LOS SEFARADIS DE JAMAICA


LOS SEFARADIS DE JAMAICA

Mordehay Arbell

El deksplorador i eskuvridor del kontinente amerikano Cristobal Colon, yamado tambien Cristoforo Colombo, estuvo en la izla de Jamaica en su segundo i kuatren viaje. Komo rekompensa por el deskuvrimiento de Amerika, la Korona Espanyola lo nombro governador de las tierras ke deskuvrio. Despues de el, su ijo Diego Colon, fue nombrado governador de Santo Domingo i Jamaica. Despues de su muerte le suksedo en este posto su ijo Luis Colon i kuando este murio, siendo ke no tenia ijos, su eredera fue su ermana, Isabela Colon ke mas tadre se kazo kon un konde portugez. Sus ijo, Portugalo Colon autorizo la imigrasion a Jamaica de djudios portugezes, ke en sus mayoria eran djudios konversos atirados a esta izla porke ayi no avia inkizision i los konversos podian bivir en paz, sin persekusiones.

Estos “kristianos muevos” vinieron a Jamaica entre los anyos 1530-1640. En 1665 kon la ayuda de los sefaradis, los inglezes okuparon a Jamaica, los espanyoles fueron exilados ma los portugezes pudieron kedar. Una parte de entre eyos tornaron aviertamente al djudaizmo. Djuntos kon otros djudios ke vinieron de Amsterdam, Bordeaux, Bayona i Hamburg, eyos fundaron una komunidad en la kapitala de Jamaica, Port Royal, fraguaron una sinagoga i yamaron komo haham a R. Yeoshua Hizkiyau Pardo, desendiente de una famiya de Saloniko.

En 1692 un fuerte terretemblo sakudio a Port Royal, kavzando tambien un tsunami, una djiganteska ola de la mar ke undio kompletamente a la sivdad i la desho undida asta muestros dias. La sinagoga fue destruida, el haham desparesio i los djudios ke avian echo de Port Royal un sentro para el komersio kon las kolonias espanyolas, se dispersaron en toda la izla. Eyos fundaron numerozas chikas komunidades ma la mas parte de eyos se aresentaron en la sivdad de St. Iago de la Vega ke los inglezes yamaron Spanish Town. En esta sivdad fue fondada en 1704 la sinagoga sefaradi Neve Shalom ke era komo una kopia de la sinagoga sefaradi de Londra. En un dokumento de esta epoka vemos ke en Spanish Town avia entonses 700 kristianos blankos, 240 soldados i 350 djudios. Komo haham eyos eskojeron a Yeoshua Hizkiyau de Cordova, desendiente de una famiya de Estambol.

Entremientres los inglezes fondaron una mueva kapitala, Kingston i munchos de los djudios de la izla se pasaron ayi. En 1744 eyos inauguraron sus sinagoga, “Shaar ‘Hashamayim” i mas tadre fraguaron otra sinagoga “Shaarei Shalom”. En 1882 un grande fuego kemo la gran parte de las sinagogas sefaradis i eshkenazis en la izla i en 1907 un terretemblo destruyo las sinagogas una vez mas. En 1912 fue rekonstruida la sinagoga “Shaarei Shalom” ke sierve a las komunidades eshkenazi i sefaradi asta oy.

Numerozos djudios se aresentaron en otras partes tambien de Jamaica kreando ayi komunidades komo las de Montego Bay, Palmouth, Savanna la Mar, Port Antonio, Ocho Rios i munchos mas.

La prova de sus ekspansion en toda la izla es dada por los 23 bedahenes djudios ke se topan en Jamaica.

Un poko de statistika para tener una idea del numero de djudios ke bivieron en esta izla: en 1735 la komunidad kontava 800 almas; en 1871 : 1798; en 1881 – 2535;; en 1978 – 350. Oy dia biven ayi solamente250 a 300 djudios.

Los djudios de Jamaica fueron muy diskriminados por los inglezes. Para ke no tengan plantasiones se les defendio de tener ovreros kristianos i eyos duvieron abandonar la agrikultura. Los merkaderes djudios ke krearon en Jamaica importantes sentros komersiales tuvieron ke pagar taksas espesiales: para fraguar kaminos i puertos, mantener los militares, etc. Los inglezes kerian mantener a los djudios komo merkaderes de primera klasa ma komo sivdadinos de segunda klasa. Eyos no podian votar ni ser elijidos. Es solo en 1831, despues de la eleksion del lider djudio Moshe Delgado, ke fueron rekonosidos komo sivdadinos kon derechos iguales. Los djudios fueron los ultimos a resivir estos derechos, despues de los katolikos i de los afrikanos.

La komunidad djudia de Jamaica dio al mundo personajes importantes: Daniel Lopez Laguna, nasido en 1615, pudo fuyir de las torturas de la inkizision a Jamaica onde trezlado los Salmos biblikos a un espanyol poetiko; Isaac Mendes Belisario, nasido en 1790, es rekonosido komo el pintor nasional de Jamaica. El pinto a los afrikanos, entre otras, en una seria de timbros para la posta jamaikana, komo iguales a los blankos i no komo inferiores; miembros de la famiya Cordova fondaron en 1833 el prinsipal jurnal de Jamaica ansi ke periodikos en Texas i Illinois en Estados Unidos. Eyos lucharon por la independensia de Kuba; Jorge Ricardo Isaacs (1837-1895) ke era orjinario de Montego Bay, eskrivio en Colombia el primer romanso latinoamerikano.

Oy la komunidad djudia de Jamaica ke segun lo dishimos konta serka de 300 almas, es muy respektada i goza de igualdad i prestijio.

4800

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon