EL ESTADO DJUDYO DE HERTZL.

September 11, 2019

 

No ay oy en Israel i en el mundo djudyo persona ke no konose la vida i la vizyon de este eminente djudio, ke de su Vienna lechana penso i dezvelopo la idea de un estado djudyo para reglar la kestyon djudia en una evropa antisemita i kruela.

 

No se save si la idea le vino en Paris durante el proseso del kapitano Dreyfus o si mizmo muncho mas antas, viendo ke el antisemitizmo relijiozo se transformo en antisemitizmo nasyonal, la situasyon de los djudyos en evropa, tiempo pasando se izo mas i mas perikoloza.

 

En 1896 el eskrivyo su livro “Der Judenstaat” (El estado djudyo) onde establisyo las bazas de un nido en la Palestina Otomana tyerra istorikamente aparteniendo a la uma djudiya.

 

Mas despues, Hertzl kon su sigundo livro “Altneuland” (Tel Aviv), publikado en 1902, establisyo las bazas del Sionizmo politiko, la manera ke los djudyos devrian krear i dirijar sus estados, en establisiendo una demokrasiya iguala para todos los ke biveran en tyerras prometidas.

 

Hertzl mensyono la egzistensya de los arabos ma no komo una nasyon independente, ma komo abitantes en siertas partes del Yishuv, visto ke la Palestina era tyerra otomana en la kuala no avia en 1902,dainda movemientos nasyonales. Devo de ajustar ke Hertzl no fue la primera persona en el 19 sieglo a tener la vizyon de un estado djudyo.

 

Moses Hess i Leon Pinsker eskrivieron un livro sovre el sujetto, el kual no tuvo un efekto favorable en el mundo djudyo komo el de Hertzl. Ademas devemos saver ke Hertzl no solo era un personaje kon vizyon ma en mizmo tiempo un ombre de aksyon. El kreo una organizasyon ke se izo kon el tiempo la baza del estado Israeliano,ke egzistyo del empesijo del Komite Egzekutivo del Kongreso Sionisto fina 1948 a la formasyon del Governo provizoryo del estado de Israel. No fue nesesaryo a la kreasyon del estado de krear una kostitusyon por ke en el Yishuv ya egzistiya munchos partidos politikos kon diferentes tendensyas i una disiplina kultural politika.

 

Se puede dizir ke Hertzl no solo establisyo los prensipyos komo fondar el payis ma komo devia ser la natura demokratika del futuro Israel. El izo la deskripsyon del’ commonwealth’ djudyo komo devia apareser en 1923 en el Yishuv, i no se yerro. El deskrivyo en su livro komo el payis asemejara, komo van a ser sus

institusyones, i la vida sosyala de los abitantes. El mos ambezo ke no solo los djudyos tenemos derechos sosyales ma en mizmo tiempo ovligasyones enverso el estado ke kreyimos. Les atribuyo a las mujeres el derecho de votar koza ke mizmo en evropa no se aplikava dainda, evenimiento revolusyonaryo para akea epoka.

 

Hertzl komo jurnalisto aklarado durante su sejorno en Paris se rendyo kuento del rasismo en la mayoriya de la Evropa i ke el sistema diktatorial de munchos payizes era kontra el prensipyo de la demokrasiya ke el prekonizava .

 

En su penseryo no avia lugar a un rasismo djudio el kual era kontrario a los mandamientos de la Tora. El akodro en su livro ke los djudyos fueron esklavos en Egipto i por esto deven establisir un sistema bazado sovre la nasyonalita iguala para todos los sivdadinos del muevo estado sin diskriminasyon relijioza.

 

Un elemento adisyonal de su penseryo fue ke el kritikava el sosyalizmo revolusyanoryo i también visto sus dilemas sovre el kapitalizmo, de no aplikarlos tal i kual.

 

Israel devia tener un rejimen miksto, una meskla de las dos tendensyas ke la yamo:’mutualizmo’. Hertzl tomo lo mijor de estas dos doktrinas a saver la libertad i la inisyativa privada del kapitalizmo i la justisya i ekualitad del sosyalizmo, en termos aktuales kreo una demokrasiya sosyala, idea ke no egzistiya en la epoka onde Hertzl se dyo a entender.

 

Hertzl no kijo ke la nasyon djudia tenga una armada visto ke el estado una ves establisido kon la velunta internasyonala, no la nesesitera. Malgrado esto el propozo ke los mansevos ijas komo ijos devran azer un servisyo sosyal de dos anyos antes de ira a estudiar en las universitades, ansi provar un solidarizmo nasyonal.

 

El profesor Avineri,espesialisto de istoria sovre todo de Hertzl, en una de sus deklarasyones konsernando el livro Tel Aviv mos da a entender ke Hertzl no era relijiozo ma ke el tenia respekto enverso la relijion ke pensava ke eya es un importante elemento sosial de unyon i armonía de la konsensia djudia.

 

El mizmo avia eskrito ke fraguar el treser Beth Amiktash no ande se topa la mishkita ma en otra parte de Yerushalayim sera el mijor remedyo a esta kestyon difisil, i komo no se azeran mas korbanes, esta grande sinagoga sera un lugar de orasyon moderna ,ortodoksa, onde los ombres i las mujeres se asentaran aparte.

 

En fin ajustare ke “Altneuland” fue el model istoriko de la tentativa del Sionizmo ke konosemos, i ke Hertzl fue entre todos los aktivistos, politikos i ombres de siensa ke se dedikaron al estudyo del djudaizmo moderno i de la fondasyon del estado de Israel, el ke mos ambezo lo mas komo parvinir a tener un payis yeno de esperensa, demokratiko, ekonomikamente adelantado i fuerte. .

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon