LA FAMIYA CARASSO

April 24, 2018

 

I EL FAMOZO YOGURT DANONE

Isaac Carasso, fondador de las imprezas Danone i el primero a komersializar el yogurt, nasio el 19 de Avril 1874, en Saloniko i era miembro de una de las mas eminentes famiyas sefaradis de la sivdad. El era mediko i en mizmo tiempo ombre de negosios.

 Su tio, Emanuel Karasu, ke troko su alkunya de Carasso a Karasu, ke en turko sinyifika “agua preta”, fue deputado en el governo otomano, uno de los lideres de la masoneria en Saloniko i miembro del movimiento nasionalista “Los Djovenes Turkos”, ke mas tadre i despues de duras luchas fueron los ke metieron la baza para la fondasion de la Republika Turka.

Kon el desbrochamiento, en 1912, de la I Gerra Balkanika, Carasso tomo a su famiya i paso a bivir a la sivdad de Barcelona, en Espanya ande avrio su kilinik. Su ijo Daniel, ke en akeya epoka tenia 7 anyos, empeso a ser yamado por sus amigos i vizinos Danone, ke es el diminutivo i nombre de karinya de Daniel, en katalan.

Isaac Carasso se dio kuento ke munchos  de sus djovenes hazinos estavan sufriendo de problemas en el sistema djijestivo i en los intestinos. El avia sido impresionado, en akeyos anyos por el lavoro de Elias Metchnikoff, investigador ukrainyano ke en 1904 avia Ganado el Premio Nobel por sus estudios segun los kualos, la djente ke bivian en siertos lugares de los Balkanes eran mas sanos i tenian mas larga vida ke el resto  de la povlasion, a kavza de la konsomasion de leche fermentada o sea el yogurt.

El se akodro ke el yogurt, muy  popular en Saloniko, Bulgaria i otros paizes mas de los Balkanes era vendido al kilo i ke semejantes problemas eran tratados kon yogurt desde largos anyos atras. El desidio de fabrikar, el mizmo,  el yogurt aziendo traer, prinsipalmente de Bulgaria, los materiales nesesarios para la fabrikasion del yogurt. El vendio su produkto, por primera vez kon el  nombre de Maya-Sante, komo kura en las farmasias. En segito, a la reushidad ke tuvo este tratamiento, en 1919, el fondo una chika empreza para la fabrikasion de yogurt, ke asta entonses no era konosido en Evropa Oksidentala, i ke kontinuo a ser vendido en las farmasias, esta vez basho el nombre DANONE.

En akeyos primeros anyos Daniel noto los prinsipios kon los kualos su padre yevo adelantre la impreza, prinsipios ke son valables asta oy dia. Los efektos saludozos del yogurt era eskrito sovre kada djarriko de porselen: Alimento potente i rekonstruyente para el estomago i los intesntinos.”

Tomando en konsiderasion la ekspansion de la impreza, Daniel desida de estudiar komersio en Marseille, verso la fin de 1929 i kompleta su formasion en el Instituto Pasteur, en Paris. El es agora un sientista tambien i empesa a intersarse en la kreasion de muevos produktos komo el yogurt kon diversas savores. Para  el la sensia era la baza del negosio i nunka desho de aplikar muevas teknikas.

Despues de aver terminado sus servisio militar, en Espanya, Daniel Carasso fondo la impreza DANONE, en Fransia. La resuhidad fue imediata grasias a la perseverensia i dezeo de modernizer el kamino ke  avia fiksado su padre, Isaac Carasso ke murio en1939, en Fransia.

“Para mi padre el yogurt era un produkto terapeutiko ke se vendia en farmasias. Para mi, tenia ke ser un alimento de plazer ke devia yegar a una muy ancha klientela, La djente de los Balkanes ke bivian en Paris me dizian ke esto no es yogurt, ma por kontra esta pasta asida i espesa ke via vender en mi chikez en Saloniko, enkanto, al prinsipio a los parizianos, despues a todos los abitantes de Fransia i mas tadre al mundo entero” avia dicho Daniel Carasso.

Durante la II Gerra Mundial, el, mas prudente, paso abivir a Estados Unidos. Su ermana Flora ke avia kedado en Evropa, fue matada por los Nazis, djuntos kon su marido, en uno de los kampos de eksterminasion.

En Bronx, New York, fondo la firma Dannon Milk Products. Siete anyos mas tadre torno a Fransia kon una innovasion muy importante para su futuro: la pasteurizasion de la leche. A su retorno el rekupero de meuvo el control de Danones i yego a una ekspasion komersiala sin presedente, asta djuntar 300 milyones de konsomadores i 80.000 empleados.

Daniel Carasso, el ombre ke yevo Danone a ser una firma mundiala murio en el mez de Mayo, 2009, a la edad de 103 anyos en Paris. Nunka sufrio de kualkier hazinura i ainda tenia proyektos para el futuro. El se asento en su kanape, komo kada dia, para azer su siesta i no se desperto mas. En este mizmo avia aparesido en el jurnal Le Monde, su ultima entrevista, kon okazion de los 90 anyos de la impreza.

De akel beveraje lechozo yamado Danono ke Isaac Caraso avia lansado en Barcelona, mas de 90 anyos atras, se konsumen oy 80 milyones, i puede ser ke muncho mas,de unidades al dia en el mundo.

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon