Topadura Grande: despues de 30 anyos kon la famiya Kohen-Yanarocak

May 7, 2019

Entre la djente ke asistieron al program de la Itahdut (asosiasion de Turkanos en Israel) en memoria de mi ermano Selim Amado, el 29 Marso 2019 en Tel Aviv, estavan David i Sara Kohen Yanarocak, i sus ijos Soni i Hay Eytan. Eyos los konosian a Selim, i , komo otros ayi, vinyeron a onorarlo.  Muy normal.

 

 

Ma tambien eyos vinyeron para verme a mi! Hay Eytan mezmo trusho a su ijika Sary para ke me konoska.   Yo se orijinaria de Izmir. De ande me konosen estos Istanbullis? 

 

Vos kontare.

 

La estorya empesa en1984, kuando me aboni al Şalom, jurnal djudio de Istanbul.  En  Şalom meldava kon grande admirasion los eskritos i las poezias de Siyon Kohen Yanarocak (z"l)  ke eskriviya en djudeoespanyol i en turko. El eskriviya tambien en Aki Yerushalayim, la revista en djudeoespanyol (dirijida i redaktada por Moshe Shaul) a la kuala yo era tambien abonada de ke empeso a apereser en 1979.  Le eskrivi una letra al Sinyor Kohen, el me respondio kon ardor, i entrimos en una korespondensia ke turo munchos anyos. (Entonses no teniamos email, letras eran eskritas a mano, metidas en envelop, i mandadas por posta kon la marka "Par Avion." ) Tomi grande plazer de esta korespondensia, i me embezi muncho de el, sovre todo de kozas de la lengua, literatura, i tradision sefaradi.  Ma no lo konosi en persona asta Oktobre 1989 kuando ize un viaje a Turkia i Israel. Seguro ke el Sr. Kohen ya estava al koryente de este viaje de muncho antes, i el kon su estimada espoza Korin (z"l) me resivieron en sus kaza en Istanbul, i despues endjuntos fuimos a la kaza de sus ijo David, ande estavan David, su mujer Sara, i sus dos ijikos Soni de 12 anyos, i Hay de 5 anyos, ansi ke Hayim, ermano de David, i su mujer Ester.  Yo ya savia ke David i Sara kantavan muy ermozo i David tanyia gitara (eyos fondaron el grupo muzikal Erensya Sefaradi, de kantes orijinales en ladino kompozadas por David, kon biervos de Yusuf Altintas,  i tienen enrejistrado CDs, i ainda dan konsertos) ma topi ke la famiya entera tenia dono en muzika i kantar.  Soni (o Siyoniko, asigun lo yamava su papu) estava en el koro de kriyaturas fondado por Izzet Bana i savia kantikas en ladino.  Mos kanto unas kuantas akeya noche,  me respondio mis kestiones, me prezento a todos los de ayi (todo en espanyol/ladino),  David kanto kon su padre, Sara kanto, i mas.  Yo tenia mi aparato de video kon mi, i lo filmi todo.

 

 

Este filmo (en rulo, komo era akel tiempo) kedo guadrado por serka 30 anyos! Entre mientres yo fui a Turkia demuevo en 1991, lo vijiti al Sinyor Kohen en su kaza, vide tambien a la sinyora Korin, David i Sara, ma  a los chikos no los vide mas.

 

 

En 1994 el sr. Siyon se izo hazino i partio de este mundo (ke su alma repoze en ganeden.) El siempre fue un gran sionisto, aunke nunka pudo azer aliya a Israel.  Ma poko despues de su muerte, en 1995, su inyetiziko Soni izo aliya, i adjusto su onombre verdadero, Tsion, a su nombre.  En 2006 vino Hay i finalmente la famiya se reunio en Israel kuando Sara i David vinieron a bivir aya en 2017.

 

 

En Israel lo konosieron a mi ermano al deredor de aktividades kon la komunidad de Turkanos.  Me parese ke mas muncho lo konosia a Hay (yamado Hay Eytan Kohen Yanarocak) ke se izo un eksperto akademiko en relasiones entre Israel i Turkia, sujeto ke le enteresava muncho a Selim, z"l.  Un dia avlando kon Selim via Skype, el me konto por Hay Eytan, i yo le dishe ke lo konosi kuando tenia 5 anyos, i ke konosko a su famiya. Su repuesta fue: "De ande los puedes konoser? Eyos son de Estambol." Le konti la estorya ke vos eskrivi ariva, i le dishe ke tengo un filmo de esta vijita.  El me disho entonses ke lo bushke i lo tope este filmo, i ke lo meta en Youtube. Ma yo asta ke me okupi de bushkarlo i lo topi, paso mas de un anyo.  Entre mientres Selim mos desho la vida, i finalmente kuando desidi de ir a Israel para el midrash (meldado) del anyo, kiti el filmo enmedyo, i mi ijo Sam lo transformo al formato menesterozo, lo edito, i lo metyo en Youtube. Les eskrivi a Hay i a Soni en Facebook ke iva venir yo a Israel, i les mandi el "regalo" del video en Youtube.  Seguro se alegraron por las dos razones, i asta ke parti para Israel sienes de personas ya  avian visto el filmo de Youtube.  Asta agora mas de mil personas ya lo vieron.  (No solo ke Hay es muy konosido i avla muncho en la TV, i David i Sara dainda dan konseres, ma Soni tambien, aparte de su lavoro diario, kanta en un koro i eskrive subtitolos en ebreo para las telenovelas turkas ke son tan popular en Israel.)  Si no lo vitesh, vos do aki el link.  (Es kuaje todo en muestro espanyol, Kreygo ke vos va plazer.)

I si keresh ver la foto de muestro enkontro en la IYT 30 anyos despues, anda a:

Podesh ver una foto de este enkontro, aki:

En pasadas vide un video de Sara Kohen yanarocak kuando kanto en shena endjuntos kon Tsion Soni, akel ijiko ke kanto en mi video 30 anyos antes!

 

 

Seguro ke su papu Siyon esta en ganeden muy kontente por la ermoza famiya de sus desendientes en la tierra de Israel, ke el tanto amava!  I mi ermano tambien esta sonriendo por aver kavzado esta reunion inolvidavle.

 

 

 

 

 

 

 

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM

Tel: +972 36582936
Fax: +972 36573894

turkisrael@gmail.com

ADRES

Mohrey Sigariyot 7 Bat Yam - Israel

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon
İletişim ve faaliyetler hakkında bilgi almak için