ES KE EL IRAN  REZISTERA AL BOYKOT?

December 18, 2018

 

Trump i su administrasion  travandosen del akordo entre el Iran i las potensias oksidentales sovre la proliferasion de la produksyon de la bomba atomika, empeso muevamente a akuzar los mollas de fabrikar armas kimikas koza ke si se prova aparejara un otro kolpo  a la ekonomia de este payis en enfortesiendo las  mezuras de boykot  desidadas  por los Estados Unidos.  La situasion es i será muy  kritika para los iranianos, ke si no podran azer negosyo kon el oksidente i la China  se toparan en grande apreto finansaryo i de  mankansa de produktos bazikos i teknikos.

 

Los  dirijentes evropeos komo los chinezos no están kontentes de este embargo ke les kavza komo se save grande danyo ekonomiko, en pedryendo un merkado de ochenta miliones de personas.  Ademas los payizes de la zona ke nesesitan   de merkar neft i gaz  se sienten  en difikultad de topar otro manador ke  dara los mizmos avantajes de akeyos del Iran.   Entonses la mayoriya de las sosiedades de petrol evropeas i chinezas  a traverso sus lobbis miraron de konvenser a los dirijentes evropeos  i a los dirijentes del partido komunista chinezo de krear una moneda mueva o un modo de pagamiento de troko de komodidades  en establisiento ‘barteres’ ke se azeran konkorentes al petro- dólar ke es el modo de pagamiento internasyonal uzado dezde muncho tiempo para pagar el neft i el gaz likido en el mundo.  Ma viendo la opozision de Los Estados Unidos ke aze la mar sangre a este sujeto nada se pudo desidar konkretamente asta agora.  

 

 Fin oy en dia  el Iran grasias  a sus reservas de dolares  se supo dezbrolyar a  merkar produktos de grande nesesita ma mos demandamos fin a kuando esto kontinuara.   Bien entendido el boykot  sovre las vendidas de neft i de gaz likido ke son los prensipales manadores de devizes del Iran  kuando vendran a mankar se aspera  una grande deskontentes ariento del payis. El puevlo por siguro se sulevantara kontra el governo diktatorial de los mollas.  Kualo akontesera  no es previsible ma a lo menos el sivdadino medyo se rendra kuento de los entrompesos en los kualos se topara i demandara kuento a su rejimen politiko de las difikultades ke fue forsado de arreyevar.  No  devemos olvidar ke el pueblo iraniano dyo en el pasado munchos egzemplos de solevantamiento kuando avia de sovreguardar su integrita i su intereso nasyonal.  Ultimamente en varias sivdades del payis en el 27 de Novembre  uvieron protestas de milarias de sivdadinos ke okuparon las kayes  en gritando kon  konviksion “ Es muestro derecho de tener  vida trankila, seguridad i modos de sanedad”.

 

 Esto kere dizir momentos difisiles para los dirijentes i los mollas ke enkavensan el poder politiko del payis.  Sin falta los proksis Hizbollah i Hamas  serán en pozisyon de no ser mas protejados i apuyados militarmente komo en el pasado por sus patrones iranyanos. Dunke Israel no deve asperarse a un dezvelopamiento desfavoravle  iminente en sus frontieras kon el Libano i Gaza, ma por razones internas estas dos entitades terroristas kontinuaran sin falta a dezrepozarmos , porke si no, sus ’raison d’etre’no se djustifikara en la shena internasionala.

 

La stratejia de Trump es bastante klara. Eya  mira de empidir al rejimen del Iran de tener fondos disponibles para ayudar las aksyones terroristas de sus proksis en el Medyo Oriente i de organizar atentados en diversas partes del mundo.  Ademas de no poseder armas atomikas, kimikas i dezvelopar proyektiles de atako de alta potensia . Todos los miembros del establisimiento amerikano estan de akordo en este sujeto.  Por esta razon no achetaran en dinguna manera a ke el boykot sovre el komersyo kon el Iran  no sea  respektado. Todas las sosiedades amerikanas i de payizes amigos de los Estados Unidos, deven respektar las normas del embargo  i no azer komersyo kon este payis. Si no respektaran esta obligasyon son eyas ke serán defendidas de azer komersyo  al seno de los Estadios Unidos.  A mi avizo son pokos los  dirijentes de grandes sosiedades industrialas en el mundo ke podran tomar este risgo. El konsejero de seguritad de Trump, John Bolton en pasadas konfirmo mi  punto de vista i disho ke no pensa ke los evropeos tendran el koraje de romper el boykot kontra el Iran.

 

  Bien entendido la administrasion amerikana aze siertas eksepsiones, komo el kavzo de la Turkiya ke es obligada de merkar gaz del Iran ke nesesita i ke no será djusto de arrestar el fonksionamento del pipeline egzistente .  Ma la Turkia no podera  augmantar la kuantitad del gaz establisida en el kontrato aktual. La Turkiya puede i  podra pagar esta merkansia kon produktos agrikolos,koza  ke se aze  regularmente.

 

El bektchi  aktual del mundo, el imperio moderno , los Estados Unidos, demonstran ke eyos kontrolan seriozamente todo lo ke se pasa en el mundo , sovre todo el boykot iraniano. El mijor egzemplo fue la arrestasyon en pasadas por la polisia kanadyana sovre la demanda de la djustisia amerikana de la sinyora Meng Wanzhou ija del fondador de la potente  sosiedad de teknolojia  chineza, muy bien konosida, Huawei, por razones de komersyo defendido echa por una de la sosiedades del grupo kon el  Iran, ke la sinyora enkavesa.  Esto mos prova una ves mas mizmo la  China  no sale a bash kon la administrasion Trump.

 Avizo a los interesados, dire….

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

ADRES/כתובת 

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon