Antes poko tiempo en un simpozyo akademiko al kual estuve invitado se avlo de la mujer djudia en jeneral i lo ke me entereso los mas fue lo ke se disho de la mujer sefarad dizde el sieglo pasado fina oy en dia. Parami en muestro tiempo, la mujer sefarad es akea ke konose su idioma, ke tiene abuelos ladino avlantes de orijin españyola. Por siguro, se pensa ke su famiya es orijinaria del Imperio Otomano, el solo lugar onde el kastilayano antigo fue usado sieglos . La mayoriya de los djudios sefarad ke se establisieron ahuera del Imperio Otomano kon el tiempo perieron la uzansa de la lingua i de las kustumbres por la simple razon ke eyos no fueron achetados komo una nasyon. Si oy en dia una mujer avla el ladino , lo kere dizir ke tiene o tuvo parientes ke biviron en el Imperio Otomano es konsiderada komo la verdareda sefarad.
Para dar mi sentido sovre este sujeto, diche:” La mujer djudia, en su forma de madre i de esposa , es el elemento fundamental del nukleo familyal djudio. Las mujeres ke konosi de serka i intimamente , komo la mayoriya de mozotros, son mi madre, mis ermanas i mi mujer. Mazalozas eyan fueron ke no se engrandiesieron izoladas en los kurtijos de sus kazas, ambezandosen solo a gizar,a kuzir, a brodar, a kantar i a oyir de sus madres siertos preceptos de la Tora. Koza ke fue el kavzo de mis nonas i biznonas ke no supieron ni meldar ni eskrivir i ver banko de eskola.
Akeyas ke nasieron en los dalkavos sien anyos fueron edukadas en eskolas djudias o nasyonalas en el payis en el kual bivieron o biven. De muestro tiempo eyas frekuentan universitades i se azen ekonomikamente independientes en lavorando en sus propyos domenyos. La mujer sefarad de oy, no es solo la persona ke auna la familia, ma mira de meter kon immensia pasensya, pas i ekilibro entre su marido i sus ijos, el orden en su morada ,i se siente responsable de su limpieza. Ademas aregla kon saverisyo todo lo ke sepasa al dorredor de su familya i komo lo dishe, va mizmi a lavorar para ayudar ekonomikamente su matrimonyo. “
Kon la fundasyon del estado de Israel, kada manseva djudia tiene el ovligo antes de kazarse de ser soldada i de partisipar a la defensia de su payis. Digo esto es una bindision , ke permete a la mujer israeliana de tener el mismo rango sosyal del ombre. Mas independiente eya partisipa a la vida moderna del payis i se siente respektada por la sosietad sivil i militar. Leyes la proteja de abusos i le da derechos de libertad en la sosietad en la kuala bive , de pueder tomar sus propiyas desiziones sin demandar el konsentimiento de se espozo. Estas kondisyones, muestras abuelas no las vieron i mizmo no se las sonyaron. En poko biervos la djudia moderna es muncho mas dinamika de sus nonas i biznonas. Ansina la mujer sefarad en Israel se asemeja a la mujer de otra orijin otoktona kon la sola diferensia ke eya es mas respektuoza enfrente de los miembros mayores de la famiya.
La emansipasion de la mujer djudia en los 120 anyos pasados es al nivel de la mujer del oksidente, no manko sino mas. Savemos ke munchas de eyas fueron muy famozas.. , keriya darvos unos kuantos nombres de la elit sefarad ke bivyo en el sieglo pasado, komo Emma Lazarus nasida en Los Estados Unidos, Rita Levi Moltancini nasida en Italia, Bat Ye’or nasida en Ayifto, Françoise Giroud nasida en Fransia, Ester Morges Aligranti nasida en Turkia, Buena Sarfati nasida en Gresia, Camila Kolonomos nasida en Makedonya. Bien entendido la lista es larga, i no tengo aki la posibilitad de nomarlas a todas.
Enfin vos dire ke me ambizi durante el enkontro dichas ke uzavan muestras nonas, ke me paresen interesantes. A saver:
PAN DE KAZA ENFASYA.
NI LA NOVYA NI LA SEMOLA NO LAS MIRES KON KANDELA.
SAKO VAZIYO NO SE APARA EN PIES.
POR UN POKO DE SAL NO MIRES LA KOMIDA A MAL.
EN KAZA YENA PRESTO SE GIZA LA SENA.
NI SENA DE KARNE NI ESTAR KON LA ESHUEGRA.
DE KE PARI BOKADO BUENO NO KOMI.
KRIAR ES FERRO MASHKAR.
DIZEREMOS BUENO KE SE AGA BUENO.
PAN I KEZO MA UN BUEN BEZO.