Djohá al restorante

Una vez Djohá se fue al restorante. En la puerta del restorante estava eskrito:

"Kada uno paga sigún el dinero ke tiene".

Djohá entró al restorante, ordenó a komer, i komió i komió i komió...

Kuando eskapó de komer se alevantó i se dirijó a la puerta de salida.

Le disho el patrón del restorante: "Ey! Paga por lo ke komites! I komites muy muncho!"

Djohá kitó una moneda de una lira ke tinía en la aldukera i la dio al patrón del restorante.

Le disho el patrón del restorante: "Kualo es esto?! La komida ke komites kosta muncho mas de esto!"

Le respondió Djohá: "Enriva de la puerta está eskrito: Kada uno paga sigún el dinero ke tiene, i éste es el dinero ke tengo yo!"

Kontado por ISHAY AHARON COHEN - 2004