MEDIKOS DJUDIOS EN LA ESKOLA DE MEDISINA MILITARA DURANTE EL IMPERIO OTOMANO


El konosido istoriador i investigador, prinsipalmente del djudaizmo de Turkia, el Prof. Avraam Galante, mos trae en uno de sus rekolios, dokumentos konsernando la kestion de kashrut en la Eskola de Medisina Militara, en Estambol, un problema a kavza del kual, al prinsipio estudiantes djudios no pudieron estudiar ayi la medikeria i servir en la armada turka komo medikos. Un dia vijitando esta eskola, el Sultan Abdul Medjit se dio kuenta ke avia ayi elevos de todas las relijiones a la eksepsion de djudios. Kedando muy kuriozo el demando al direktor de la eskola kuala es la razon de esto. El direktor respondio dandole las razones por las kualas los djudios no vinian a estudiar la medisina en esta eskola:

Primeramente porke no komen komidas aprontadas por non djudios. I segundamente, porke deven azer sus orasiones kada demanyana, ma no tienen un rabino ni ande azer las tefilot.

El sultan Abdul Medjid, ke no savia asta akel momento de kualo se tratava, ordeno pishin de avrir en la eskola una kuzina kasher i engajar un gizandon,i un shohet ke se okuparan de mantener los preseptos del gizado segun lo enkomenda la ley djudia. El Sultan ordeno tambien de engajar un rabino ke organizara las orasiones diarias en la eskola i ademas el demando del direktor de liberar a los elevos djudios dia de Viernes, afin ke puedan pasar el shabat en sus kazas i retornar el dia de alhad a los estudios.

La eskola de medisina ke mas tadre fue yamada La Fakultad de Medisina, fue fondada en 1827. El mas veteran djudio ke termino sus estudios en esta eskola, Seksion de Farmakolojia, fue Jacques Yerushalmi, ke avia resivido su diploma en1866 i ke kumplio su servisio militar en la Marina.

Un anyo mas tadre fueron diplomados komo medikos estudiantes djudios ke yegaron a algunos de los mas altos postos en la armada otomana: el vise amiral Dr. Isaac Pasha Molho; el vise amiral Dr. Elias Pasha Cohen, i el kontra amiral, Dr. Mentesh (Marko)Pasha Galimidi.

A partir de esta epoka el numero de los medikos djudios en el servisio de las fuersas de tierra i de mar estuvo indo i pujando. Djuntos kon esto, el primer mediko militar djudio ke sirvio en la armada turka no fue un diplomado de la eskola de medisina de Estambol sino ke un djudio de Bosnia, ke en akeya epoka azia parte del Imperio Otomano.Este fue el Dr. Isaac Shalom Efendi, ke avia estudiado la medisina en Padova, Italia.

Entre otros medikos ke terminaron sus estudios en la Eskola Imperial de Medisina sitaremos al jeneral de division Dr. Jacques Pasha Nissim ke kumplio, entre otros, los postos de shefe-mediko del ospital en Saloniko i de shefe inspektor de salud en las sivdades de Saloniko, Monastir i Kosovo; el jeneral de la brigada Dr. Isaac Pasha Hadjes, orijinario de Izmir, ke sirivio en la armada turka en Kreta, partisipo a la gerra entre Turkia i Rusia i fue mediko militar en Yemen; el colonel Dr. Elias Bey Modiano, orijinario de Saloniko ke sirivio en la armada turka serka de 50 anyos, en ospitales en Kutahya, Edirne i Bagdad, en Irak, i a la edad de 35 anyos fue nominado al posto de shefe-mediko del ospital Yildiz en Estambol; el kolonel Dr. Raphael Bey Dalmedico, nasido en Kreta i desendiente de la famiya Dalmedico, de la kuala salieron un grande numero de doktores. Despues de aver terminado sus estudios el fue nominado al posto de mediko en la kazerna de Daud Pasha. Mensionaremos tambien a los medikos Dr. Angelo Bey Akchoti; colonel Dr. Behor Efendi Yaeche i la lista es ainda larga.

Todos estos medikos i otros mas sirivieron en la armada otomana kon grande sukseso i fueron muy apresiados por sus komandantes, kontinuando ansi la larga tradision de medikos djudios al servisio de sultanes, reyes, personalidades de la aristokrasia i fuersas militaras de paizes diversos.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon