EL VIZINO ASAD

August 8, 2018

 

Komo lo konstatamos en estos ultimos  dias Asad, el diktator Siriano se izo demuevo vizino de mozotros dospues ke sus fuersas armadas  rekonkistaron de los revoltados  djihadistos sirianos  el bodre de la frontiera  kon Israel en el Golan.  No ay duvda ke dospues de tantos anyos de gerra interna ke kavzo mas de 500 miles  muertos i no savemos kuantos  miles de  feridos i el egzilo de  mas de 7 milyones de sivdadinos a los payizes vizinos,  komo este grande inimigo ereditaryo de Israel,  podria estar deinda  al poder si no tenia el apoyo de Putin,el Ruso.  Seve oy ke un akordo sekreto fue echo entre Putin ,Trump i Natanyahu a este sujeto. Es difisil de pensar de otra manera. No ay mez ke los lideres de los 3 payizes no se kontakten o se renkontren para diskutir de la Siria. Asad durante 7 anyos ke dura la lucha interna del payis pratikamente  kedo  sin armada. Malgrado esto el fue kapache de formar fuersas shiitas kon el apuyo del Iran i  su proksi libanezo Hizbollah  a arekojer mersenaryos  para arreziar su poder i rekonkistar su payis.

 

Asad es finansado por  la Rusia ke tiene enteresos militares en Siria ke le dyo una baza al bodre de la mar Mediteranea i por el Iran ke  es interesado de estableser en Siria una fuerasa shiita al model del Hizbollah o de los Houthis del Yemen. Al kapo de este proyekto el jeneral iranyano Kasem Soleimani no le emporta de ver Asad en pozisyon   de governar o no, porke su ajenda es de estableser una  milisia djihadista, proksi del Iran, en desparte de la armada. Un djenero de governo paralel sozde  para sovreguardar la integridad de la Siria. En realita Iran kere meter su patada en el Medyo Oriente, en kontrolando el Libano la Siria i el Yemen en despartes del Irak. Solo en Siria se renkontra kon  seriozas difikultades  sovre todo de la parte de Israel ke ataka reguliaramente  sus bazas.  Mas de 100 vezes kon su avyasyon Israel destruyo bazas militaras, sentros de komandamientos i transportos de armamientos iranyanos. Israel malgrado la entremision de la Rusia ke propoza ke las mas serkanas bazas de los Iranyanos esten lechas de 100 kilometros de la frontiera del Golan Israel refuzo de achetar por el momento esta propozisyon.  Israel kon determinasyon deklara ke el Golan aze partida de Israel koza ke en la situasyon  aktuala dingunos de los antagonistas no  le kontestan i ke el Iran no devra tener bazas en este payis de dinguna manera.

 

De otra parte en Siria ay mas aktores komo Los Estados Unidos prezentes en el nord este del payis ke miran de sovreguardar la Otoridad Kurda del Irak i de sus aliados  Kurdos sirianos. Situasyon ekivoka para los Turkos ke no keren de dinguna manera ke un payis independiente kurdo sea establisido al sud de sus frontieras largas de miles de kilómetros.  Eyos okupan siertos kantones kurdos al interno de la Siria, i están frente kon frente kon los amerikanos , aliados al seno del Nato, aliados stratejikos de siempre. El mas chiko yerro de una parte en el tereno kreara un konflikto grave entre las partes.  En despartes de esto  el prezidente Erdogan no kere ke Asad este mas  al poder . El a traverso  los lideres de miliones de refujiados ke biven al seno de su payis mira de enfluensar los abitantes sunitas komo shiitas  para estableser una republika sin Asad. 

 

De otro lado  Asad dezde el 1974   respekto un armistisio total en la frontiera kon Israel i ke de dinguna manera no permitio a ke Israel sea atakado .  Se puede dizir ke es  una paz yelada sovre el estado de gerra ke  kontinua entre los dos payizes.  Bien entendido este estado konviene a Israel por tener kalmo en su frontiera del Golan i no mesklarse de la gerra entre ermanos  todo en dando ayudo umanitaryo a miles de sirianos ke biven serka de la frontiera. El ultimo egzemplo  fue el transfer a traverso Israel de los 423 ‘kaskos blankos ‘i sus famiyas a la Jordania. Son los payizes evropeos i el Kanada ke demandaron el ayudo de Israel. Se establisio ke mas de 5000 blesados sirianos fueron melizinados por Tsahal ke fondo en el territoryo siriano un ospital militar. Ademas los druzes del Golan biviendo en territorio siriano fueron protejados por los israelianos para ke no sean atakados por Isis o los djihadistos. .

 

Malorosamente dezde poko tiempo  el kalmo ke Israel tuvo kon la Siria ke duro 40 anyos no kontinua mas.  Las semanas pasadas raketas echadas por los miembros de Isis kayeron en el Kineret, un avyon siriano fue abatido  ansi ke drones , en territorio inimigo. Israel fue obligado de serrar la frontiera i dezmontar el ospital i los sentros de abastesimientos para los siviles ke fuyen la gerra. Ansina vemos la fin de un kapitolo i de un muevo kapitolo ke ampesa i ke  no savemos kualas serán las surprezas ke mos  reserva.  Rogaremos por  kalmo- i deke no- para un dialogo kon el puevlo siriano.

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

ADRES/כתובת 

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon