LA ULTRA ORTODOKSIA


Israel dezde munchos anyos no solo es amenazado de ahuera del payis por el Iran i el Hamas , ma en mizmo tiempo de ariento, por los lideres ultra ortodoksos, titro en pasado el Haaretz. En el mizmo jurnal en un otro artikolo kon entisyon de lamentarse fue eskrito ke el futuro de la ekonomia del payis se gasta en baldes en las yeshivas de Israel, koza ke topo un poko egzajerado, ma ke en parte es verdad. Munchos manaderes ,estos ultimos anyos mos dan a entender la gravita de las menasas ke Israel renkontra de punto de vista sosyo-ekonomiko, i durante las semanas pasadas los haredis (los ultra ortodoksos) fueron apuntados del dedo, por insistir de no kerer partisipar en el mundo del lavoro i refusar la edukasyon sekular endjuntos kon la relijioza.

Bien entendido todas estas akuzasyones son en parte djustas, visto ke la partisipasion basha de los haredis en el mundo del lavoro no puede ser konsiderada tanto danjeroza komo las menasas ke pezan del ekstranjero, no se pueden asemejar. Es klaro ke la sosietad israeliana deve tomar mesuras konkretas i traer remedios a esta situasion anormala. El Instituto “Israel Democrasy” estima ke la partisipasion minor de los haredis al mundo del lavoro kostan a la ekonomia israeliana mas de dos miliardas de dólares al anyo. Sin ajustar a este shifro la sedaka de serka de 600 milyones ke resiven de la diáspora kada anyo. Malgro esto 54 por sien de la komunidad haredi bive debasho del nivel de provedad israeliano. Dunke kualo kale ser echo para la integrasion de estas famiyas proves a la fuerza del lavoro del payis i dar ansi a la sosietad israeliana mas armonía i prosperidad? Esto será una de las kargas importantes del muevo governo ke será elijido en April de este anyo. Por las oras es muy demprano de sintir, de oyir bozes altas sovre lo ke pensan los lideres politikos i relijizos aktuales, ma la konsiensia publika no esta trankila saviendo ke miles de kreaturas se van a la eskola ambiertos i kedan ansi fin a las kuatro de la tadre. Oy la komunidad haredi reprezenta sovre las statistikas de la Ofisina Sentral de las Statistikas el onze por siento de la povlasion i se projeta ke eya se dezvelopara presto i ayegara a la figura de 27 por siento en los 40 anyos vinideros.

En los ultimos anyos solo el sinkuenta por sien de los haredim en edad de lavorar son produktivos , dunke kale mirar de enkorajar al otro sinkuenta por sien de emplearse en un lavoro, spesialmente onde la industria del web ke tiene una mankansa kronika bastante grande de elementos. Komo darles a entender ke un mansevo ke apenas eskapo su servisyo en la armada komo konbatiente sin dinguna eksperiensa profesionala sea engajado kon una paga de mueve mil shekel ? Komo konvenser a esta djente relijioza de salir de la yeshiva sin abandonarla para ir a lavorar i ganar dinero i eksperiensa profesional. Se puede topar remedyo a ke los mansevos haredis estudyen la Tora i en siertos momentos de la semana o otros diyas se vaygan a lavorar. Grande responsibilita kaye a los dirijentes relijiozos de apuyar a esta idea, ke me parese ayudara a amenguar el nivel de la povredad en Israel.

Munchos observadores i komentatores demandan a ke investimientos sean echos al nivel sientifiko en eskolas spezializadas para los haredis i ansi ke se formen teknisyenes altos para la industria de ciber en la intelijiensa artifisiala i injeniosita en la industria de las komputadoras. Esto será la mijor solusyon para reglar el problema de parnasa de los ultra ortodoksos ke tendran diplomas de kolejio. Solo tredje por siento de los haredis ke lavoran están en los sektores del komersio i de hi-tech i resiven una paga de vente i sinko por sien mas basha de los otros lavoradores. Eyos podran alkansar grasias a sus diplomas a una paga de ochenta por sien mas grande de la kuala ke resiven oy. Mizma situasyon es valable para las mujeres haredi.

Orozamente ke en el mundo sefaradí ladino avlantes en Israel no tenemos difikultades de egzistensia semejantes, ma esto no kere dizir ke no egziste provedad i ke devemos luchar kontra eya. Por esto penso ke mi modesta otoridad me permete de demandar a todas las institusyones de muestra komunidad de ayudar i enkorajar a ke muestra manseves se emansipe akademikamente i por esto de mirar a dar bastante bekas a los ke estudian.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon