LOS KORSARES DJUDIOS

January 8, 2019

 

EL KANTONIKO DE, MOSHE SHAUL

LOS KORSARES DJUDIOS

 

Una de las konsekuensas de las kondisiones en las kualas bivieron los Djudios en la diaspora, es ke eyos se konsentraron en siertos ramos de la aktividad ekonomika, espesialmente en el komersio, las finansas i las profesiones libres, i de otra parte se alesharon o fueron aleshados de siertos lavoros i profesiones.

 

Uno de los lavoros en los kualos uvo muy pokos Djudios, en los paizes de la diaspora, fue el de la navigasion… al punto ke los umoristas uzavan dizir ke "Dezde ke Noah suvio sovre su arka i kedo a su bordo asta la fin del Deluvio, no uvo mas navigadores djudios."

 

No ay menester de azer grandes esforsos para desmentir esta pretension, siendo ke la Biblia eya mizma mos konta ke uno de los dodje trivos djudios, el de Zevulun, se aresento a la uria de la mar i se mantuvo, entre otras, de la navigasion.

 

Ma se puede afirmar ke, mizmo despues de los tiempos biblikos, uvo navigadores djudios, algunos de entre los kualos reusheron tambien a yegar a postos de grande importansia, komo por enshemplo, Sinan Reis, uno de los Djudios de Turkia, ke yego asta el grado de "Kapitan Pasha", Amiral de la flota turka.

 

Sinan, ke nasio en Izmir a los prinsipios del siglo XVI, poko despues ke se aresentaron ayi los primeros de los Djudios ekspulsados de Espanya, se distingio dezde su manseves por su grande kapachidad de navigar, ayudandose kon un instrumento de navigasion deskrito por la primera ves en el livro "La Gerra en el Mundo" de un otro selebre Djudio, Rabi Gershon Ben Nahman.

 

Ma Sinan no era un simple navigador. El era tambien, uno de los mas kapaches i odasiozos korsarios, estos gerreros de la mar ke en akeos tiempos ovravan kon el konsentimiento i el apoyo, aun ke non ofisial, de sus governos, kontra las naves de paizes enimigos. Sinan Reis se distingio tanto por su kapachidad en este tiempo, ke su nombradia yegava de Inglitierra, onde el rey Henry VIII lo konosia komo el "famozo pirata djudio", i asta Goa, en India, ke su governador portugezo Lopo Vaz de Sampoyo lo yamava "o grao Judio", el grande Djudio.

 

Sinan Reis se adjunto en 1518 al famozo kapitan turko Hayreddin Barbaros i djuntos kon el, lucho durante largos anyos kontra la fuersa navala de Genova, komendada entonses por un otro famozo navigador, Andrea Doria.

 

Despues de numerozas batalias navalas, en algunas de las kualas vensieron los Djenovezes mientres ke en otras vensieron las fuersas de Barbaros i de Sinan, en 1546 Barbaros murio i 4 anyos despues Sinan fue elevado al grado de Kapitan Pasha de la flota turka.

 

Su ultima i mas grande viktoria fue alkansada en 1552, kuando reusho a meter una embuskada a una flotilia de naves djenovezas kon Andrea Doria a bordo de una de eyas. En la batalia navala ke ezbrocho entre las partes, Sinan se apodero de 7 naves enemigas, ma no pudo aferrar a Andrea Doria, ke reusho a fuyirse.

 

 Ma Sinan no fue el solo djudio a distingirse en el kampo de los kombates navales i podemos sitar a lo menos dos nombres mas de navigadores djudios ke sovresalieron por sus aktividades en este kampo.

 

El primer de eyos es Don Shmuel Palachi ke nasio en Fez en la segunda metad del siglo 16. En 1597 el fue embasador en Espanya del sultan de Maroko, Mulay Sidon.  En 1609 fue embiado a Holanda komo reprezentante del sultan Mulay. El fue el primero a yegar a este paiz aviertamente komo djudio, a la diferensia de los marranos de Espanya i Portugal ke en akeyos tiempos podian aresentarsen en Holanda solamente en aziendosen pasar komo kristianos.

 

Palachi empeso en su kariera maritima kuando el rey Felipe III de Espanya refuzo de retornar al sultan Mulay Sidon algunos manuskritos arabos de grande valor, mizmo en kontraparte a la liberasion de prizioneros de gerra. En reaksion a este refuzo el sultan marokano firmo un akordo kon Holanda kontra Espanya; ma siendo ke los olandezes no podian kombatir aviertamente kontra Espanya a kavza de la “Tregua de Dodje Anyos“ ke avian firmado un anyo antes, eyos desidieron de embiar a Palachi para ke atake las naves espanyolas en medio de mar. Eyos le dieron una nave de gerra, kon un ekipaje formado prinsipalmente por marineros olandezos i, djuntos kon el sultan Mulay, le dieron un dokumento enkargandolo de “…apoderarse de todas las naves, espanyolas o de pirates, ke enkontrara en el kamino a Holanda”.

 

En el interval de tres mezes despues de su partensia, Palachi ya avia atakado kon sukseso una nave espanyola ke vinia de India, kargada kon kueros i otras merkansias i una nave portugeza ke traiya asukar de Brasil.

 

La Figura e Palache sirvio de exemplo a otros djudios mas ke se djuntaron a la lucha kontra las las naves espanyolas. 

 

Meresen ser mensionado, entre otros, de los ermanos Jean i Pierre Lafitte ke lucharon, en la primera parte del siglo 19, kontra las autoridades espanyolas en Mexico, kon el uniko dezeo de vengarsen de los responsables por las persekusiones de la Inkizision.

 

Para esto eyos se enlistaron komo adjentes del servisio de espionaje espanyol, aziendole kreer ke kerian luchar kontra los Estados Unidos ke avian kavzado grande danio a sus aktividades de pirateria.

 

Los ermanos Lafitte prezentaron a los espanyoles un plano para la konkista de la izla de Galveston, en la kosta de Texas, ke podria server de baza a los atakos kintra naves amerikavan ke pasavan opor ayi. Ma kuando los Lafitte yegaron a esta izla, i se establesieron ayi, duntos konotros piratas ke ovedesian a sus ordines, en lugar de atakar a las naves amerikanas fueron naves esopanyiolas kontra las kualas apuntaron sus kanones,

 

Extas aktividades se kontinuaron asta el 1821, kuando dezovedesiendoa sus ordines, akgunos de los pirates bazados en la izla de Galvest one atakaton a naves amerikanas, en segito a lo kualo, los Estados Unidos embiaron a esta izla la nave de gerra "Enterprise", akavidando a Lafitte ke si no salia de la izla en el interval de 24 oras la bombardearian, destruyendo todos sus edifisios ansi ke las naves ke se toparian en el porto.

 

El 3 de Marso 1821 Lafitte metio fuego a su baza en la izla de Galveston i salio de ayi, kon la satisfaksion de aver ayudado a la lucha de Mexico para su independensia i de averse vengado, en una sierta mizura, de los ke avian kavzado a su puevlo tantas sufriensas.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon