2019 ANYADA DE SURPRIZES

January 8, 2019

 

2018 fue una anyada yena de evenimentos trajikos de una parte i buenos de la otra. La vida en Israel fue movimentada  kon la gerra kontra el Hamas , ma produktiva de punto de vista ekonomiko.  Hamas   kontinuo a ser un inimigo ke mos danya muncho. Todo el doredor  israeliano de la zona de Gaza fue kemado  kon metodas  inovativas ,komo las filandras de fuego ke terrorizaron la povlasyon djudia del sud de Israel, i provokaron fuegos sovre miles de dunames de tierra  agrikola. Por kontra la armada fuerte  i bien formada kon su sistema de intelijiensia  i kon la teknolojia avansada komo los drones i su siber-tech lucho muy bien  afin de minimizar las piedritas umanas durante mezes de konflikto.

 

El antisemitizmo  global, pujado en estos dalkavos tiempos, alarmo los dirijentes djudios en el mundo i en Israel ke no  saven komo kombatirlo  dezde milanyos. Malgrado esta estrechura  preokupante , Netta Barzilai mos dyo sevo a la alma  en ganando el premio  de l’ Eurovision. Tel Aviv ansi será , malgrado los inimigos   ke miran de ensuziar muestra imagen internasyonal, el sentro del mundo en Mayo 2019.

 

De otra parte Trump i su administrasion transferaron sus ambasada de Tel Aviv a Yerushalayim, avriendo de vista el kamino a otras nasyones importantes amigas de Israel de azer lo mizmo. La Australia i el Brazil están  en esta situasion i se espera ke durante 2019 munchos otros payizes segiran el movimiento. 

 

Israel oy en dia  se konfronta en una dualitad de ser una strea briyante ma ke lucha komo la flama de una kandela kontra el ayre.  Israel se asemeja a los Estados Unidos líder mondial, primer en todo, super potensya  desde 1945, lo ke yamo yo el Imperio Moderno. Entre los 100 payizes independientes kreados despues de la Sigunda Gerra Mondiala,  Israel i India son los  primeres estados  demokratikos verdaderos. Ademas Israel es la unika ekonomia moderna del Medyo Oriente. El GDP/kapita suvyo a 40,000,- dólares ,al nivel japonezo i de siertas nasiones evropeas. Pensar ke  el GDP/kapita en 1948 era  3000,- dólares  solo mos da a entender la grandeza del progreso de la vida en  Israel. En la agrikultura somos los mijores del mundo i muestra industria de “hi-tech” es klasifiada entre las sinko mijores del mundo. Despartes ke en 1948 Israel no tenia una fuerza aeronautika i  marina ,en 70 anyos  fuimos kapaches de dezvelopar una industria de armamiento egzamplar en el mundo. La armada israeliana es ansi la mijor del Medyo Oriente i diezena al nivel mondial.

 

Ma Israel tiene en mizmo tiempo sus flakezas;  la primera es ke es muy chika  apenas 20000 kilometros kuadrados onde el sesenta porsiento es dizierto; la sigunda  es el vizindado arabo-musulmano  ke  lo desha apenas  respirar;la tresera es la povlasyon de 420 milyones de musulmanos kontra a penas 7 miliones de djudios israelianos, los kualos se defenden dezde 70 anyos. i ke lo ke reprezentan solo el 1.5 por siento de la povlasion medyo-orientala.

 

Devemos rekonoser ke la inimista aktuala del Iran kon su povlasion de 80 milyones de almas, si kere en 3 mezes . opdra fabrikar su bomba atomika i tres de entre eyas serán sufizintes a matar un miliyon de israelianos.  Ma no kale deskorajarmos . porke  savemos defendermos i no permeteremos al Iran  de aserkarse de las frontieras israelianas en la Siria. El Iran es en mizmo tiempo inimigo ansestral de los arabos sunnitas.  Los payizes arabos sunnitas ke tienen relasyones serkanas kon los Estados Unidos, sovre el apoyo  de esta potensya, están mirando de aserkarse de Israel i 2019 puede ser la anyada ke la Arabia Saudita kreara relasyones ofisialas kon Israel.

 

En Marso de este anyo tendremos eleksyones muevas de los deputados de la Kenesset.  Bien entendido esto dara una mueva koalisyon entre los partidos de la derecha i del sentro derecho de la politika israeliana. Benjamin Natanyahu  en los mezes vinideros mirara si puede  alkansar a  40 elijidos de su partido Likud.  Bien entendido no será fasil porke Bennet, Shaked, Ganz,Lapid i Liberman  miraran de arrekojer lo mas de los votos de los partizanos de la derecha. La siedra no esta briyando porke los pletos internos los aflaka muncho.Se pretende ke el partido “Avoda” debasho de su líder Gabay no kitara mas de sesh deputados.. Los partidos relijiozos  se esforsaran de guadrar la mizma kuantitad de miembros ke tuvieron en la Kenesset los anyos pasados.  Los deputados arabos no depasaran los 13 miembros. Se aspera de ver muevas karas , esperamos mas sempatikas . En indosen la sinyora Zuavi veremos  ken será la portavoz de los palestinianos radikales,  inimigos del Estado.  Esperamos de ver muevas formasyones arabas presentar muevos kandidatos jóvenes  ke se sientes israelianos i ke son prontos a defender Israel kontra el Hamas, el Djihad i el Hizbollah.

 

En el presipyo de este anyo esperamos a ke en 2019 la ekonomia kontinuara a dar sus frutos komo los anyos pasados, a ke la mueva Kenesset se okupara de reglar la kestyon  urjente de la provedad , de las madres bivdas kon famiyas grandes porke grasias a  la ekonomiya del payis  el muevo governo se podra permitir de ayudar i dar pan a los ambiertos. 

 

Kontinuaremos a ser orgoyozos de muestro payis,  por el nivel ke el alkanso i tendremos konfiensa  en su futuro i en su kapachida  de defenderse. 2019 anyada de surprizes se puede asperar una guerra kon los arabos , se puede asperar a ke el muevo governo elijido i enkavesado por Bibi kayga i ke muevas eleksyones sean echas en el 2020, a kavza ke el primer ministro puede ser akuzado i djuzgado por kashkarikas  de rovo.  Ma la kultura demokratika de Israel es bastante rezia,  todo se eskapara  en paz  i  armoniya.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon