PAX AMERICANA

May 14, 2019

 Paz ke propoza la administrasion amerikana dicha “ plano Trump de paz del milanyo” , donde el prezidente de los Estados Unidos el sinyor Trump, ke enkavesa la mas grande potensia  politiko/ militar del mundo i ke es un  grande amigo i suportar de Israel kere  estableser     entre Israel i los Arabos..  El plano kedara sekreto fin a la fin de las fiestas djudias i musulmanas i se pensa ke sera publikado verso la fin de Junio, antes ke  los aparejos de muevas eleksyones amerikanas del 2020 empesen. La intelijensia israeliana i araba  dan sus avisos spekulativos sin konoser en detalyo el plano ke se aparejo dezde muncho tiempo i los ke son informados de su kontenido no depasan los dedos de dos manos a mayoriya altos fonksyonaryos de la administrasyon Trump i puede ser  Netanyahu i   Abbas, los kualos no disheron koza grande al sujeto de este plano fin oy en dia.  Ma Abbas  deklaro al prensipyo sin mizmo saver el kontenido del plano ke lo arronja porke  no ve los Estados Unidos komo un arbitro neutral.  

 

Uvo unas kuantas palavras de ofisiales de los governos del Medyo Oriente ke  pretenden deskuvrir  ke el plano es por lo mas en favor de Israel sovre todo konsernando los territoryos en pleto. La kestyon de amadugar Israel i los arabos palestinianos, fue i sera muy difisil de resolver , porke las partidas luchan por la mizma tyerra i en dingun kavzo no miran de azer konsesiones para arivar a una paz djusta i achetada por el puevlo djudio  i los arabos en jeneral.  Fue i sera muy difisil de konvenser las dos partes de aunarse para bivir endjuntos pasifikamente en la mizma tyerra, ma apartados. .  Dunke no savemos si el  plano Trump reushira a trayer la paz o si sera el ‘ enyen ‘ tentativo  de negosiasyones vanas.

De mi parte pensi ke sera konvenyente de darvos dos opiniones diferentes sovre el sujeto, una araba i la otra israeliana para aklarar lo ke se pensa de las dos vandas del konflito.

 

De la parte araba eskoji  lo ke mos ambeza Bassam Tawil del  Instituto Gatestone , ke deklaro al empesijo del anyo2019  sovre la rezolusyon  de los palestinianos los kualos refuzan todo modo de kompromizo de paz kon Israel.  El dize:

 

  • La revolusion palestiniana kontinua dezde 54 anyos.  Eya kontinuara fin ke el dezeo de muestro puevlo sea realizado… Deklaramos klaramente todo modo de formas de resistensia son lejitimas.

  • Los lideres palestinianos no ofresen a sus puevlos una mijor vida, prosperidad, sekuritad i stabilidad. Al kontrario eyos insisten a ke el puevlo arabo  kontinue a aborreser Israel i los Estados Unidos.

  • Una karta publikada por el Fatah en el Facebook deskrive “Palestina” komo una sola entitad de la Sisjordania inkluendo la jeografia de Israel.

  •  Estos mesajes provan sin duvda ke todo modo de negosiasiones de paz muevas entre Israel i los palestinianos no son ke kashkarikas bazadas sovre el rovo. Los dirijentes arabos nunka kereran asentarsen a una meza de negosiasion kuando eyos pushan dia por dia, a sus puevlos de azer korrer siempre mas la sangre israeliana en las kalejas de Yerushalayim..Los palestinianos lo dizen klaramente ke sus verdaderas entinsyones son de armarse i de ver Israel dispareser de la karta mondiala.

 

De la parte israeliana vos  prezento a Amos Gilead importante personaje,  konsejero de muncho tiempo del governo israeliano  ke dize:” Trump no devra presentar su plano sin ser siguro ke 75 porsiento de los palestinianos i arabos en jeneral no lo arrondjaran de vista”.  Koza ke le parese muy probable  en su deklarasyon al Jerusalem Post i de no ser siguro del kontenido del plano ke no konose, el kual  le parese difisil de azerlo achetar a los arabos.  El ajusto “presentar un plano ke no va ser probabilmente achetado podra destabilizar la situasion aktual visto ke esto demonstrara ke no egziste una opsion de paz.”

 

 Ademas el sinyor Gilead dize: “ Si los palestinianos no se asetan a la meza de negosyo ,va ser muy difisil para los payizes arabos de achetar el plano, porke la kaye de sus payizes por siguro se sulevantara i kreyara un truvyo danjerozo  kontra el poder dirijente”.

 

Abbas i los dirijentes del Hamas i del Djihad de sus partes, por siguro akuzaran de traysion a kualker paiz arabo ke achetara la propozisyon amerikana  i esto podra destabilizar siertos payizes del golfo i la Arabia Seudita ke todo en keryendo estar en buenos terminos  kon Israel por mirar de defenderse del inimigo komun el Iran shiito, no keren absolutamente ke se sepa publikamente ke eyos tratan kon el inimigo israeliano, i ke mizmo  todo modo de relasyon kon el kede sekreto.   Este status kuo no deranja los israelianos, al kontraryo los ayuda a bivir en segurita.  Porke Trump mira de trayer muevos remedyos de paz en esta  parte del mundo  onde el islam djihadisto no aspera ke una okazion se le presente para organizar truvyos al seno del mundo sunito.

 

Dire ke en la jeografiya en la kuala bivimos nunka avra kalmo i buenas relasyones entre los payizes ke la kompozan , lo ke sera nesesario para los israelianos  es solo la pasensia de areyevar atakes i ser militarmente organizados para defendersen kon fuersa.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon