LA PREZENSIA DJUDIA EN LA AMAZONIA

August 13, 2019

 

La prezensia djudia en la Amazonia, en Brasil, empeso en la primera dekada del siglo 19, kuando yegaron ayi imigrantes djudios de Afrika del Norte espesialmente del antiguo Maroko espanyol, atrayidos por el kauchu, ke era ekstraido de las “seringeras”, arvoles ke se topavan entonses en abondansia en las djunglas amazonikas. El kauchu es, sigun se save, la materia prima uzada para la fabrikasion de pneumatikos i munchos otros produktos i su ekstraksion, elaborasion i eksportasion prezentavan grandes posibilidades ekonomikas. En poko tiempo algunos de estos pionieros se enrikesieron i devinieron patrones de grandes espandiduras de tierras, ke en akeya epoka eran dadas por el governo afin de atirar imigrantes i fasilitar el aresentamiento de nuevos kolones.

 

 

Una prova del pionierizmo de esta onda de kolones djudios es el fakto ke el djudaizmo fue la primera relijion a ser introdusida a esta rejion, despues del katolisizmo traido por los misionarios portugezes. Esta fue tambien una de las primeras relijiones en otras partes de Brasil, komo por enshemplo en la rejion del Sud, onde yego ainda antes de la kolonizasion evropea.

 

 

Despues de la fin de las aktividades de la Inkizision i de la proklamasion de la independensia de Brasil por el rey Pedro 1,  la komunidad djudia de este paiz gozo de una mas yena libertad politiko-relijioza. En 1823 fue fondada la primera sinagoga yamada Shaar Ashamaim, a la kuala se adjunto en 1826  Eshel Avraam. Las dos  funksionan ainda, kon minyan en las 3 orasiones diarias i naturalmente, en las fiestas tambien.

 

 

En la sigunda metad del siglo la sosiedad de bienfezensia Hevrat Gemilut Hasadim fue fondada por Leon Israel, ke era tambien uno de los fondadores del primer kal. Esta Hevra tenia por buto de arekojer fondos para mantener bivdas i ayudar a personas ke tenian problemas finansiarios ansi ke a los resien yegados i a los ke bushkavan lavoro.

 

 

Al prinsipio la mayoria de la povlasion djudia no bivia en Belem i Manaus, las kapitales rejionales de los estados de Para i Amazonas respektivamente. La razon de esto era ke el kauchu, el produkto baziko ke de su ekstraksion eyos se mantenian, se topava al interior, onde no avia tambien peligro de apegarse de la “fievre amariya”, una hazinura ke kavzava entonses la muerte de miles de personas.

 

 

Kon el tiempo algunos kazales se engrandesieron i devinieron sivdades, absorbiendo muevos imigrantes djudios ke kon el tiempo fondaron ayi muevos kales o bien azian minyan en la kaza de la persona de mas grande prestijio en la komunidad.

 

 

Ma los sentros kulturales i relijiozos fueron siempre las kapitalas rejionalas -Belem i Manaus- i las famiyas del interior ke tenian ijos en edad de Bar Mitsva, tratavan de embiarlos ayi para ke embezen a meldar i a konoser un poko de relijion.

 

 

Las sirkunsiziones eran echas al interior solamente kuando un mo’hel konsentia a viajar i azia el torno de los lugares onde avia povlasion djudia. Es ansi ke se podia enkontrar a vezes, ninyos de 8 i asta 10 anyos de edad ke ainda no avian sido sirkunsidos. Avia kavzos tambien ke la madre viajava antes del parto, a una de las kapitalas o a una sivdad mas grande i retornava solo despues de la sirkonsizion.

 

 

Los produktos ekstraidos de la rejion komo el lateks de las seringeras, kon el kual se azia el kauchu;  la yuta, las kastanyas i mas, eran transportados a los sentros komersiales por medio de barkas ke retornavan kargadas kon ropas, kalsados, milizinas, etc. Esta era la forma mas konosida de komersio en la kuala se distingieron los djudios.

 

 

Todo este siklo de imigrasion i kolonizasion fue kortado bruskamente por la grande mengua en la eksportasion de kauchu, despues ke 70.000 fidanes de seringeras fueron kitados ilegalmente de Brasil i plantados en Malezia por orden de Inglitierra. Komo konsekuensa de esto el presio del kauchu kayo a fondo, arastando detras de el a todos los ke lavoravan en este ramo. Los djudios ke se mantenian de esto i bivian en los sentros de eksplotasion del kauchu duvieron bushkar muevos lavotos. Eyos empesaron de muevo sus vida en Belem i Manaus i despues en Rio de Janeiro, ke en akeya epoka era la kapitala de Brasil. Eyos se arekojeron al deredor de la Esnoga Shel Gemilut Hasadim, ke ya avia sido fondada en el siglo 19, por la mizma onda de imigrasion de djudios de Maroko.

 

 

 

Los ke se aresentaron en Belem i Manaus empesaron a lavorar en primero como empleados i despues komo patrones de butikas i magazenes de todos los djeneros, prinsipalmente en los ramos de la alimentasion, madera i pishkados. Mas tadre uvo munchos ke se dedikaron a las profesiones libres en todos los sektores de la sensia ansi ke a la industria tambien.

 

 

Afin de estudiar i salvaguadrar el patrimonio kultural deshado por sus antepasados, en las diferentes fazas del djudaizmo amazoniko, un grupo de djudios de Belem fondo ayi el Archivo Jeneral de los Djudios de Amazonia, organizando ekspedisiones a las sivdades del interior onde uvo komunidades djudias i arekojendo informasiones tambien sovre las komunidades de Belem, Manaus i Rio de Janeiro.

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM

Tel: +972 36582936
Fax: +972 36573894

turkisrael@gmail.com

ADRES

Mohrey Sigariyot 7 Bat Yam - Israel

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon
İletişim ve faaliyetler hakkında bilgi almak için