LOS SEFARADIS I LA PRODUKSION DE ASUKAR

October 2, 2018

Kuando la Inkizision yego a Portugal verso la metad del siglo 16, ya avia ayi munchos miles de “kristianos muevos”,  ke avian sido konvertidos por la fuersa, en el anyo 1496, por orden del rey Manuel I;  ma munchos de estos konversos kontinuavan a pratikar el djudaizmo en el sekreto de sus kazas i bushkavan  kaminos para salir de Portugal i emigrar a kualker otro paiz onde pudieran kumplir los mandamientos de la Tora, aviertamente si era posible, o sino de manera sekreta, ma sin ser amenazados por la Inkizision.

 

El rey de Portugal ke  no estava interesado a pedrer los djudios, en deshandolos partir, siendo ke tenia menester de eyos para la ekonomia del paiz, defendio la salida de los “kristianos muevos” del teritorio portugez. Les fue permetido de viajar solamente a las kolonias portugezas, una de las kualas era la izla de Madeira, en el Oseano Atlantiko, ke era kolonia portugeza desdel anyo 1400.

En 1420 los portugezes importaron ayi la kanya de asukar de la izla de Sicilia. A la fin del siglo 15 ya avia, en Madeira, 150 molinos de asukar. La mayoria de los produktores de asukar eran los djudios ke vinieron de Portugal a esta izla.

 

Siendo ke los portugezes kerian tambien dezvelopar los teritorios ke avian konkistado en Brasil, en 1516 el rey Manuel I dekreto ke todos los ke akseptarian de ir a Brasil, para kultivar ayi la kanya de asukar, resivirian del governo tierras i makinas. Ansi fue ke munchos djudios, ke ya se avian espesializado en la produksion de asukar, empesaron a pasar a Brasil. El istoriador Dr. Herbert Bloom eskrivio “Los djudios en Brasil tenian enormes plantasiones de kanya de asukar i el komersio de la asukar de este paiz estava basho sus kontrolo”.

 

Ma esta prosperidad no turo largo tiempo. Kuando la Inkizision se dio kuento ke estos rikos produktores de asukar pratikavan el djudaizmo, desidio de arestarlos i konfiskar sus bienes.

 

 La persekusion yego a tal grado ke, temiendo por las graves konsekuensas ke esto tendria para la ekonomia de Portugal, el rey Pedro II ordeno de no konfiskar mas molinos de asukar. Ma esto no ayudo i la produksion de asukar en Brasil se ruino mientres ke, de la otra parte, en el Brasil Olandezo, onde los djudios podian bivir en paz, esta industria entro a una epoka de kresimiento i prosperidad.

En el anyo 1630 los olandezes okuparon la provinsia de Pernambuco en Brasil. Los portugezes ke bivian ayi se fuyeron, mientres ke los djudios kedaron ayi kon sus plantasiones i sus molinos, i transformaron la provinsia en un sentro mundial para la produksion de asukar. Esto i mas, eyos inventaron muevos metodos de rafinar la asukar ke mijoraron su kalidad. Dezgrasiadamente, en 1654 los portugezes rekonkistaron a Pernambuco i los djudios fueron ekspulsados i duvieron bushkar otros lugares para bivir.

Munchos de eyos yegaron a las izlas del Caribe ke avian sido konkistadas por Holanda, Inglitierra i Fransia.

 

En la izla de Barbados, ingleza desde 1625, avian bushkado a produsir asukar, ma eya era de tan negra kalidad ke su presio no kuvria ni el presio de su transporto a Evropa. Kuando los djudios de Brasil vinieron a la izla kon sus kapitales, sus teknolojias i sus saviduria komersiala, eyos transformaron a Barbados en un lugar importante para la produksion de asukar. Mas ke todo ayudo a sus reushidad, la invension de David Rafael de Merkado ke le permetio de produsir asukar en forma de kristales.

 

En 1656 los olandezes kolonizaron la izla de Cayenne (oy la Guiana Franseza) i dieron a un grupo de serka de 400 djudios, enkavesados por David Nasi de Brasil, la lokalidad de Remire onde eyos fraguaron una fabrika de asukar ke tomava su enerjia de la fuersa de la agua. Eyos tenian tambien un grande numero de molinos i produsieron asukar de buena kalidad asta ke, en 1664, los fransezes okuparon la izla.

 

Los djudios de Pomeroon (oy en la Republika de Guiana), okupada por los olandezes en 1657, produsieron la asukar del mas alto nivel i fueron famozos en todos los merkados evropeos. Los inglezes destruyeron esta kolonia en 1666.

 

Los mas grandes produktores de asukar fueron los djudios de Surinam. En 1652 se fondo en esta rejion una kolonia ingleza. Los djudios exilados de Cayenne i otros sefaradis ke vinieron de otras partes del mundo tenian ayi una rejion eksklusivamente djudia, kon una sivdad yamada Yerushalayim i kazales kon nombres biblikos tales ke Goshen, Karmel, Beer Sheva, Gilgal i otros mas. Esta rejion, yamada “La Savana Djudia”, fue uno de los mas grandes sentros de asukar del mundo. En 1694 bivian en la Savana 570 djudios en 40 plantasiones, kon 900 ovreros. En la metad del siglo 18 ya avia 2000 djudios ke formavan la mayoria de la povlasion blanka, kon 115 plantasiones i 60.000 ovreros. Kon las invensiones teknolojikas djudias, entre 1700 i 1750, la eksportasion de asukar fue triplada.

 

En segito al dezvelopamiento de una mueva teknolojia ke permetio de produsir asukar a baza de chunkundur (pandjar), i de la gerras en el Caribe, menguo muncho la importansia de la asukar produsida por los sefaradis en las Amerikas i en el siglo 19 eyos duvieron bushkar otros lavoros. La mayoria se okupo de komersio, de navigasion i administrasion, distingiendosen no solo en el kampo de la ekonomia sino ke tambien en la vida sosiala, kulturala i politika de los paizes en esta rejion.

 

Aun ke sus aktividad en el kampo de la produksion de asukar no es tan konosida oy, no ay duda ke eya fue muy importante para el dezvelopamiento de la ekonomia de los paizes del Caribe. Eya kontribuyo tambien de manera muy sustansioza al dezvelopamiento de la industria de dulserias, entre otras la famoza “patisserie” franseza, ke segun los istoriadores se dezvelopo en la sivdad  de Bayonne, onde avia una grande komunidad de konversos ke tenian relasiones familiales i komersiales kon los djudios produktores de asukar de los Caribes.                          

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon