konosimiemto de los ke se interesan en la muzika sefaradi.

El primer sefaradi ke se dediko a esta ovra fue Alberto Hemsi ke nasio en 1897 en la chika sivdad Kasaba, en Turkia, i ke grasias a un bolsa de estudio ke le fue dada por la Sosiedad Muzikala de Izmir, pudo azer sus estudios muzikales en Milano, retornando a Turkia solo despues de la I Gerra Mundiala.

Kualas son las razones por las kualas Hemsi se dediko a la ovra de rekopilasion de los kantes djudeoespanyoles, lavoro ke no avia echo ningun otro miembro de su komunidad, antes de el? Kualo lo pusho, despues de aver echo sus estudios muzikales en Italia, onde embezo a konoser i apresiar la muzika oksidentala, a dedikarse a un kampo de aktividad enteramente diferente, el de la muzika folklorika, populara, de los sefaradis?

La repuesta se topa, en parte a lo menos, en una konferensia ke dio, el 23.5.1971, en la antigua sinagoga del Transito, en Toledo. En esta konferensia, en la kuala trato de las romansas i kantigas sefaradis, Hemsi konto komo en el anyo 1919, a su retorno de Italia a Turkia, onde avia nasido i onde se topava su famiya, su nona le kanto una vieja kantiga djudeoespanyola, para manifestarle su alegria i dar lores al Dio, por lo ke avia ayegado a verlo tornar a kaza, sano i salvo, despues de tanta matansa i sufriensa, en la Primera Gerra Mundiala.

Esta kantiga fue para Hemsi una verdadera revelasion. Eya le izo entender i apresiar la ermozura i la valor de las kantigas djudeo-espanyolas ansi ke el menester urjente de arekojerlas, notar sus tekstos i melodias i publikarlos afin ke no sean ulvidados.

Enkorajado por algunos amigos i ispanistas, Alberto Hemsi se dediko a este lavoro kon una ardor i una enerjia kada vez mas grandes, arekojendo los tekstos i melodias de diezenas de kantigas i romansas de los djudios de Rodes i de Turkia, ke el publiko, mas tadre, en los 10 volumes de sus “Coplas Sefardies. Ma, sigun lo dishimos mas ariva, el no se kontento de publikar las melodias solo de estos kantes, sino ke les adjusto tambien un aranjamiento para piano.

Durante largos anyos, asta ke sigiendo su exemplo, otros investigadores i kompozitores sefaradis komo Leon Algazi i Yitshak Levy tambien empesaron a publikar sus livros kon el teksto i la muzika de kantes djudeo-espanyoles, las “Coplas Sefardies” de Alberto Hemsi fueron la unika ovra de la kuala se podian aprovechar los ke kerian kantar estos kantes kon alompanyamiento muzikal, en konsertos i resitales.

En los 78 anyos de su vida, Hemsi fue aktivo en otros kampos tambien de la kreasion muzikala: el fondo en Alexandria una kaza de edisiones muzikales i kuando se paso a Paris, dirijo unos kuantos koros de kales sefaradis, kompozo muzika liturjika i enrejistro un disko kon kantes de hazanut sefaradi. Ma su ovra mas importante fue sin duda las “Coplas Sefardies“.

En una letra ke eskrivio, antes de su muerte en 1975, Alberto Hemsi ekspreso el dezeo ke su ovra fuera publikada por la Universidad Ebrea de Yerushalayim. Su dezeo ke fue kumplido en 1995, grasias a una kolaborasion entre el Departamento de Investigasiones Muzikales de esta universidad i la ija de Hemsi, la Sra Alegra Binun de Paris, ke entrego los orijinales de las romansas i kantigas ke arekojo su padre, djuntos kon los areglos muzikales ke les kompozo.

Alberto Hemsi fue un pionero ke su exemplo fue segido por otros importantes kompozitores i muzikologos. Es grasias a sus esforsos ke fueron salvados del ulvido munchos sienes de los mas ermozos de muestros kantes, kantados i apresiados en muestros dias, no solo en Israel, sino ke en munchos paizes mas en diversas partes del mundo.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon