LAS RAYIZES SEFARADIS DE YAFO

January 1, 2019

Yafo es una sivdad-porto ke su nombre es mensionado en munchos manaderos istorikos, entre otras en la Biblia tambien.  De ayi es ke salio Yona, bushkando a fuyir del paiz, para no tener ke kumplir el orden ke le avia dado el Dio, de ir a la sivdad de Ninive i akavidar a su povlasion de alesharsen de sus malos aktos i tornar al kamino derecho.

 

Despues de la destruksion del sigundo templo por los romanos i ke la mayoria de los djudios fueron ekspulsados de sus tierra, durante munchos siglos no uvo abitantes djudios en Yafo. Es solo en el siglo 18 o 19 ke los djudios empesaron a tornar i aresentarsen en esta sivdad, kreando ayi una chika komunidad, de la kuala salieron mas tadre las famiyas ke fondaron la sivdad de Tel Aviv.

 

Una demanda ke se azen munchos investigadores ke se interesan en la istoria del paiz es kuando i por ken exaktamente fue renovada la komunidad djudia de Yafo en la epoka moderna?

 

Segun los istoriadores djudios ke trataron de esta kestion, esto avria sido echo despues de 1850, por un grupo de djudios a la kavesera de los kualos se topava Rabi Yeuda Alevi Merkado de Dubrovnik. Kaje al mizmo tiempo arivo a Yafo la famiya Chelouche, de los djudios de Maroko, i ay tambien ken konsidera a los miembros de esta famiya komo los primeros djudios ke se aresentaron en Yafo, en la sigunda metad del siglo 19.

 

Ma, si son verdaderas las konkluziones a las kualas yego la istoriadora Dr. Hanna Ram, parese ke el onor de aver renovado la komunidad djudia de Yafo reviene a los djudios de Turkia djustamente, ke empesaron a aresentarsen en Yafo en la segunda metad del siglo 18, muncho antes de los djudios de Dubrovnik i de la famiya Chelouche.

 

En un artikolo titulado "Las rayizes sefaradis de Yafo" i publikado por Tami Lehman en la revista de El Al, es kontado komo Dr. Ram yego a esta konkluzion en segito a las investigasiones ke izo, despues ke fue enkargada de organizar un muzeo sovre la istoria de Tel Aviv, istoria ke segun se save empesa djustamente en Yafo.

 

Bazandose sovre los archivos de Sir Moses Montefiore i de la Biblioteka Nasionala i Universitaria ansi komo sovre piedras tombales en un viejo bedahem de Yafo, la Dra. Hanna Ram yego a unas kuantas konkluziones muy interesantes.

 

Por el porto de Yafo yegaron la mayoria de los djudios ke vinieron a Erets Israel komo pelegrinos o para aresentarsen en la Tierra Santa. Ma de la metad del siglo 17 i asta los prinsipios del siglo 18, sus numero menguo muncho, entre otras a kavza de las kondisiones de vida partikularmente duras en el paiz i de los fuertes dasios ke tenian ke pagar.

 

La situasion empeso a trokar para bueno kuando, en el anyo 1726, un grupo de djudios rikos de Estambol formaron un komite para ayudar finansiariamente a la komunidad djudia de Erets Israel.

 

En la primera metad del siglo 18 este komite empeso a organizar grupos de aliya a la Tierra Santa i espesialmente a Yerushalayim, ma ya se save ke a lo menos dos famiyas se aresentaron en Yafo. Mas tadre yegaron grupos mas grandes de djudios de Estambol i pujo ainda mas el numero de los ke eskojeron de bivir en Yafo.

 

Esta puja izo sovresalir el menester de un "Han" onde los olim puedan pasar sus primeros dias en el paiz, asta ke toparan onde morar. La solusion a este problema fue dada por Yaakov Zonana, ke enkavesava el komite de djudios de Estambol del kual avlimos. En 1740  el merko una grande fragua en Yafo i avrio ayi el han del kual avia menester.

 

Bushkando a ver si kedo algo de este han, Dr. Ram tuvo la suerte de enkontrar un viejo djudio ke desde 1949 sirvio komo shamash de un kal en Yafo. El konto komo, a su yegar a esta sivdad, bushkando una fragua ke pudiera servir de lugar de orasion, el oyo sovre un viejo kal ke era uzado anyos atras ma ke ya estava serrado.

 

Despues ke le fueron echas reparasiones, este kal empeso a atrayer los olim ke avian sido aresentados en Yafo ansi ke algunos djudios veteranos ke bivian serka de ayi.

 

A la entrada del kal, ke se topa en la kaye "Mazal Dagim" de la vieja Yafo, se puede ver una plaka sovre la kuala esta eskrito ke: "....en este lugar fue avierto, en 1740, el primer han djudio de Yafo".

 

El kal de muestros dias okupa solo una parte de la grande fragua ke era, a la vista, el han avierto kon el ayudo de Yaakov Zonana. El arkeologo Prof. Meir Ben Dov ke examino el lugar, konfirmo la antiguedad de esta fragua, debasho de la kuala deskuvrio tambien una grande bodega. A la vista, disho el, el patron de esta fragua era muy riko. I en efekto, Zonana era riko, ma el supo tambien servirse de su rikeza para ayudar a su komunidad, entre otras, en avriendo este han ke sus restos impresionantes pueden ser vistos asta oy.

 

El buto de Zonana era de fasilitar la aliya de djudios de Estambol a Yerushalayim, ma en desparte de esto i sin averlo planeado de antes, el pozo tambien la baza de la mueva komunidad djudia e Yafo, en la epoka moderna.

 

 

 

 

 

 

 

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon