Kuentos i Konsejas en Ladino


Ke azian muestros padres en los tiempos ke no avia ni radio ni televizion i ke el uzo de los sefaradis era de pasar la noche adientro de kaza, kon la famiya o kon los vizinos? Uno de los divertimientos los mas populares de akeyos tiempos era el de sintir a muestras madres, nonas o vizinas kontar los ermozos kuentos i konsejas de muestro folklor. Sovre todo en las largas noches de invierno, kuando eskuresia bien presto i toda la famiya estava en kaza, arekojida al deredor del "tandur", ke plazer era de eskuchar las konsejas sovre las fantastikas aventuras de prinsipes o kavayeros barraganes, o de mansevos proves ma intelijentes i korajozos, ke kombatiendo kontra dragos i leones, o kontra ichizeras i reyes krueles, riushiyan siempre a salvar a sus keridos i yegar a porto a salvo, malgrado todas las difikultades i todos los peligros ke los enfrentavan.

Naturalmente, no todos los ke kontavan estas konsejas riushiyan en la mizma mizura a kaptivar la atension i el interes de la audiensa i mantenerlos durante todo el tiempo ke se kontava la konseja, ke a vezes era bien larga i entrafinkada. La riushidad dependia del talento del kontador ke devia ser una persona de grande elokuensia, ke savia avlar bien i sovre todo, komo dramatizar sus palavras, dando vida a sus eroes, komo si eran eyos mizmos ke avlavan.

Si el ke kontava la konseja, o seria mas djusto dizir "la ke kontava", siendo ke en la mayoria de los kavzos eran las madres o las granmamas ke azian esto, si la ke kontava era buena, todos los ke estavan a su deredor la eskuchavan kon los ojos apegados a su boka, para no pedrer ni una sola de sus palavras… Eyos konsentian las emosiones de los personajes de la konseja de una manera tan biva i intensa ke munchas vezes se atristavan o se alegravan, riiyan i asta yoravan komo si se tratava de personas reales, de karne i gueso. Enkantados por estas konsejas, eyos se ulvidavan de sus vida de kada dia i se imajinavan estar en un lugar maraviyozo, en medio de fadas i donzeyas, reyes i prinsipes ke bivian en kastiyos de oro i de marfil, onde se avlava de gerras i de aventuras, de arrevatamientos de donzeas por dragos estremesedores, o de intrigas de palasio… i mas i mas. I kuando la konseja se terminava, todos paresian retornar de un mundo fantastiko i maraviyozo.

Una de las karakteristikas mas interesantes de las konsejas, en desparte del fakto ke tratavan de evenimientos imajinarios, era ke eyas tenian un empesijo i una fin estilizados o sea ke empesavan i se terminavan siempre kon las mizmas o kaje las mizmas palavras komo, por enshemplo: "Andavia de ser o avia de ser… un ijo de rey… i se uzava terminar el kuento kon las palavras: Eyos tengan bien, i mozotros tambien…

Ma no solo al prinsipio i a la fin de la konseja, sino ke en medio tambien avia ekspresiones, se podria dizir "klasikas", ke tornavan i aparesian frekuentamente. Ansina es ke kuando la konseja kontava sovre un drago o un leon o otro animal ke estava por despedasar a uno de los personajes, la kontadera dezia kon una boz dramatika, impersonando a este animal: "Detente ombre, ke te vo komer!" a lo kual respondia, kon la boz del personaje ke estava por ser despedasado: "No me komas ni me komeras!"

O bien, kuando se keria azer entender mijor la soledad de los kampos por los kuales iva uno de los personajes de la konseja, fuyendo de su kaza o bushkando algo ke devia topar, se dizia: "Kaminando por kampos deskampidos, onde ni gayo kanta ni perro mauya…"

Aki kale azer una distinksion entre las konsejas i los kuentos. Esto no es fasil siendo ke en realidad, estos son dos tipos de narrasion ke se asemejan muncho: Ay kuentos ke eyos tambien tratan de evenimientos fantastikos i maraviyozos, mientres ke tenemos "konsejikas" ke asemejan mas a kuentos ke a konsejas. La difikultad puede ser mijor entendida si se toma en konsiderasion ke este es uno de los kampos menos estudiados de muestro folklor i a este sujeto fue eskrito muy poko solo.

Ma tomando en konsiderasion el poko material dokumentario ke tenemos en este kampo kreo ke se puede apuntar dos diferensias prinsipales entre el kuento i la konseja.

1. Las konsejas tienen una lengua mas arkaika, kon palavras de antes de la ekspulsion de Espanya, i kon un mas grande aksento sovre evenimientos fantastikos i imajinarios.

2. Las konsejas no tienen dingun prinsipio moral i edifikante siendo ke sus buto es simplemente de divertir a la djente. Es ansina ke ay munchas konsejas en las kualas los eroes kometen aktos ke en otras sirkunstansias uvieran sido konsiderados komo krimenes de los mas graves, ke deven ser lo mas duramente kastigados, ma en las konsejas tales aktos paresen muy naturales i akseptables. Los kuentos, a la kontra, son jeneralmente bazados sovre un prinsipio moral ke vienen a eksplikar i a ilustrar, o sovre una kualidad o virtud konsideradas pozitivas i provechozas; i ay tambien kuentos komo los de Djoha ke sus solo buto es de azer riir a la djente.

Ma en realidad, a parte de estas dos diferensias ke munchas vezes no son bastante klaras, los kuentos i las konsejas se asemejan muncho i gozan, o seria mas exakto dizir gozavan, de la mizma popularidad. Kon la aparision del sinema, de la radio i sovre todo de la televizion, la konseja i el kuento ya deskayeron de sus grandeza. Muy pokos son los ke los kontan ainda, i es pekado, porke estos son verdaderos trezoros folklorikos i linguistikos ke estan siendo ulvidados i ya no son mas transmetidos oralmente, de una jenerasion a la otra.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon