LOS INDIANOS REUVENITAS (Desendientes del Trivo de Reuven)

April 16, 2019

Sovre la existensia en Amerika Latina de personas ke se konsideran desendientes de los djudios i tienen uzos i kostumbres ke se asemejan muncho a los muestros, ay no solo kuentos i leyendas sino ke tambien informasiones verifikadas i konfirmadas por investigadores ke estudiaron esta kestion.

 

Djuntos kon esto, en la mayoría de los kavzos no es posivle de fiksar de manera klara i exakta, en ke mizura se trata de desendientes dc trivos o de personas individuales ke se konvertieron al djudaizmo, basho la influensia de anusim (djudios sekretos) ke yegaron a Amerika djuntos kon Colombo i despues de el, i en ke mizura eyos son desendientes, segun es pretendido por algunos, de uno de los “Trivos Pedridos”, los trivos ke fueron exilados de Israel por el rey Nabukodonozor, kuando el destruyo el Primer Templo.

 

Un testimonio dc grande intereso a este sujeto se topa en el artikolo The Narrative of Aharon Levi, alias Antonio de Montezinos (El kuento de Aaron Levi, konosido tambien komo Antonio de Montezinos), eskrito por Elizabeth Levi de Montezinos, en la revista The American Sepharadi, i publikado por la Yeshiva University de New York, (vol.7-8, Otonio 1975-5736).

 

El artikolo empesa en dando, en su traduksion al inglez, el dicho kuento de Aaron Levi, tal ke fue kontado en el livro Esperansa de Israel, eskrito en 1650 por el famozo Menashe Ben Israel de Amsterdam, Holanda. En este livro ke eskrivio afin de konvenser a Cromwell de permeter la entrada de djudios a Gran Britania, Ben Israel konta lo ke le fue dicho por un sierto Aaron Levi, nasido de Portugal, ke emigro a Amerika del Sud, bivio ayi komo djudio sekreto, kon el nombre de Antonio de Montezinos, i despues fue a Amsterdam ande torno aviertamente al djudaizmo.

 

Segun lo ke es eskrito en este livro, Aaron Levi konto a Menashe Ben Israel komo, en un viaje ke estava aziendo a Quito, en la rejion ke es agora Colombia, oyo de uno de los muleros ke lo akompanyavan, algunas palavras sovre “un sierto puevlo, el mijor en el mundo, ke los indianos avían mal tratado, por lo kualo estavan sufriyendo agora eyos mizmos de los espanyoles”.  Entonses, adjusto Montezinos, el no metio tino a estas palavras i kontinuo en su kamino. A su arivo a la sivdad de Cartajena, el fue arestado por la Inkizision i no fue liberado ke un anyo i medio mas tadre, despues ke no pudieron ser provadas las akuzasiones ke era djudio.

 

Durante los largos mezes de su estadia en prezo, Montezinos se akodro de las palavras del mulero i yego a la konkluzion ke el devia tener konosensia de la existensia de algunos djudios en este paiz i se prometio de investigar esta kestion, si salia de prezion. Kuando fue liberado, la primera koza ke izo fue de bushkar a este mulero ke se yamava Francisco, i despues de averlo topado, konvenserlo ke el, Montezinos, era djudio i demandarle kualo savia sovre la existensia de djudios en este paiz. En repuesta a esto, el mulero salio kon el a kamino i despues de un viaje a pie de una semana i media, los dos yegaron a la uria de un grande rio, de la otra parte del kual vinieron a enkontrarlos tres ombres i una mujer.

 

Despues de aver oyido de Francisco ke Montezinos era djudio i ke dezeava konoserlos, dos de los ke avian venido de la otra parte del rio le disheron el Shema Israel i despues le eksplikaron ke eran desendientes del Trivo de Reuven, uno de los trivos pedridos.

 

Malgrado todos sus esforsos, Montezinos no pudo konvenserlos de permeterle de pasar el rio para enkontrarse kon los otros miembros de sus trivo. Despues de tres dias eyos se despartieron i entonses Francisco le konto komo, kuando yegaron los indianos a este paiz, eyos atakaron a los desendientes del Trivo de Reuven, ma ke todos los kombatientes ke fueron embiados de la otra parte del rio fueron matados. Es solo despues ke munchos kombatientes indianos murieron de esta manera ke uno de los Mohanes (saserdotes de los indianos) rekonosio ke, “los ke avian atakado eran ijos de Israel ke servian el verdadero Dio”.

 

Estos en pokas palavras, son los puntos esensiales de lo ke fue kontado por Aaron Levi a Menashe Ben Israel i eskrito por este ultimo en su livro Esperansa de Israel. En un komentario ke adjusto a estas palavras, Ben Israel apunto ke el personalmente esta konvensido ke Aaron Levi es una persona onesta i derecha i no un aventuriero ke invento un kuento para ganar nombradia o adelantar sus interesos.

 

Djuntos kon esto no fue dado dingun detalio konkreto sovrel lugar onde Levi enkontro a los desendientes del trivo de Reuven, probablamente porke no keria ekspozarlos a un atako de parte de los konkistadores espanyoles. En todo kavzo, desde akel tiempo, kaje i no se avlo mas de esta kestion i oy kaje 400 anyos despues de este enkontro, ya no es mas posivle saver kualo avia de verdad en este kuento i, si verdaderamente  bivian ayi desendientes del Trivo de Reuven, ke les akontesio desde akeyos tiempos asta muestros dias.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM

Tel: +972 36582936
Fax: +972 36573894

turkisrael@gmail.com

ADRES

Mohrey Sigariyot 7 Bat Yam - Israel

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon
İletişim ve faaliyetler hakkında bilgi almak için