Defile de Moda en el kal Zulfaris

July 23, 2019

 

Avia muncho ke no sentiamos el nombre de Zulfaris, el kal ke sirvio a la povlasion djudia  de Estambol por munchos anyos, i ke, de 1992 asta 2015 fue el sitio del muzeo djudio de la Fondasion de 500 Anyos. (Agora el muzeo es situado en parte del kal Neve Shalom.) 

 

 

Ke sorpreza ensupito ver el nombre Zulfaris demuevo en los jurnales esta semana! La razon fue ke en el mez de Marso pasado la modista turka famoza, Asli Filinta, tuvo ayi una defile de sus kreasiones muevas. El jurnal de moda Vogue eskrivyo por esto entonses, alavando la orijinalidad de los modeles i los tekstiles de Filinta, i mensionando ke la defile tuvo lugar en el " Quincentennial Foundation Museum of Turkish Jews."  I ultimamente salio el maraviozo artikolo eskrito por Matt A. Hanson en el mas konosido  jurnal djudio Amerikano, Forward, kon el titolo "Why This Turkish Fashion Designer Chose A Former Synagogue For Her Runway Backdrop" (Deke esta modista turka eskojo una sinagoga vieja por sitio de su defile.) Mas abasho vos vo dar el link del artikolo, ke tiene fotografias i un video.

 

 

Aki, a lugar de traduizir lo ke eskrivio el sinyor Hanson, vos vo avlar un poko de tres sujetos enteresantes relasionados kon este artikolo: la kehila Zulfaris, el lado djudio de la defile (asegun el artikolo), i el eskritor Matt Alexander Hanson.

 

 

 

 Zulfaris, o K.K. Galata

 

El nombre djudio del kal Zulfaris es Kehila Kedosha Galata, i es ansina ke esta eskrita en los archivos de la komunidad.  El nombre Zulfaris viene del termino otomano,  kombinasion de arabo i farsi (Persiano) zulf-u arus, ke kijo dizir la perche (perçem en turko) de la novya.  Un nombre apropriado, siendo ke munchas bodas tuvieron lugar ayi.  (Kuando vido el artikolo, mi amigo Jake Kohenak de New York me izo akodrar ke su papa i mama, Dr. Izak i Dra. Ester Kohen, se kazaron ayi el 15 Julio de 1951, i me mando la foto.  Ay de akodrar ke entonses no avia fotografear adientro la kehila.) La kava boda ayi tuvo lugar en 1983.  I finalmente, por mankura de kongregantes, el kal se serro en 1985.  La Fondasion Neve Shalom (proprietor de la fragua) la dediko para el muzeo de la Fundasion del Kinsenteneario (500 anyos), la kuala se dediko en 2001 kon la asistensia finansiaal de Jak Kamhi.

 

 

Se dize ke en este sitio ya egzistia una sinagoga en el siglo 17, ma la fragua ke vemos oy es del siglo 19, kon restorasiones en 1890 (por la famiya Camondo), i en 1904 i en 1968 tambien.

 

 

La defile

 

La modista Filinta produse i uza tekstiles de ilos naturales kon dezenyos bazados en la istoria de la turkia otomana.  Vestidos i tekstiles era profesion de djudios desdel siglo 3, komo vemos de las butikas al deredor de la sinagoga de Sardis (Sart en turko). 

 

 

En la defile uvo unos 23 kostumes, kon grande influensa de las vestimientas otomanas, ke era tambien vestimientas de djudios otomanos.  Estas remarkas son del eskritor Matt Hanson, ma a mi lo ke me vino kuriozo es lo ke le disho Asli Filinta a el: "Despues de mi prezentasion en Zulfaris, mis amigas/amigos djudios vinieron i me rengrasiaron porke les di a konoser este ermozo i istoriko lugar kon un evenimiento moderno.  Eyos nunka tenian venido ayi, i se enkantaron de verlo."  Un poko triste, ke mansevas/ mansevos djudios no tenian visto este lugar!  Esperamos ke va aver otras okaziones.

 

 

Matt Alexander Hanson, djudio Romaniot

 

Me maraviyi de meldar su biografia!  Es un eskritor i jurnalisto muy talentuozo i produktivo,  bazado en Istanbul, i me averguenso de dizir ke yo no lo konosia, i sovre todo porke algunos de sus artikolos aparesieron en El Amaneser - ke yo meldo regolarmente!  El es de famiya djudia Romaniota (en el artikolo no manko de mensionar ke la sinagoga de Sardis en Turkia era Romaniota.)  Esta eskriviendo una novela ke tiene lugar en la Gresia otomana i New York, i tambien una antolojia de literatura djudeo-grega, i serkamente se va publikar su livro de viaje yamado "The Clouds of Ioannina" (Las nuves de Yanina.)  Komo ya savesh, la maz emportante sivdad del djudaismo Romaniot es la sivdad de Yanina/Yanya/ Ioannina.  I la unika kehila Romaniota afuera de aya en el mundo se topa en New York, i se yama Kehila Kedosha Yanina.

 

 

Agora anda a meldar su artikolo en el Forward (i ver fotos i video) sovre la defile en Zulfaris, la vieja Kehila Kedosha Galata:

 

https://forward.com/life/style/427687/why-this-turkish-fashion-designer-chose-a-synagogue-for-her-runway/

 

 

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon