KONDUKTA DE ISRAEL ENVERSO LA EVROPA UNIDA (EU)


El alhad pasado los evropeos votaron en 28 payizes de la Evropa Unida (EU) sus deputados ke los reprezantaran en el Parlamento Evropeo. Despues de estas eleksyones no se aspera grandes trokamyentos en la politika de Brussel, visto ke las tendensyas politikas lomas kedaran komo akeyas del pasado. La derecha evropea populista reprezentada en nombre bastante importante, se aspera ke influensera la politika estranjera de manera de ser mas favorable a Israel,kontra akea de los Vedres ke mantienen una inimista fuerte dezde anyos. Pekado ke los evropeos esta vez votaron en masa por eyos.  

La formasyon de un muevo governo en Israel si sera enkavesado por Benjamin Netanyahu devra tomar dechizyones esensyalas para aserkarse de la EU i de mirar de amadugar la politika dura de Brussel enverso Israel ke tura dezde mas de 10 anyos onde las relasyones se yelaron a bastante i ke el Konsilyo Israelo/EU ke en prinsipyo ke devia arrekojerse una ves al anyo, no se reuniso dezde ek 2012. Las relasyones yeladas mos izo pedrer la kooperasyon ekonomika i de investigasion akademika i ke eya kayga al nivel el mas basho ke puede ser. Ke lo kereremos o no, la EU despues de los Estados Unidos es la mas grande ekonomia mondiala kon mas de 400 milyones de abitantes i el primer sosyo komersial de Israel. Ay urjensia de topar formulas diplomatikas para mirar de estableser muevas bazas de kooperasyon. Israel kale ke abandone la stratejia kurta i ke mire de dezvelopar una ancha i larga.

La inimista la mas importante de los dirijentes de la komisyon etranjera enkavesada por la sinyora Federica Mogherini es ke Israel no mostra buena volonta para ke las tratativas de solusyonar el konflikto Israelo- palestiniano yege a una pas . Esta mantalidad de akuzar a los dirijentes israelianos empeso ay mas de 10 anyos despues ke Netanyahu se izo primer ministro. Ademas la komisyon dechizo de no achetar los produktos fabrikados de la otra parte de la’ linya vedre’ komo produktos israelianos. Malgrado toda la kapachitad de muestros diplomatos i de Netanyahu ke los dirije, no uvo remedio ke de abokar kavesa i de achetar las kondisyones de Brussel. 

Las relasyones entre Israel i la EU durante los anyos pasados tuvieron siempre altos i bashos. Lo mas alto fue en el 1990 despues de los akordos de Oslo. La luna de myel entre las partidas tuvo lugar en 2005 kon la salida de Gaza i turo fin el 2008 data en la kuala empeso el konflikto kon el Hamas. Netanyahu durante este periodo no kedo kon las manos atadas, i el de su parte miro a dezunir siertos payizes evropeos de la politika impozada por Brussel. La Gresia i Chipro, se ajuntaron kon Israel en la Aliansa Mediteranea del Este sovre el gas ke se topo en la mar. La Gresia ayudo mizmo a aretar una dechizyon de la komisyon de la EU kontra Israel en 2016. Esto fue posivle despues ke los dirijentes gregos trokaron sus aktitud negativa a pozitiva enverso Israel. 

Netanyahu ansina miro de dezunir para enderechar a su manera la politika de siertos payizes miembros de la EU enverso Israel. Establisyo relasyones amikalas kon los governos de la evropa oryantal i espesyalmente kon los governos polonezo i ungarezo, malgrado sus politikas internas antidemokratikas. No se aturvo de tratar kon el governo Rumano malgrado la korrupsyon alta. Sus relasyones kon la Italia sovre todo kon el dirijente Salvini no mareo a dingunos en Israel. Israel el demokratiko, el liberal,el respektuozo de la justisia fue a un sierto momento obligado de serrar sus ojos i tapar sus orejas afin de formar de estos payizes de la Evropa oryantal un klub pro Israeliano el kual bloko rezolusyones kritikas kontra Israel al seno de la komisyon de Brussel. Esta politika mos ayudo en siertos momentos flakos entre los miembros de la EU, ma fue i es de kurto tiempo. De otra parte no se save lo ke trayera el Brexit (la separasyon de la Britania) Eske vamos a ver otros miembros espartirsen de la Union? Es demprano de dezvelopar un punto de vista, ma en todo kavzo Israel kale ke pense en terminos largos i ke mire en su entereso de krear amistad i konfiensa kon los payizes de la Union en jeneral. No mos olvidaremos ke al tiempo en evropa, Israel era konsiderado komo la sola demokrasia del Medyo Oriente, payis de inovasyones teknolojikas kon una ekonomia dezvelopada al nivel evropeo. Esta idea no desparesio de la memorya evropea malgrado el antisemitizmo alto , Israel deve guadrar esta fama i mirar de ser amigo mizmo kon el ke no lo estima. Israel es el solo payis djudio en el mundo i por esta razon deve de ser model de todo punto de vista. La Eurovision fue un buen egzemplo. 

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon