YOSEF BEY NAVON EL OMBRE DE FINANSAS SEFARADI KE TRUSHO EL TRENO A YERUSHALAYIM

February 12, 2019

 

 

La estasion de treno de Yerushalayim a Tel Aviv ya no se topa mas en el lugar onde fue fraguada orijinalmente, en el tiempo ke la sivdad era parte del Imperio Otomano.  Por razones de planifikasion urbana eya fue transferada pokos anyos atras a otra parte de la sivdad, i la fragua de la estasion i su deredor fueron konvertidos en un sentro komersial, kon restoranes, magazenes diversos, instalasiones para djogos de kriaturas i mas.

 

 

Djuntos kon esto,  fue echo un esforso espesial para mantener la  fachata i la estruktura orijinal de esta estasion ke, durante mas de un siglo fue uno de los simbolos mas reprezentativos de la sivdad, fruto de una inisiativa ke permetio un kontakto muncho mas fasil i efikas entre Yerushalayim i Yafo, i mas tadre kon Tel Aviv i otros lugares del paiz.

 

 

La konstruksion de la linya de treno a Yerushalayim no fue del todo un proyekto fasil i el pudo ser realizado solo despues de munchas provas ke fayitaron, entre otras por el famozo filantropo djudio inglez Moshe Montefiori. Despues de una primera prova ke izo en 1829, en 1856 el aprovecho la vijita en Londra  del vezir turko, Ali Pasha, i propozo al ministro de eksterior inglez de entonses, lord Palmerston, de krear una kompania para merkar la linya de treno ke los inglezes avian fraguado en Krimea, i transferarla a Erets Israel.   Ali Pasha al kual fue sometida esta propozision, la aksepto i firmo mizmo un akordo a este sujeto, ma no lo kumplio. A la vista, el governo otomano no tenia intereso a fraguar una linya de treno de la kuala se aprovecharian prinsipalmente los pelegrinos kristianos i los djudios ke yegavan a la Tierra Santa.  Montefiori entendio ke este proyekto no tenia shanses de reushir i renunsio a el.

 

 

Uvo otros, despues de el, ke aprovaron de arebivir este proyekto, ma sin ninguna reushida,  El ke reusho, en fin de kuento, fue djustamente un sefaradi de Yerushalayim, Yosef Navon, ke nasio en 1858, en una famiya ke bivio en Yerushalayim desdel prinsipio del siglo 18 i de la kuala salieron numerozos rabinos i lideres komunitarios.

 

 

El estudio al prinsipio en el Talmud Tora de la komunidad sefaradi i kuando yego a la edad de 13 anyos, su padre lo embio a estudiar en un liseo fransez en Marsilia. Kuando torno a Yerushalayim, a la fin de sus estudios, lavoro en el komersio i despues en una banka ke fondo djuntos kon un asosiado.

 

 

Yosef Navon fue muy aktivo tambien en la akizision de terrenos para la kreasion de muevos kuartieres en Petah Tikva, Rishon le Tsion i Yerushalayim i es solo en el 1881 ke empeso a interesarse en la konstruksion de la linya de treno a Yerushalayim.  El estudio este proyejto muy seriozamente i kuando yego a la konkluzion ke su realizasion dependia en primer lugar de la autorizasion del governo otomano, el viajo a Estambol onde kedo 4 anyos, en los kualos reusho a krearse  relasiones de  amistad kon altos funksionarios turkos.

Sus esforsos dieron fruto i en fin de kuento el resivio una konsesion, por un periodo de 71 anyo, para la konstruksion de una linya de treno entre Yafo i Yerushalayim, ansi ke la opsion de fraguar otras linyas mas, a Gaza i a Shehem.  Por su rolo en la reushidad de las negosiasiones,  Yosef  Navon resivio del governo otomano el titolo de Bey, i desde entonses el fue konosido komo Yosef Navon Bey.

 

 

Kon la konsesion en sus manos el torno a Yerushalayim i empeso imediatamente a bushkar ayudo para finansar este proyekto. Al prinsipio no tuvo reushidad, ma en fin de kuento topo en Paris una sosiedad a la kuala reusho a vender la konsesion al presio de un milion de frankos..

 

 

La linya fue kompletada i inaugurada el 26 de Djulio 1892. El arivo del primer treno a Yerushalayim  fue resivido kon muncha alegria i emosion i desde entonses esta linya funksiono sin interupsion, salvo durante el periodo de la gerra de Independensia, a kavza de los kombates para el akseso a Yerushalayim ke avia sido asediada por los arabos durante largos mezes.

 

 

En los ultimos anyos la estasion orijinala, fraguada en 1892, fue transferada a otra parte de la sivdad, la linya fue renovada i kontinua a funksionar aun ke sovre un parkorso un poko diferente de la linya orijinala. El viaje tura serka de una ora i un kuarto i de este punto de vista ya no es una solusion atrayente para los ke deven ir de una sivdad a la otra por razones de lavoro.  Oy dia esta es mas una linya para turistas i para los israelis ke dezean konoser la rejion.  De otra parte, se esta fraguando i esta kaje kompletada, una mueva linya kon lokomotivas elektrikas, ke yegara a Yerushalayim pasando por pontes i tuneles, lo ke permetera de akurtar el viaje de manera muy apresiable.

 

 

Kuando yegaremos a akel dia, no devremos ulvidar ke la primera linya de treno entre Yerushalayim i el resto del paiz nasio de la vizion de Yosef Bey, ke kon  su enerjia i persistensia supo komo superar los ostakolos i parvino a obtener la konsesion grasias a la kuala se empeso en la realizasion de este proyekto.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon