Lucena i sus Djudios

July 9, 2019

De entre todas las sivdades en las kualas bivieron los djudios de Espanya i en las kualas se dezvelopo sus istoria sosial, ekonomika i kultural, ay una ke se distingio partikularmente, por el lugar dominante ke los djudios okuparon en eya durante largos siglos. Es esta la sivdad de Lucena ke tuvo una poblasion totalmente djudia en tiempos tan antiguos ke ay ken pensa ke los djudios yegaron ayi djuntos kon los fenisianos, ainda en los tiempos biblikos.

 

 

Si esta es una supozision ke ainda no pudo ser provada kon dokumentos i otras provas istorikas, ya es bien savido de otra parte, ke dezde sus primeros tiempos, Lucena fue povlada por djudios, al punto ke - de mizmo ke Granada i Taragona - fue yamada "Sivdad de djudios."

 

 

En el siglo 10, kuando Cordoba era governada por Abdel Rahman 3, ke su konsejero i ministro era Hasday Ibn Shaprut, la komunidad djudia de esta sivdad konosio una epoka de prosperidad i enfloresimiento i devino el prinsipal sentro kultural i relijiozo de los djudios de Espanya.

 

 

Esta situasion kambio despues ke en el 1013 Cordoba fue konkistada por berberes ke venian de Maroko i ke los djudios fueron ekspulsados de la sivdad.  Munchos de entre eyos se refujiaron en Lucena ke era parte de la taifa, chiko reynado, de Granada.

 

 

Rodeada de rezias murayas ke la protejavan de sus enemigos, Lucena era tambien una sivdad de grande ermozura i al mizmo tiempo un importante sentro industrial i komersial. Segun un eskritor arabo del siglo XII, los djudios de ayi eran mas rikos ke en kualkera otra de las rejiones dominadas por los arabos. El jeografo arabo Sherif al Idrisi eskrive a este sujeto, ke los musulmanos de Lucena bivian en terrenos al deredor de la sivdad mientres ke en la sivdad mizma, adientro de las murayas, bivian solo djudios.

 

 

Los djudios de Lucena gozavan tambien de una yena otonomia en sus kestiones internas. Eyos tenian un Gran Rabino ke era elijido por la komunidad i era la mas alta otoridad en todas las kestiones siviles, kriminales i relijiozas de la povlasion djudia de la sivdad. El konsejo munisipal era elijido por los viejos i los padres de famiya, de manera ke se puede dizir ke esta sivdad era en sierto modo una republika djudia.

 

 

En desparte de su buena situasion ekonomika, la komunidad de Lucena era tambien un importante sentro relijiozo, kon una akademia talmudika, enkavesada – a lo largo de su istoria – por figuras komo Ishak Ibn Gayyat, Ishak Al Fasi i Yosef Halevi ibn Mair ibn Megas, i kontando entre sus mienbros personalidades komo los poetas Ishak Ibn Mar Shaul i Ishak ibn Chikitilla ansi ke Avraam Ibn Ezra.

 

 

Esta akademia resivia demandas, sovre temas de la relijion, de otras komunidades de Espanya i tenia tambien relasiones kon las akademias talmudikas de Sura i Pumpadita, en Babilonia

 

 

La buena situasion de los djudios de Lucena se kontinuo mizmo kuando Andalusia paso al poder de los almoravides, enkavesados por Yusuf ibn Tusafin, ke avia sido invitado por las taifas, para defenderlas kontra los atakos de las fuersas espanyolas ke venian del norte. Ma en  lugar de ayudar a los arabos de Andalusia, los almoravides , pasaron bien presto a ser los dominadores de esta rejion, konkistando las taifas, una detras de la otra.  Los djudios de Lucena akodrandosen  de lo ke akontesio a los djudios de Cordoba kuando esta sivdad fue konkistada por un trivo mas integrista ke avia venido de Maroko, rezolvieron el problema en deklarandosen vasales de Yusuf ibn Tusafin, lo ke les permetio de bivir en paz.

 

 

Durante todo el tiempo ke los almoravides kedaron al poder, Lucena kontinuio a prosperar, tanto en el kampo de la aktividad ekonomika ansi ke en el kampo de la aktividad kulturala djudia, yegando a ser el prinsipal sentro, en la Espanya de esta epoka,  de konosimiento i interpretasion del Talmud.

 

 

La situasion kambio kon el arivo a Andalusia de los almohades, un trivo arabo de Maroko, muncho mas fanatiko en temas de relijion, ke ovligo a los djudios de esta rejion a eskojer entre la konversion al Islam o la muerte.  Kon esto yego la fin de la komunidad djudia de Lucena ke sus miembros tuvieron ke bushkar azilo en las sivdades kristianas, al norte de Andalusia

 

 

 

 

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM

Tel: +972 36582936
Fax: +972 36573894

turkisrael@gmail.com

ADRES

Mohrey Sigariyot 7 Bat Yam - Israel

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon
İletişim ve faaliyetler hakkında bilgi almak için